विश्वय् हे महामारीकथं कोरोनाभाइरस ल्वचं विश्वया हे राजनीतिइ तरंग हयाच्वंगु दु । विश्वय् हे हरेक धैथे देसं सरकारं कोरोना भाइरसया कारण क्यना अनैतिक लवः कायेगु पाखे पलाः न्ह्याकाच्वंगु दु । थ्व हे कारण कोरोना भाइरस छखें सुयांगु सुनियोजित प्रायोजन ला मखुला धयाथे तायावइ । कारोनाया कारण मनूत थः सुरक्षित जुइगु पाखे ध्यान बियाच्वंगु दु सा छुं नं कथंया राजनैतिक गतिविधिइ तुरुन्त हे धायेक लिच्वः वा प्रतिकृया वा विरोध तकं याये फयाच्वंगु अवस्था मदु । गनं मनू मुन धाःसा कोरोना सरे जुइ धकाः ग्याये माःगु अवस्था दु ।
विश्वया छुं छुं देयया उदाहरण स्वयेगु खःसा युरोपियन युनियनया छगू देय् हंगेरीया प्रधान मन्त्रीं थःत थःम्हं हे विशेषाधिकार काःगु दु । गुगु अधिकार प्रधान मन्त्रीं न्ह्यात्तले हे थःके तयातये दु । थुकीया अर्थ खः आ प्रधानमन्त्रीं थःम्हं न्ह्याःगु वा यःगु न्ह्यागुं निर्णय काःसां ज्यु तर वैत आः सुनानं पने फइ मखुत । अर्थात आ हंगेरी प्रजातन्त्र हे खारेज यायेधुंकुगु अवस्था दु । तर सुनां नं थुकी च्यूता तयाच्वंगु मदु । कोरोनाभाइरसया कारण सकसितं थःथःगु ज्यानया च्यूता जुयाच्वंगु दु । सुयातं मानवअधिकार, न्यायया बारे च्यूता दयाच्वंगु मदु । हंगकंगय् नं चीनं हंगकंगयात नियन्त्रणय् तयेगु निंतिं न्हूगु हे कानून पारित याःगु दु, थ्व हे कोरोनाभाइरसया त्वहलय् सुनानं विरोध याये फूगुमदु । अजरबैजानया सरकारं प्रतिपक्षयात कोरोनाभाइरसया मौकाय् जेलय् कुनाब्यूगु दु । जोर्डनय् नं सरकारं पत्रपत्रिका हे प्रतिवन्ध तयाब्यूगु दु कारण थुकीं कारोनाभाइरस सरे जुइ हँ तर आः तक्क थुगु खँ धाःसा बैज्ञानिक रूपं पुष्टि मजूनी की कोरोनाभाइरस भ्वँतं सरेजुइ । विश्वया ८४ मल्याक्क देशय् संकटकालया कानून लागू यानाच्वंगु दु । कोरोनाभाइरसया निंतिं छुं छुं याःगु ज्याखँ पाय्छि जु तर कोरोनाभाइरसया नामय् धाःसा अनैतिक लवः कयाः च्वंगु निश्कर्ष दु । थ्व विश्वया हे थौंकन्हेया ट्रेण्ड खः ।
कोरोनाभाइरसया हे त्वह तयाः आः नं नेपाल सरकारं गुथि विधेयक व न्हूगु शहर निर्माणया ज्याखँ न्ह्याकाच्वंगु दु। एमसिसिया खँ नं थुगु हे इलय् चर्चा कयाच्वंगु दु । तर झीसं थुगु विषयलय् छुं कथंया बिरोधया ज्याखँ यायेफयाच्वंगु मदु । गुथि विधयेकया आन्दोलनं दुई तिहाइया सत्ता हे मदैगु अवस्था ब्वलंगु खः । गैर न्यायीक सडक विस्तारया कारण बानेश्वरय् नं तधंगु ल्वापू हे जुल । थुगु ल्याखं कोरोना भाइरस लिसे झी दुने जक सतर्क जुइमाःगु मखुसे देय्या राजनीतिक अवस्थां गज्यागु मोड बिइत्यंगु दु धैगु खँय् नं झी सतर्क जुयाच्वने माःगु अवस्था दु ।
