सरकारं लकडाउनया ई क्वःछि मफया थुकियात निरन्तर यानाच्वंगु दु । थुकिया अन्त्य आःतक्क नं सीकेफयाच्वंगु मदु । थ्व लकडाउनया कारणं आर्थिक गतिविधी जक ठप्प जूगु मखसे सामाजिक जनजीवन नं प्रभावित जुयाच्वंगु दु । नेपाःया म्हसीका व नेवाःतय्गु जीवनपद्धतिया मू ब्वः जुयाच्वंगु सांस्कृतिक गतिविधी नं न्ह्याये मफयाच्वंगु दु । हरेक दँय् नेवाःतय्सं न्ह्याकावयाच्वंगु जात्रा पर्व ठप्प हे जूगु दु । गतं आशिंक रूपं द्यः जक पुज्यानाः जात्राया रिति क्वचायेगु दुसा गनं छुं हे ज्या मन्ह्याःगु नं दु । नेवाःतय्गु म्हसीकाया पर्यावची जुयाच्वंगु संस्कृति व सांस्कृतिक गतिविधिं अनन्तकालय् छु लिच्वः लाकीगु खः ? च्यूताया विषय जुयाब्यूगु दु । थुगु दँय् जात्रा पर्व हनेगु मयायेवं मेगु दँय् नं छाय् हनेमाःगु धयागु न्ह्यसः नं थौंया आधुनिक समाजय् ब्वलनाच्वंपिं नेवाःतय्गु न्ह्यपुइ न्ह्यसः ब्वलने फु ।
नेवाःतय्गु मौलिक कला, संस्कृति व धार्मिक गतिविधि नेवाः म्हसीकाय मू आधार खः । तर थुगु दँया पाहाँचह्रे नखः व जात्रानिसें जनबहा द्यःया रथजात्रा, बुँगः द्यः जात्रा, बुद्ध जयन्ती थें जाःगु महत्वंजाःगु गतिविधि प्रभावित जूगु दु । सांस्कृतिककथं पिने खनेदुगु जात्रा नखः प्रभावित जूगु खनेदु थें थ्व जात्रा नखः हनेत यायेमाःगु विधि, मूल्य मान्यता, अभौतिक संस्कृति – इन्ट्यान्जिबल हेरिटेज समेत प्रभावित जुइगु नेवाः कला संस्कृतिया निंतिं सकरत्मक सन्देश मखु । अथे हे भोंत, पन्तिया झिंप्यसः दँ निसें न्ह्यानावनाच्वंगु जात्रा समेत हने मफूगु खँ पिदंगु दु ।
कोराेना ल्वय् गवले मदया वनी धयागु न्ह्यसः सकसिगुं निंतिं हाथ्या जुयाच्वंगु दु । छथ्व विज्ञमनूतय्सं थुकिया खोप व वासः तयार मजूतले निराकरणया संभावना मदु धयाच्वंगु दु । मेखेर थ्व ल्वचं बचे जुइत सामाजिकरूपं दुरीतयेमाःगु व थःपिं हे सर्तक जुया सरसफाइलय् ध्यान तयेमाःगु खँ वयाच्वंगु दु । थ्व हे निता खँयात ध्यानय् तयाः आःया लकडाउन नं चरणवद्ध यानाः ह्वालुकेमाःगु विज्ञतय्गु धापू दु । थुलिया हे चाकः दुने च्वनाः आः झीगु जात्रा, नखःचखः गुकथं हनेफइ धयागु सोचया विकास आवश्यक दु ।
कोराेना भाइरस कोभिद – १९ प्रभाव क्वचाइ, अले न्हापा थें हे सहजकथं जीवन पद्धति न्ह्याइ धयागु सोच दुने आः परिवर्तन जुइमाःगु आवश्यक नं दु । कोभिद – १९या प्रभावया कारणं मनूतय्गु जीवन पद्धतिया लिधंसा जुयाच्वंगु धार्मिक, सामाजिक व आर्थिक गतिविधि ह्यूपाः वइगु निश्चित खः । थुकिया सोच विचारया विकास नं आवश्यक दु ।
कोराेना भाइरसया सकरात्मक प्रभावयात बिचाः यायेगु खःसा आः थुकिं अनावश्यक खर्च, विलाशिता व भ्वासीपहःयात पनेत महत्वपूर्ण भूमिका म्हिती । मनूतय्सं थःपिनिगु जीवन यथार्थ व हैसियतया लिधंसाय् हनेत वाध्य जुइ । थुकिया निंतिं परिवर्तित सोचया आवश्यक जुइ । धाइगु नापं दु लः वं थाय् न्या वनेमफुत धाःसा न्याया जीवन संकटय् लाइ ।
