इन्द्रजात्रायात इन्द्रजात्रा धकाः झी नेवाःतय्सं धायेमज्यु धकाः छगू मान्यता नं ब्वलंकाच्वंगु दु । नेवाःतय्गु जात्रायात खँय्करण याना यंकल धकाः येँया पुन्हिंया मौलिक नां स्यंकल धकाः नं धायाःच्वंगु दु । थौं कन्हे इन्द्रजात्रा वा येँया पुन्हिं धकाः थीथी देशय् नं कुमारीया खः साला, पुलुँकिसी प्याखँ अले लाखे प्याखँ हुइका व समयबजि नयाः हनाच्वंगु सामाजिक संजालय् खनाच्वंगु दु । तर यन्यापुन्हिं वा इन्द्रजात्रा धैगु थथे हे कुमारीया खः साला, लाखे प्याखँ हुइका वा पुलुकिसि प्याखँ हुइकेगु जक हे खः ला ?
झीसं येँया पुन्हिं धकाः हनाच्वना तर थ्व गतिविधि फुक्कं मनोरंजनया हे जक खः । थुकी पुन्हिंया गतिविधि मदु । विशेषरूपं येँया पुन्हिं कुन्हु पितृलिसे स्वाकाः पुजा वा गतिविधि जुयाच्वंगु खनेदु । तर थौंकन्हे इन्द्रजात्राया येँया पुन्हिं धायेमाः धाःसां पितृया ज्याखँयात ध्यान उलि बियाच्वंगु मदु । थीथी मिथयात ड्रामाटाइज वा नक्कल जक याना लाखे, पुलुकिसि प्याखँ हुइका समय्बजि नयेगु ज्याय् पिनेया नेवाःत लगे जुयाच्वनसा थन नं येँया पुन्हिंयात पृथ्वीनारायणं हमला याःगु दिं धकाः छगू थप्पा तयाः मूल येँया पुन्हिंया मर्मयात नं हिइकाच्वंगु वाः चायेके फइ ।
इतिहास स्वल धाःसा येँय्, सिंह प्रताप शाहंया पालय् निसें तिनि यःसिं थन धैगु खँ दु । थुकीया लिधंसाय् थ्व खँ झीसं धायेफुकी येँया वा इन्द्रजात्रा शुरु यायेत यःसिं निं थने माः धैगु मखुत । कारण यःसिं थने न्ह्यो नं थन इन्द्रजात्रा वा येँया पुन्हिं ला हना हे च्वंगु पुष्टि जुल।
अथे हे आजुद्यः झी सकस्यां चाःयाम्ह खः धयागु स्यू । आजु द्यःया आइकनोग्राफी स्वल धाःसा छम्ह अनार्य चरित्र खंके फइ । मिखा ततःग्वः, मिखा फुसि तधंगु। तर व हे जात्राय् चिनातइम्ह इन्द्रया आकनोग्राफी धाःसा सुलुक्क च्वंगु ख्वाः, न्हाय्, मिखा, म्हुतु स्वइबलय् हे ल्वः वनापुसे च्वं । छगू हे जात्राय् द्यःया आइकोनोग्राफी छाय् थपाय्सं पाःगु व उलि जक मखुसे आजु द्यः धाःसा चाः याम्ह तर इन्द्र धाःसा धातुयाम्ह जुयाच्वन । उकिं थुगु जात्राय् इन्द्र व आःजुद्यः गथे नापं लाः वल धैगु खँय् अनुसन्धान यायेमाःगु खनेदु ।
तर इन्द्रजात्रा धकाः मनूत समय्बजि, लाखे पुलुकिसि जक प्याखँ हुइकेगुलिइ थःगु गर्व ताय्काच्वन । गुब्लें नं इन्द्रया स्वापू झीगु सभ्यतालिसे छु दु धैगु स्वयेगु मयाः केवल इन्द्रयात वर्षाया द्यः जक धयातःगु दु । तर वाः वयेकीम्ह द्यःयात छाय् चिनातयेमाःगु खइ ? अझ दागिंया ख्वापाः व चिनातःम्ह इन्द्रया ख्वापाः स्वलधाःसा नं छुं कथंया समानता मदु । जात्राय् दइगु ख्वापालं नं छगू बाखँ कनाच्वंगु दइ । इन्द्रजात्राय् दक्व हे ख्वापाः छगू हे कालया खनेदु तर इन्द्र छम्हेसिया ख्वाः धाःसा मेगु हे संसारं वःम्ह थें खनेदु ।
इन्द्र वैदिक वा आर्यतय्गु द्यः खः । महाःद्यः अनार्य । इन्द्रजात्रायात मेगु दृष्टिकोणं स्वयेगु खःसा थ्व जात्राय् कन्फिल्क्ट दु । निगु गणया ल्वापू दु । आर्य व अनार्यया ल्वापू । आर्य त्याः थाय् अनार्ययात राक्षस दयेका बिइ। तर आर्य बु थाय्नं आर्य हे जुइ । इन्द्रयात चिनातइगु धैगु अनार्यतय्सं आर्ययात त्याकुगुया हे चिं खः । धार्मिक ल्वापूया दृष्टिं थुगु नखःयात विश्लेषण याये नं ल्यं हे दनि । थुकीया छगू मेगु दसू स्वयेगु खःसा पुलुकिसिया नं स्वंगः मिखा च्वयातःगु दु । लोककथन कथं इन्द्र तंगुलिं इन्द्रया बहान एरावत किसिं माः वल । तर एरावत वा पुलुकिसिया स्वंगः मिखा दयेवं व शिव गण दुने लाइ न की इन्द्रया । इन्द्रया कपालय्ला योनी जक दइ । थज्योगु हे चिं स्वयाः द्यया गण म्हसिकेगु खः । तर ख्वपयाम्ह पुलुकिसिया कपालय् धाःसा छुं कथंया चिं मदु ।
उकिं इन्द्रजात्रा वा येँया पुन्हिं बारे यक्व हे अनुसन्धान यायेमानी । नामय् जक थ्व नां मखु थथे धायेमाः अथे धाये माः धकाः हालाच्वनां ल्वापू बाहेक छुं जुइ मखु ।
