सामाजिक संजालय् लाेकंह्वाःपिं प्याखँहुलामि दाजु व क्येँहे सन्जु खड्गी व करिना खड्गीया मनमाेहक भिडियाे अन्ति साेमा सलिंचाय् पिदंगु दु । तर थुगु भिडियाेस धाःसा निम्हं डान्स पांर्टनर मखुसे छम्ह प्याखँ हुलामि व छम्ह काेरियाेग्राफर जुयाः पिदंगु दु । सामाजिक संजालय् फाय्मिलि क्रुया नामं लाेकंह्वाःगु थुगु पुचःया फाय्मिलि अर्थात परिवार या मू हामा धाःसा शंकर खड्गी खः । नेपालभाषा ख्यलय् छम्ह च्वमि कथं नां जाःम्ह व पेजथ्री पिपल्स च्वइस अवार्ड ११३३य् उत्कृष्ट संवादया अवार्ड त्याकुम्ह शंकर खड्गीं हे थुगु म्ये च्वयाः व निर्देशन यानातःगु दु ।
मेम्ह पेजथ्री पिपल्स च्वइस अवार्ड ११३३य् उत्कृष्ट मिजं कलाकार जुइत ताः लाःम्ह किशाेर कुमार शाही व पेजथ्री अवार्ड हे निक्वः त्याका दिइम्ह दीपा महर्जनया सलय् थुगु म्ये तयार जूगु खःसा म्येया संगीत नं किशाेर कुमार शाहीं तयातःगु खः । भिडियोया छायाँकन व सम्पादन बालकुमार मगर खः ।
थौंकन्हे म्युजिक भिडियो ख्यलय् लोकं ह्वाना च्वंम्ह मनोज महर्जनया नापनापं हसना महर्जन व सुजिना शाही नं दु । छगू कथंया मल्टी स्टारडम दुगु थुगु म्ये थाैंकन्हे लाेकं नं ह्वानाच्वंगु दु ।
लाेक गायक रत्न बेहोशी बज्राचार्य मूपाहाँ कथं झायादीगु उगु ज्याझ्वः फेमिलि क्रुपाखें ग्वसाः ग्वःगु खः । ग्वसाखलःया जरिना खडगीया सभानायसुइ जुगु उगु ज्याझ्वः मूपाहाँ रत्न बेहोशीं उलेज्या यानादीगु खः । ज्याझ्वलय् वरिष्ठ कलाकःमि पवन जोशी , संगीतकःमि राजु सिंह, हुलाप्याकःमि भुवन दास श्रेष्ठ व वरिष्ठ सिने पत्रकार विजयरत्न असंबरें नेपालभाषाया म्युजिक भिडियो ख्यःयात कया नुगःखँ तयादीगु खःसा म्येच्वमि व निर्दशक शंकर खडगी, गायक व लय चिनामि किशोर शाही म्येयाबारे खँ तयादीगु खः । ज्याझ्वलय् सुरेन्द्र श्रेष्ठं लसकुस याःगु खः ।
ज्याझ्वलय् उगु भिडियोया कलाकःमि , प्राविधिक व ग्वाहालिमिपिन्त सुभाय् पौ नं देछागु खः ।
