लाखे । थुगु नां कयाकथं झीगु न्ह्यःने येँयाःया लू चाःहिली, ह्याउँसेच्वंगु ख्वाःपाः पुनाः ह्याउँसे हे च्वंगु सँ अले ह्याउँक हे लं फिनाः तिं तिं न्हुयाः प्याखं ल्हुल्हुं ब्वाँय् वःगु लू मिखाय् चाःहिली । खतुं लाखे नं तःथासय् तःताकथंया दु । अथेसां झीत लाखेया नां कयाकथं येँयाःया मजिपाः लाखे हे झट्ट लुमनावइ । तर यलया मिप्वाः लाखे नं दुसा किपुलिइ नं लाखे पिकायेगु याः । व हे कथं, सोलुपाखे नं गुम्बाय् लाखे पिकायेगु चलन न्हापा दुगु खः । थुकथं नेवाः जक मखु, गैर नेवाः समुदाय दुने नं लाखे पिकायेगु चलन दु । आः वयाः थुकथंया लाखेया धलः दुने मेगु छगू नां नं थप जूगु दु । दिपक बज्राचार्यया मनमगनया लाखे ।
दिपकया रिदम ब्यान्डं लाखे न्ह्यब्वयेगु याःगु आः मखु । सन् २०१४ पाखे क्रिम अफ रिदम धकाः दिपकं छगू अभियान हे न्ह्याकल, let The World Dance In Nepali Music धकाः । उगु इलंनिसें दिपकं थःगु ब्यान्डय् गीतार, ड्रमया नापं कान्तां डबडब, खिं, धिमे, मगःखिं आदि नं मिक्स यायेगु यात सा लाखे व झाक्रीया प्याखं नं न्ह्यब्वयेगु यात । २०१८य् वयाः दिपकया थुगु अभियानं अझ व्यापकता काल, मनमगन म्येलिसें । थुकी दिपकं न्हापाया म्येय् स्वयां आपालं नेवाः बाजं, तजिलजिलिसें मेमेगु नेपाली तजिलजि, चलनयात नं कःघायेत स्वल । व झ्वलय् धिमेय्या तःधंगु हे पुचःलिसें न्हापा लाखे, झाक्री जक दुगुलिइ कुमारी, पुलुकिसिया नापं ख्वपया घिन्ताङ किसि प्याखं नं न्ह्यब्वयाः झःझः हे धाःगु म्यूजिक भिडियो पिथन । थुगु म्यूजिक भिडियोलिसें म्ये थुलि तक लोकं व्हात कि भारतया डिजिट्यून कम्पनीं थुगु म्येया हिन्दि भर्सन तकं दयेकेबिल । आः वयाः दिपकया लाखेया चर्चा झन थहांवःगु दु । दिपकया न्हूगु म्ये ‘राती’इ मेन क्यारेक्टर अथवा धाये हिरो हे लाखेयात दयेकाः न्ह्यब्वःबलय् लाखेया बारे स्यूपिं जक मखु, मस्यूपिन्सं तकं थुकी च्यूताः काःगु खनेदत । दिपकया ब्यान्डय् लाखेया थपाय्मछि हाकःगु यात्रा क्वचायेधुंकाः नं व लाखेया ख्वाःपाः ल्यूने सु खः धइगु मस्यूपिं आपाः हे दनि । व लाखे सु खः ले सा ? दिपकया ब्यान्डया व लाखे खः ‘राजीप बज्राचार्य’ ।
राजीप लाखे जुयाः प्याखं ल्हूगु दिपकया रिदम ब्यान्डय् जक नं मखु । व स्वयां न्ह्यः नं राजीप लाखे जुयाः स्टेजय् थहां वनेधुंकल । राजीपयात लाखय् डान्स स्यंम्ह यज्ञमान शाक्य जुयाच्वन । आः रिदम व्यान्ड व मनमगनं धाःसा राजीप बज्राचार्ययात लाखेया हे म्हसिका बिल । आः ला सकसिनं राजीपयात लाखे धकाः सःतीगु जुयावनेधुंकल । ‘दक्वसिनं लाखे धकाः सःतीगु जुया ववं राजीप नां हे तनावनाः जिगु नां हे लाखे जकं जुइगु ला ग्यासें वयेधुंकल ।’ गललल न्हिलाः राजीपं धाल । थथे सकसिनं लाखे धकाः धयावंगु राजीपयात तसकं य नं यः ।
लाखे जुयाः पर्फम यायेगु झ्वलय् चन्द्रागिरिइ जूगु छगू प्रोग्राम ला राजीपं गबलें ल्वःमंके हे फइमखु हं । ज्याझ्वः क्वचायाकथं बुरिम्ह छम्ह दबुलिइ थहांवल, राजीप दबुलिइ हे दनि लाखेया रूपय् । उम्ह बुरिम्हं राजीपया छातिइ थियाः भागियात अले राजीपया ल्हातिइ म्हूचिनाः छुं तयाबिल । लिपा दबुलिइ कुहांवयाः स्वःबलय् न्यासः धेबा । व क्षण राजीपया नितिं ल्वःमंके मफइगु लिसें प्रेरणादायी नं जू । उगु न्यासः वंगु नोट राजीपं आःतक्क नं जतन यानाः तयातःगु दनि । ‘दिपक व रिदम ब्यान्डं जितः लाखेया म्हसिका बिल, उकिया लागिं जिं दिपक व रिदम ब्यान्डयात सुभाय् धाये हे माः ।’ राजीपं दिपक व रिदम ब्यान्डप्रति कृतज्ञता प्वंकल ।
राजीप व दिपक मचाबलय् गुच्चा म्हितीपिं पासापिं हे जुयाच्वन । दिपकया म्ये ला राजीपं न्यं । तर राजीपं प्याखं ल्हू धकाः दिपकं मस्यू जुयाच्वन । क्रिम अफ रिदमया खँ न्ह्याःबलय् लाखे प्याखं हुलेगु नितिं राजीपयात खँ हःम्ह दिपकया रिदम ब्यान्डया गितारिस्ट फिरोज बज्राचार्य खः । रिदम ब्यान्डय् लाखे प्याखं ल्हुकेगु नितिं फिरोजं हे दिपक व राजीप नापलाकाब्यूगु जुयाच्वन ।
राजीपं लाखे जुयाः नेपालं पिने तकं पर्फम यायेधुंकल । नेपालया संविधान दिवसया लसताय् चाइनाया नेपाली राजदुतावासं सःताः राजीपयात लाखे प्याखं हुइकूगु दु । राजदुतावासया काउन्सुलरं सःताः राजीप चाइनाया ग्वाङजाउ वनाः लाखे प्याखं ल्हुयावःगु दु । लाखे जुयाः प्याखं ल्हुइबलय् बिस्कं हे अनुभव जू हं राजीपयात । मेमेगु प्याखं हुलेबलय् स्वयाः लाखे जुइबलय् इनर्जी अप्वः फिल जू हं । लाखे जुयाः प्याखं हुलेबलय् थः गुलि सना गुलि तिंन्हुया थम्हं हे चाइमखूगु अनुभव वय्कःयात जू । मेपिं नं वयाः गपाय्सकं तिंन्हुयागु छ धाइबलय् थः हे अजूचाइगु खनी । प्याखं हुले न्ह्यः शान्त भैरवयात लुमंकाः राजीपं न्ह्याबलें ख्वाःपाःयात छकः भागियायेगु याः । व हे ल्याखं छुं दैवी शक्तिं हे साथ ब्यूगु खःला धइथें नं च्वनावः हं राजीपयात । तर द्यः हे दुबीगु धाःसा मखूगु नं धाइ वय्कलं ।
लाखे जुयाः यानागु हरेक पर्फमेन्स उलि हे न्ह्यइपु राजीपयात । ‘राती’ म्येया सुटिङ धाःसा बिस्कं हे । म्येय् चिलाख ज्वनाः सल गयाः लाखे वइगु सीन आपाःसित दक्कले यःगु सीन खः । सखे, म्येहालामि लिसें म्यूजिक भिडियो डाइरेक्टर दिपक बज्राचार्ययात नं दक्कले यःगु लु थ्व हे जुल । अय्जुयाः हे म्येया प्रोमोय् नं थ्व हे सीन हाइलाइट यात सा यूट्युबय् भिडियोया थम्बनेल नं थ्व हे लूयात दयेकल । थुगु म्येया हाइलाइट हे लाखे जुल । मजुइगु नं गनं, म्येया हिरो हे लाखे ।
थुगु म्येया सुटिङ मुक्कं स्वन्हु जुल । दक्कले लिपांगु दिं ला छन्हु एलओडिइ इन्डोर सुटिङ जूगु जुल । व स्वयां न्ह्यः जंगलय् निन्हु चच्छि चच्छि सुटिङ जूगु जुयाच्वन । जंगलय् चान्हय् सुटिङ, व नं असारय् । छन्हु ला चच्छि हे वा वल । जंगलय् सुल्प्या वयाः न्याःगु उलि हे । गबले वा दी अले सुटिङ न्ह्याके धकाः च्वँच्वं सुथसिया ४ताः इलय् बल्ल वा दित अले सुटिङ शुरु ला जुल । तर सुथय् ६ताः ईलिपा द्यः तुइयावःबलय् सुटिङ यायेगु खँ हे मन्त । उलि ई दुने सलया पार्ट जक सुटिङ यायेलात । मेगु ल्यं दुगु ब्व कन्हय्कुन्हु सुटिङ जुल । उबले नं वा ला वः, तर तसकं मवःगु जूगुलिं भचा भचा वा वयेक हे सुटिङ जुल । ‘भचा भचा वा वयेक हे सुटिङ याना, लाखेया सँ न्हूगु हे न्यानाहयाः ह्याउँगु रंगं छिनातयागु, व सँ प्यात । लिपा उकी वःगु गन्ध गुलितक्क ला तँ हे मन्त । व गन्धं यानाः मेमेथाय् लाखे जुयाबलय् नं व हे ‘राती’या सुटिङया ई लुमनावइगु’ राजीपं सुटिङया खँ लुमंकल ।
न्हापा स्कूल ब्वनेगु इलय् कराँतेपाखे मन क्वसाःम्ह राजीप प्यारेन्ट्स डेबलय् प्याखं ल्हुकी धकाः बिस्युं बिस्युं जुइम्ह खः । तर थौंकन्हय् डान्स ख्यलय् हे समर्पित जुयाच्वंगु दु । छुं ई न्ह्यःतक्क सशस्त्र प्रहरीइ डान्स टिचरया रूपं ज्या यानाच्वंम्ह राजीपं प्रोग्रामत अप्वयावःलिसे ई व्यवस्थापन यायेत थाकुयाः सशस्त्र प्रहरीया जागिर नं त्वःताः मुक्कं ई डान्सयात हे बियाच्वंगु दु । डान्सय् हे आनन्द काइम्ह, सन्तुष्ट जुइम्ह राजीपया डान्स यायेगु व स्यनेगु ज्यायात निरन्तरता ब्युसें थुकिया दुग्यंगु अध्ययन, अनुसन्धान यायेगु योजना दु ।
