स्थानीय सरकारं येँ महानगरपालिका दुने लाःगु फुक्क स्कुलय् नेपालभासाया माध्यमं स्थानीय विषय ब्वंकेगु युगया शुरु जूगु दु । किपू नगरपालिकां नेपालभाषा ब्वंकेगु निर्णय यानाः सफू तयार यानाच्वंगु, थिमि नगरपालिका, भ्वँत नगरपालिकाय् नं नेपालभाषां ब्वंकेगु बारे तयारी जुयाच्वंगु दु । यल महानगरपालिकांलां थुगु दँ निसें फुक्क हे सामुदायिक व प्राइभेट स्कुलय् नेपालभासा ब्वंकीगु जूगु दु । थुलि जक मखसे मकवानपुरया थाहा नगरपालिका, काभ्रेया पनौती नगरपालिका, येँ जिल्लाया शंखरापुर नगरपालिका, चन्द्रागिरी नगरपालिका, तोखा नगरपालिकाय् नं नेपालभाषा ब्वंकेगु खँ न्ह्यानाच्वंगु दु ।
नेपाःया शिक्षा नींतिइ वःगु ह्यूपाः थ्व थें गुब्लें वःगु मदुनिं । छगू उत्साह, छगू जोश व छगू म्हगसयात साकारयायेगु नितिं गुगु रूपं छगू संयत्र निर्माण जुयाच्वंगु दु व तसकं हे च्वछायेबहगु खँ खः । थुगु शैक्षिक वातावरणया निंतिं सफू च्वयेगु निंसें कयाः स्यानिमि उत्पादन तकं हे थुगु प्रणालीं ज्या न्ह्याकाच्वंगु दु । सरकारं हे निर्देशन बियाः आ स्थानीय विषय ब्वंकी धकाः धायेधुंकाः स्थानीय स्कुल तयार जूयाच्वंगु दु सा संस्थागत स्कुल नं उत्सुक हे दु ।
स्कुलया गतिविधि दुने अनेकौं खँ जुयाच्वनिं । नेपालय् जुसां थी थी देय्या भाय्नं ब्वंकाच्वनिं । कम्प्यूटर हे ब्वंकुसां नं थौंकन्हेया मस्तय्त अति सामान्य खँ स्यनाच्वनिं जबकी थौंकन्हेया मस्त थःम्हं हे थःतः माःगु भिडियो माला स्वये सः, गेम डाउनलोड याना म्हिते सः, टिकटक दयेके सः सामाजिक संजालय् थः म्हाइपुसेच्वन धाःसा थी थी स्टाय्टस तयेसः । मस्तय्त शारीरिक रूपं बल्लाके माः धकाः तेक्वाण्डो, कराटे स्यनाच्वनिं । स्थानीय विषयया ज्ञान गुलि आवश्यक धैगु खँ थौंया इलय् विद्यार्थीया अभिभावकपिंसं यायेफयाच्वंगु स्थीति मदु । थ्व हे कारण थुगु प्रणाली आः विद्यार्थी लिसें विद्यार्थीया अभिभावकपिंत नं लुधंक थुइके माःगु दुसा नेपालभासां वा स्थानीय भासं शिक्षा कायेगु धैगु छुं जोरजवजस्तीया खँ मखुधैगु खँ वाः चायेका बी माः । थौं भारतय् हे स्वल धाःसा प्रदेश वा प्रान्त अनुसार भाय् पाः । छगु भासं मेगु भाय्यात उलि हे आदर याइ । सुं मनू जापान वन धाःसा जिं जापानी भासं खँ ल्हाये मखु वा जिं जापानी छाय् ब्वनेगु धकाः हठ याइ मखु । व हे कथं थौं देय्या संरचना हिले धुंकाः वागमती प्रदेशया येँ महानगरपालिका दुने नेपालभासा विषय नं ब्वनेमाः धैगु खँ नं थुइके माः अले मेपिन्त नं झीसं थुइका बिइमाः । स्थानीय भाय् स्थानीय संस्कारलिसे स्वानाच्वंगु दइ । थनया थीथी सम्पदा गथेकी नखःचखः, जात्रा, जीवन संस्कार, मृत्यु संस्कार, नसा ज्वलं इत्यादि बारे थुइकेगु इच्छा मदु धाःसा थ्व थासय् गथे भ्यलय् पुनेफइ ? उकिं शिक्षाया थुगु युगया शुरुवातयात झी सकल जानां साकार याये हे माः ।
