रेक्स फेसन होमया संयोजन लिसें काराओके इन्टरटेन्टमेन्टया ग्वसालय् न्हूगु ज्याझ्वः कथं मिस नेवाः वर्ल्ड २०२१ या घाेषणा ज्याझ्वः लिसें पत्रकार सम्मेलन जुल । सन २०१६य् मिस नेवाः आइकन यानां चर्चाय् वःगु थुगु संस्थां आः हाकनं न्हूगु ज्याझ्वः यायेत्यंगु खः । नेपाः समाजय् जक सिमित मजुसे विश्व न्यंकया नेवाःत मुंकाः यायेगु ताःतुनां सुं नेवाः मय्जुपिं थुकी ब्वति कायेगु मन दुसा थुगु कासाय् ब्वति कायेफइ धकाः रेक्स फेशन हाेमया सिइओ रेक्स रंजितं धयादिल ।
ज्याझ्वलय् काराओके इन्टरटेन्मेन्टया अध्यक्ष खगेश रंजितकारं झी नेवाःत न्ह्यां वने माः धाःसें जातीय सदभाव झीसं कायेमयानाच्वंनागु खँ कुलादिल ।
विश्वन्यंक दुपिं नेवाः समाजं १६ निसें ३० दँ उमेर समूहया ५ फिट सिबें तःधिकःपिसं ब्वतिकाये दइगु खँ खगेश रञ्जितकारं धयादीगु खःसा नेवाः जातं माबाैपिं निम्हं हे नेवाः हे जुइ माः धकाः नं धयागु दु । आवेदन फाराम सावन ५ गते दुने अनलाइन पाखें www.missnewaworld.com य् दर्ता यायेफइगु जानकारी नं बिल ।
