सामाजिक संजालय् नेपालभासाया संकिपा स्वयेगु निंतिं छुं थाकु मजुइ धुंकल । युट्युबय् नेपालभासा मुभिज, नेवारी मुभिज धकाः सर्च यात धाःसा याउँक हे नेवाः प्याखँया धलः तयार जुयाः पिहाँवइ ।
लकडाउन लिपा निशेधाज्ञाया कारण नेवाः प्याखँत हलय् प्रदर्शन जुइगु स्थीति मदु । थ्व हे कारण गुलिं प्याखँ धाःसा अनलाइन स्वये दइ कथं युट्युबय्नं धमाधम पिथना हयाच्वंगु दु । गुलिं प्याखँ सर्च याना लुयाच्वनिं सा गुलिं प्याखँ धाःसा मलुइ फु । व हे कारण नेपालभासाया थीथी प्याखँया धलः तयार यानागु जुल गुगु युट्युबय् स्वयेगु निंतिं उपलब्ध दु ।
थ्वला ग्यानापु स्टाइल
ईलोहं प्रकाशनया आधिकारीक च्यानलय् स्वयेदइगु थुगु प्याखँ १ः५७ मिनेट दु । भोगेन्द्र मानन्धरया निर्देशनय् तयार जूगु थुगु प्याखँ सुरेन्द्र तुलाधरं च्वःगु खः । छम्ह मचाया अपहरण याइगु व उम्ह मचायात गुगुकथं गुण्डा त पाखें बचे याइ धैगु न्ह्यइपुक्क प्याखँ दयेकातःगु दु । थुगु प्याखनय् रवि डंगोल, भिंतुना जोशी, नस्वाः जोशी, रोजीना सुवाल, मानकृष्ण वा वाया मू भुमिका दु ।
वाया दुने जाकी दु
सुकुन्दा फिल्मस्या आधिकारीक साइटय् स्वयेदइगु थुगु प्याखं १ः३३ मिनेट दु । वासु शाहीया निर्देशनय् तयार जूगु थुगु प्याखँ नं वासु शाहीनं हे च्वःगु खः । वासु शाहि लिसें सुनिता श्रेष्ठ, अन्नपुर्णेश्वरी, हरि घेमोसु लगायत मेमेपिं कलाकार दु, थुगु प्याखंया बाखँ पारिवारीक बाखं जुसें चिचिधंगु खँ नं गुकथं परिवार नष्ट जुयावनी धकाः क्यनातःगु दु ।
अंश
चिराग फिल्मस्या आधिकारीक युट्युब च्यानलय् अपलोड जूगु थुगु प्याखं मुक्कं २ः०१ मिनेट दु । हरिश तण्डुकार, राजेश महर्जन, सवि गोपाली, सुरेन्द्र तुलाधर, संजयराज शर्मा राजोपाध्याय् लगायत अनेकौं कलाकार दुगु एक्शन ड्रामा प्याखँ सुरेन्द्र तुलाधरं निर्देशन यानातःगु प्याखँ खःसा थुगु प्याखँ नं सुरेन्द्र तुलाधरं च्वयातःगु खः । तसकं हे नाटकीय रूपं थी थी घटना लिसें एक्शनया श्रमिश्रण थुगु प्याखनय् दु ।
जिपिं बदमाश मखु
चिराग फिल्मसया आधिकारीक युट्युब च्यानलय् थुगु प्याखं अपलोड यानातःगु दु । थुगु प्याखँ मुक्कं १ः५२ मिनेट दु । राजु महर्जन, हरिश तण्डुकार, स्वतन्त्र महर्जन, भोगेन्द्र मानन्धर, भिंतुना जोशी, दिपा शाक्य, सुरेन्द्र तुलाधर, महन्तलाल महर्जन, सुरोज महर्जन लगायत आपलं आपाः कलाकार दुथ्यानाच्वंगु थ्व छगू मल्टीस्टारर मनोरंजनात्मक प्याखँ खः। थुगु प्याखँया निर्देशक सुरेन्द्र तुलाधर खःसा प्याखँ नं सुरेन्द्र तुलाधरं हे च्वयातःगु खः ।
न्हूम्ह भौमचा
जेनेक्स मिडिया नेपालया आधिकारीक युट्युबय् अपलोड जुयाच्वंगु थुगु प्याखँ मुक्कं १ः३३ मिनेट दु । सुरेन्द्र महर्जन, देविना महर्जन, रत्न बेहोसी, भिमसेन रिसाल, कृष्ण भक्त महर्जन, अन्नपुर्णेश्वरी लगायत अनेकौं कलाकार दुगु थुगु प्याखँ छम्ह भौमचाया बाखनय् आधारीत दु । पारिवारीक प्याखनय् प्रकाश राज मानन्धरं च्वयाः निर्देशननं याःगु दु ।
लाय् मदुगु पसः कलाः मदुगु ससः
जेनेक्स मिडिया नेपालया आधिकारीक युट्युबय् अपलोड जुयाच्वंगु थुगु प्याखं मुक्कं २ः२९ मिनेट दु । महन्तलाल मल्ल, अन्नपूर्णेश्वरी श्रेष्ठ, सुरेन्द्र महर्जन, रीतु दर्शनधारी, प्रमिला मानन्धर, सुनिता श्रेष्ठ, ज्ञानकुमार महर्जन आदि इत्यादी कलाकार थुगु प्याखनय् दु । नेपालभासाया छम्ह च्वमि जुयाः म्वायेगु गुलि थाकु धकाः थुगु प्याखनय् न्ह्यब्वयातःगु दु ।
थुगु प्याखँ सनम कुमार श्रेष्ठं च्वयाः निर्देशन यागु खः ।
मतिना
सुकुन्दा फिल्मसया आधिकारीक युट्युबय् अपलोड जूगु थुगु प्याख १ः१२ मिनेट दु । थुगु प्याखनय् रविन्द्र शाही, गीता शाही, सुरेन्द्र केसी, शरद कसाः, राज शाही, सुरेश खड्गी, मंजु श्रेष्ठ आदि कलाकार दु । थुगु प्याखनय् छेँया पारिवारीक वातावरणय् मतिनाया कारण गुगु कथं मोड वइ धकाः न्ह्यब्वयातःगु दु । प्याखँ सुरेन्द्र नकःमिं च्वःगु खःसा प्याखँ अमृत मान महर्जनं निर्देशन यागु खः ।
थः कतः कतः थः
जितेन्द्र राजोपाध्यायया आधिकारीक युट्युब च्यानलय् अपलोड यानातःगु थुगु प्याखँ २ः०७ मिनेट दु । थुगु प्याखनय् सविन शाक्य, सविना डंगोल, सुरेन्द्र महर्जन, सचि राजोपाध्याय्, सुरेन्द्र केसी, रूपेन्द्र श्रेष्ठ लगायत आपालं कलारक दु। प्याखनय् बिदेशय् वनां ज्या याइम्ह भात व कलाया मतिनाय् मेम्ह मनू प्रवेश जुइगु बिषय दु । प्याखँ पिके श्रेष्ठं च्वयातःगु खःसा जितेन्द्र राजोपाध्याय्नं निर्देशनयानादिगु खः ।
