निशार देसा म्येहालामि
गजल गायिकाया नापं आधुनिक, पप, लोकगीत, भजन, रोमान्टिक, सेन्टिमेन्टलया नापं सदाबहार म्ये हालेत ताः लाम्ह । नेपाःया संगीत ख्यलय् थःगु पलाः धिसिलाका न्ह्यावनाच्वम्ह म्ये हालामि निशा । थःत छगू हे बिधाया जक म्ये हालिम्ह म्ये हालामिया रूपय् थःगु लागा सिमित मयाःसें तःगु कथंया बिधा व सवाःया म्ये हालेत सफलम्ह गायिकाया रूपय् थःगु म्हसिका बियाच्वंगु दु । यलया चापागाउँ वडा नं ३ य् जन्म जूम्ह निशां मचाबलय् शिक्षा हिलटप बोर्डिंग स्कूलं शुरु यानाः बज्रवाराही माध्यामिक स्कूल धुंकाः प्रेरणा महिला स्कूलं एस एल सी पास यात । कलेज जीवन बागमती सामुदायिक कलेजय् प्लस टु क्वचाय्काः थौंकन्हे ललितकला क्याम्पसय् ब्याचलरया शिक्षा कयाच्वंगु दु । मचां निसें म्ये हालेगु व बाजंया तालय् थःत तंके यःम्ह मय्जुं थःगु छँया परिवारपिं संगीत ख्यलय् समर्पित जूगु खनाः थः नं उकिइ हे भ्यलेपुने यः ताय्कल । बाज्या, अबु व कका म्ये हाला जूगु खनाः मचानिसें हे उगु हे पलाख्वाँय्लय् थःगु पलाःया नं बां किइगु तातुनां संगीतनाप त्वाय्चिन । वि.सं २०५८ सालय् न्हापां संगीतया सारेगमप नाप भ्यले पुनेगु कुतलय् डोरेमी संगीत स्कूल जमलय् वनेगु यात । अनलिपा व हे सालय् नेपालभाषाया म्ये हाला थःगु गायन प्रतिभाया श्री गणेश यात । वि.सं २०६६ सालय् रेडियो नेपालया छगू ज्याझ्वलय् आधुनिक म्येया धेंधेंबल्लाकासाय् ब्वति कयाः न्हाप लाकल ।
गज्यागु भावया म्ये हाले बलय् छम्ह म्ये हालामिया नातां थःत अप्वः सन्तुष्टि दु ?
छम्ह म्ये हालामिया रूपय् संगीत ख्यलय् वये धुंकाः थज्यागु जक हे म्ये हाले धायेगु व म्ये हालामिं थःप्रति हे कम आंकलन यायेगु जुइ । उकिं जिं दक्वं कथंया सवाःया म्ये हालेगु यानाः तर अथे खयानं जितः छाय् थें मस्यू गजल तसकं हे यः । गजल हालेबलय् मनय् आपालं सन्तुष्टि दु ।
छु छु भाषाया म्ये हालेधुन ? सोलो एल्बम छु छु पिहाँ वल ?
नेपालभाषा, नेपाली, नेपाली फिल्म, आधुनिक, गजल, लोकगीत, भजन आदि म्ये हालावयाच्वनागु दु । ल्याःया हिसाबं स्वयेगु खःसा आः तक थ्यंमथ्यं ४०० पु म्ये रिकर्ड जुइधुंकल ।
आः तक न्यागू सोलो एल्बम पिहाँ वये धुंकल । वि.सं २०५८ सालंनिसें आः तक हालागु नेपालभाषाया म्ये मध्येय् जितः यःगु छं छुं म्ये दुथ्याकाः थःगु हे नां तयाः पिथनागु एल्बम निशा, अथेहे नेपालीभाषाया लोकार्पण, शराब, निशाआनन्द व अन्तरा याना जम्मा न्यागू पिहाँ वये धुंकल बजारय् । युट्युबय् आपालं म्येया म्युजिक भिडियो नं दु उकि नं स्वयादीफै ।
नेपाली वा नेपालभाषाया संगीतया क्षेत्रय् गजलया उलि विकास मजूगु छु जुया ?
खय्तला संगीतया क्षेत्रय् दक्वं कथंया म्येया थःगु हे महत्व दु । ई ब्यः व मनूतय्गु चाहना कथं नं म्येया विकास वा चर्चा छगू इलय् छगू हे कथंया जुयाच्वनिगु मानव स्वभावया प्रकृतिं व समयान्तरलिसें हिलाच्वनीगु स्वभाविक प्रकृया खः । उकिसनं गजलया बारे सः स्यूपिं च्वमिपिं व न्यनिगु स्तरया मनूतय् अभावं याना नं गजलया बिकास नेवाः ख्यलय् जक मखु नेपाली क्षेत्रय् नं मजूनिगु खत । भारतय् खःसा गजलया जानकारपिंया लिसें न्यनिपिं आपालं संगीतप्रेमीपिं दूगु जुल । उकिया हे प्रभावं झीथाय् नं हिन्दी गजल न्यनीपिं मनूत मदुगु ला मखु तर अथे खया नं गजल बिधा छगू विशेष प्रकारया विधा जुल । नियमबद्ध रूपय् च्वयेमाःगु अले उकियात लसय हनेगु नं थःगु हे स्वभाव दइगु जुल । उलि जक मखु हालिम्हेस्यां नं गजगया स्वरूप क्यनेगु कथं हालेफयेके माः । गजल छगू सैद्धान्तिक विषय खः । थ्व बारे न्यनामिंपिं नं उलि हे जानकार जुल धाःसा जक उकिया विकासया लिसें गजल न्यनेगु चाहना अप्वइगु जुल । चीहाकलं धायेगु खःसा च्वइम्ह, हालिम्ह व न्यनिम्ह स्वम्ह उलि हे जानकारपिं जुलधाःसा जक गजल म्येया सार्थकता दइगु जुल ।
छपू म्ये धात्थें बांलागु म्ये जुइत छु छु दयेमाः ?
म्ये धयागु न्हाय्पनं न्यनां नुगलय् दुहाँ वनिगु सेन्टिमेन्टन भावना खत । मनूतय्गु भाव व चाहनायात संयोजन यानाः च्वयातःगु म्ये बांलाइगु जुल । उकिं म्ये बांलाय्त दकलय् न्हापां म्येया खँग्वः हे स्येल्लायेमाः । गुकिं मनूतय्गु मनोभावयात न्यनेवं हे प्रभावित यायेगु आकर्षण दयेमाल । म्येया खँग्वः जक बांलाना नं मगाः, उकियात ल्वःगु संगीत जुइमाल । खँग्वःयात ल्वःगु कथंया बाजंयात छ्यलातःगु जुइमाल । अले म्येयात न्याय यायेफइगु म्ये हालामिया सः जुइमाल । थ्व स्वंगूया बांलागु संयोजन जुया पिहाँवःगु म्ये हे छपू धात्थें बांलागु म्ये जुइत सफल जुइगु खः । उकिं खँग्वः, संगीत व सःया महत्वपूर्ण स्वंगु पक्षया समिश्रण दयेमाः ।
संगीतया परिभाषा छु खः ?
मनूतय्गु स्वभाव कथं थुकियात परिभाषित यायेगु पहः पानाच्वनी । गुम्हेसितं संगीत मनय् आनन्दित याइगु पक्ष जुइसा गुम्हसितं दुःखया इलय् मन थातं तयाः मनयात झासुलनिगु दबू जुइफु । साधारण अर्थय् धाय्गु खःसा सारेगमप या रिदमया लिधँसाय् पिहाँवइगु रसया श्रवणयात संगीत धाइपिं नं दु । तर जिगु खँ ल्हायेगु खःसा संगीतयात जिं नं थ्व हे खः धकाः परिभाषित जि याये मसः । मात्र छगू शब्दं धायेगु खःसा संगीत जिगु जीवन खः ।
म्ये हाले न्हयः म्येयात गुकथं ल्ययेगु ?
छम्ह म्येहालामिया नातां म्ये सुना नं हालाब्यू धायेवं न्ह्यागु कथंया वा धाये म्येय् शब्दया चयन वा गुकथं च्वयातल छु भावया खः व हे मस्वसें स्वीकार यायेगु धइगु थःत थम्हं लखय् मिखा कंकेगु जुइ । उकिं छुं नं म्ये हालाब्यू धकाः थःत अफर वयेवं खँग्वः, भाव संगीतकारया लिसें व म्ये हालेबलय् जनमानसय् गज्यागु वर्गयात कःघाना तःगु दु वा प्रभावित याइ वा व म्ये सदाबहार जुइगु खः वा पलखःया नितिं जक बजार क्वाकिइगु खः व नं बिचाः यायेमाः ।
स्टुडियोलय् व दबली मध्येय् गन म्ये हाले अपू अले यः ?
छम्ह म्ये हालामिया नातां न्ह्याबलें दबली म्ये हालेगु ह्वता मदयाच्वने फु । तर म्ये दबली हालेत नं स्टुडियोलय् हे वना रेकर्ड यायेमाः । न्हापाया जमानाय् थें रिकर्ड मयासें हालेगु ई वर्तमान अवस्थाया मखुत उकिं स्टुडियो जिगु न्हापांगु प्राथमिकताय् लाइगु स्वभाविक खःसां अन रिकर्ड जुइधुंकूगु म्ये हे जिं दबली वना हालेगु खः । उकिं खँ यः मयः वा अपू थाकूया मखःसें निगूलिं दबू जितः अति हे यः । खः रिकर्ड यायेबलय् न्ह्यःने न्यनामिपिं दइमखु याकचा जुइ उकिं थः हे याकचा म्येया भावय् दुविना हालेमाः । तर दबलिइ सार्वजनिक रूपं हालेबलय् छगू अझ न्ह्यइपुगु व रोमान्चकतां जाःगु उर्जा पिज्वइ । छाय्कि अन जितः स्वयाच्वनिपिं व जिगु सः न्यनिपिं जिं प्रत्यक्ष रूपं साक्षात्कार याये खनि । इमिगु प्रतिक्रिया जिं म्ये हालावंलिसें इमिगु ख्वालं पिज्वःगु व ल्हाःया लापां जिं तप्यंक ग्रहण यायेखनि । गुकिंयाना जितः अझ उत्साहित याइसा जितः थःगु सूरपाखें तापाय्त वा मेमेगु खँ लुमंकेत अन छुं ई दइमखु । छम्ह म्ये हालामिया कथं दबूलिइ वने धुंकाः मात्र जिं सांगितिक माहौलयात कायम यानातयेगु बिचाः जक यायेगु खः । उकिं अपू थाकू वा यः मयःया सिबें जि दबली दंवनेबलय् सकसितं जिं म्ये हाला चिनातये फयेकेमाल । थ्व चुनौतिपूर्ण खँ खः ।
छु छु सम्मान काये धुन ?
थः बूगु थासय् जक मखु आपालं मेमेगु संस्थापाखें नं यक्व हे सम्मान बिइ धुंकल । अथेहे धेंधेंबल्ला कासाया खँ ल्हायेगु खःसा रेडियो नेपालया आधुनिक गायन प्रतियोगिताय् न्हाप, श्री पशुपतिनाथ संगीत कला प्रतिष्ठानय् ल्यू, श्याम मलेखु गुथि भजनय् न्हाप, मच्छेनारायण भजन मण्डलय् न्हाप व लुभू भजन मण्डलय् ल्यूया सिरपा काये धुनागु दु अथेहे लुमंके बहःगु झण्डै २६ गू सम्मानय् देशार समाजया सम्मानया लिसें छिन्नतला पुरस्कार, नारायण गोपाल पुरस्कार खःसा एफ एमपाखें इमेज अवार्ड ३ गू, कालिका एफ एम अवार्ड, विन्दबासिनी म्युजिक अवार्ड, सगरमाथा म्युजिक अवार्ड, व पावर न्यूज म्युजिक अवार्ड दुथ्याः ।
संगीतं इज्जत अप्वः बिल कि ध्यबा ?
खय्तला म्वायेत ध्यबा मदयेकं मगाः नापं संगीत ख्यलय् च्वना इज्जत नं कमयेयाये सयेकेमाः, फयेकेमाः । धात्थें धायेगु खःसा जितः संगीतं जिं यानागु मिहेनत, धैर्यताया प्रतिफलं इज्जतया नापं ध्यबा नं वयाच्वंगु दु । गुलिखय् मनूत संगीतया ख्यलय् थःत समर्पित यानाच्वंपिं दु तर सकसितं अवसर चू मलायेयः तर जितः वरिष्ठ, समकालिनया लिसें कनिष्ठपिं नाप तक ज्या यायेगु अवसर चू लात । गुकिया श्रेय जिं थुगु अवस्थाय् तक थ्यंकेत प्रत्यक्ष वा अप्रत्यक्ष जितः साथ बियाः हौसलाया नापं अवसर बिउपिं सकसितं सुभाय् मधाःसें मगाः । जि सदां वय्कःपिं प्रति नमन व आभार व्यक्त यानाच्वना ।
स्मूलय् म्ये हालिपिन्त छुं सुझाव ?
संगीतया शिक्षा कायेवं दक्वं ता लाइ मखुथें संगीतया शिक्षा बिना नं बांलाक म्ये हालेगु क्षमता दुपिं दु । थुगसिइ जूगु इन्दियन आइदलया सन्नी हिन्दुस्तानी थुकिया ज्वलन्त दसू खः । तर वं याःगु मिहेनत व धैर्यतायात नं झीसँ दुनुगःया मिखां वाः चायेकेमाः । थौंकन्हे सामाजिक संजालय् स्मूलय् म्ये हालिपिनिगु लहर वयाच्वंगु इलय् व्यलय् खनाः । आकलझुकल न्यना । तर वय्कःपिन्त जिं थुलि हे सुझाव बिइ संगीत सुयां नितिं पलखया न्ह्इपुकेगु साधन मखु । थ्व साधना खः । यदि सुयां म्ये हालेगुलिइ तसकं मन दुसा संगीत सयेके माल । संगीतया शिक्षा काये मफुपिन्सं नं न्हापां थःगु छेँय् च्वना वा पासापिं दथुइ जक हे म्ये हाला सां रहर पुरा याये ला ज्यू तर सूर न तालय् रहरं टय्कय् म्ये हालेगु व उकियात सामाजिक संजालय् अपलोड मयाःसा बांलाइ ।
