रोजी श्रेष्ठ म्येहालामि
मस्यू जितः छु जु छु जु धा धां दबुलिइ दँ वइम्ह म्ये हालामि खः रोजी श्रेष्ठ । म्हुतुसिइ न्हिलासुलं भय्बिइकाः माहौलयात संगीतमय यायेत सफलम्ह म्ये हालामि । वि.सं २०७४ आश्विन २९ गते न्हापांगु नेपालभाषाया सोलो म्येचाः यच्चुगु सर्गः या सांगितिक देछा ज्वना सकल नेपाःमिया न्ह्यःने दं वम्ह । रेयुकाईया छगू ज्याझ्वलय् सार्वजनिक रूपं हे म्येहाला थःगु प्रतिभा क्यनेत सफल जुल । उवलय् वय्कः ८ कक्षाय् ब्वनाच्वंगु खः । लिधँसा बिइपिं व हपाः बिइपिं सुं मदयाः थःगु इच्छा म्ये हालेगु पाखें द्यापं तयेमाल । अय्नं संगीत व म्यानेजमेन्टय् स्नातक तक शिक्षा कायेगु इलय् तक गन छिं अन थःगु प्रतिभा क्यनेत सदां पलाः न्ह्यज्याना हे च्वन । वि.सं २०७३ सालय् दकलय् न्हापांगु खुसिइ नेपाली भाषाया म्ये आनन्द अधिकारीया शब्द व आनन्द राईया संगीतय् कति लिन्छौ मेरो मात्र परिक्षा नांया म्ये रेकर्ड जुल, गुगु भूषण दाहालया निर्देशनय् म्युजिक भिडियो तकं छायाँकन जुल ।
छन्हु वरिष्ठ फोटोग्राफर राजभाइ सुवालजुं नेपालभाषाया संगीतय् नं ध्यान ब्यूसा बांलाइ धैगु सुझावयात मनन यानाः पूर्णकाजी ज्यापूया एकल रचना व जुगोल डंगोलया संगीतय् यच्चुगु सर्गः म्येचा पाखें थःगु पलाः धिसिलाक तयेत म्येचाः ज्वना २०७३ आश्विन २९ गते नेपाल पर्यटन बोर्डय् सकलनाप भ्यलेपुनेत वल । थननिसें हे मचाबलय्या प्रस्फुटन जुुइमफुगु संगीतप्रतिया मोह व नेवाः ख्यलय् म्ये हालामि कथं थःगु म्हसिका न्ह्यब्वयेगुया लँपु चुलाकल । अनलिपा लिफ स्वयेम्वल ।
दिन गथे याना न्ह्यानाच्वन ?
छेँय् परिवारय् सकसितं स्वयेगुया लिसें संगीत व म्युजिकय् मास्टर्ड यानाच्वना । उकिं आःयात छेँ व कलेजय् सिमिति धायेमाल । गबलें गबलें सुनां ज्याझ्वलय् आमन्त्रण याःसा वना म्ये हालेगु ।
संगीतं नयेत्वनेत गुहाली यानाच्वंगु दु ला ?
न्हापांनिसेंया म्ये हालेगु व म्येया बारे अझ दुग्यंक ज्ञान कायेगुलिइ हे ई फुनाच्वंगु दु । उकिं न्हापां थःगु पलाः छक नी धिसिलाक्क चुइगु कुतः जुयाच्वन । नयेत्वनेगु हे खँ ल्हायेगु खःसा शायद हे नेवाःख्यलय् संगीतया क्षेत्रय् म्ये हाला नयेखंपिं म्हो हे जक दु जुइ दुसां । म्येहालामिया लिसें अन्य कलाकारया जिम्मा सरकारया नं खः कलाकार देशया तिसा धाःइ तर तिसा ब्वयेत जक जुयाच्वन उकिया गुणयात मिइगु थाय्या विकल्प सरकारं याःसा बांला ।
न्हिच्छिया गुलि घण्टा रियाज याना ?
ई चुलाके फःसा न्हि न्हि २।३ घण्टा रियाज यायेगु याना । रियाजं थःगु सःयात थःगु बशय् तयेत अपुकिगु जुगुलिं रियाज त्वफिके मज्यु ।
गज्यागु भावं जाःगु म्ये हालेबलय् थःत मज्जा वः ?
अथेला म्येया भाव गूंगु रसं जाःगु हे दु । तर छम्ह कलाकारं दक्वं रस व भावया म्येय् थःत तंकाः हाले फयेकेमाः । न्ह्याथें जाःगु म्येयात नं थःगु स्केल कथं एरेन्ज जूगु जुल धाःसा झन हे अपुइगु व म्ये हालेबलय् न्ह्यइपुसे च्वनीगु जुल ।
ज्वः म्ये हालाबलय् वा रिकर्डिंग यानाबलय्या छुं अनुभव
याकः म्ये हाले बलय् थःगु सःया रेन्ज जक स्वःसां गाः तर ज्वः म्ये हालेबलय् निम्हसिगु सःया लेबल उथें जुइक हालेमाः । जितः ला दकलय् मदनकृष्ण श्रेष्ठ दाइनाप म्ये हालेबलय् तसकं न्ह्यइपु व याउँसे च्वं । वय्कलं म्ये हालिबलय्या पहः व थःत म्येया बोल कथं हे सलय् याइगु उतारचढाव व भाव खनिबलय् थःके नं न्हूगु उत्साह उमंगया लिसें जोश वः । अथेहे सानुबाबु नाप नं तसकं म्ये हाले अपू । वय्कःया बोल्ड भ्वाइस तसकं बांला । वय्कलं नं म्ये हालेबलय् थःत खुल्ला रूपं न्ह्यब्वयादी गुकिंयाना जितः नं अपू सा वय्कःपिं पाखें यक्वः सयेकेगु ह्वता चूलात ।
छुं नं म्ये रिकर्डिंग यायेत स्टुडियो वने न्ह्यःया तयारी
दकलय् न्हापां ला म्ये हालेगु दिं स्वया थःगु सःयात तयारी अवस्थाय् तयेमाल मतलब उसाँय्यात च्यूता तयेमाल । अन लिपा म्येया भावयात दुग्यंक थुइकेमाल । म्यें छु धायेत्यंगु दु व हे कथं सःयात उगु भावय् यंकेगु कुतः जुइ । जिं गुगु म्ये हालेत्यना व म्येय् थःगु सलं न्याये यायेफयेमाः धकाः मतिइ तयाः हालेगु कुतः यायेगु ।
छुं नं म्येया छनौट गुकथं यायेगु
दकलय् न्हापां ला म्येया शब्दयात स्वयेगु । उकिं छुं भाव क्यनेत स्वयाच्वन लिसें उकिया प्रभाव समाजय् गुकथं व छु वर्गयात नुगलय् थी व स्वयेगु । खय्तला म्ये धइगु म्ये च्वमिया मनय् वःगु भावयात च्वइगु जुल । तर अथे खःसां जिं म्ये शब्दया गहिराइयात हे महत्व बियाः । म्ये ल्ययेबलय् थःम्ह हालेफइ वा मफइ धइगु नं बिचाः यानाः । व म्येया स्केल नाप थः वनेफु मफु नं स्वयेमाल । म्ये अज्यागु जुइमाल गुकिं छुं वर्गयात न्ह्याइपुकिगु वा सन्देशयुक्त जुया सकरात्मक बिइगु जुइ । खालि हालेमाः धकाः न्ह्याथें जाःगु म्ये हालेगु मयाना ।
स्टुडियोलय् रिकर्डिंग जुइधुंकाःया म्ये व सार्वजनिक दबलिइ हाले धुंकाः व हे म्ये न्यनेबलय् छु पाःगु खंका
जि छुं इलय् जनताया म्ये हाला सार्वजनिक रूपय् म्ये हालावयाम्ह खः । उकिं जिके व ईया अभ्यासया गाक्कं अनुभव नं दु । थौंकन्हे रिकर्डिंग स्टुडियोलय् म्ये हालेबलय् रिटेक यानाच्वने दु चित्तबुझे मजूतले । तर दबली वा सार्वजनिक थासय् व मौका दइमखु । गथे हाल अथे हे न्यनीगु जुल । उकिं दर्शकपिन्त ध्यानय् तयाः फयांफत्तले अभ्यास यानावनेगु खः । अथे खयानं गबलें साउण्ड सिस्टमया गडबडींयानाः म्ये हालेबलय् फ्यासुइगु अनुभव नं मयानागु मखु । व हे रिकर्ड हाकनं छेँय् न्यनेबलय् थःत हे नं गनंगनं चित्तबुझे मजूगु अनुभव दु । थुकिंयानाः थःम्ह अझ सशक्त रूपं अभ्यास यायेमानिगु बिचाः क्वातुइ ।
सकसिनं छित मेपिन्त लय्ताय्का म्ये ल्हाते काये सःम्ह कलाकार धाइ नी खः ला ?
मनूतय्गु मन व म्हुतुयात झीसँ गबलें प्वाः चिइफइमखु । थुकिया नितिं थुलि हे धाये फुलको आँखामा फुलै संसार काँडाको आँखामा काँडै संसार ।
नेपाःया सु सु गायक वा गायिका पाखें प्रभावित
अथेला जितः यःपिं आपालं दु तर विशेष जि प्रभावित धयागु नारायण गोपाल, अरूण थापा, तारादेवी व अरूणा लामापाखें खः । वय्कःपिनिगु म्ये न्यनेबलय् थःहे झुमिं वं थें अनुभव जु । वय्कःपिन्सं हरेक शब्दया मर्मयात थुइका हालिगु पहः जितः तसकं यः ।
संगीत क्षेत्रय् च्वना नं परिवारप्रति जिम्मेवारी पूवंके गुलि अपू वा थाकू
संगीत क्षेत्रय् मिहेनत मयासें सुयातं लय्तायेका जक म्ये हालेगु धयागु हे ह्याउँमचा खँ जुइ । हाल हे धाःसां छपू हाली अले गन वं गन वं जुइक तनि । धाये त्यनागु छु धाःसां मिहेनत यक्वः माः । ई यक्व बिइमाः । अथेहे छम्ह मिसा उकिसनं इहिपा यायेधुनकि जिम्मेवारी दइगुु स्वभाविक हे खत । तर छम्ह मिसां ईयात व्यवस्थित यायेत सक्षम जू । अले यानाच्वंगु नं दु । उकथं हे जिं नं यानाच्वनागु दु । परिवारं नं साथ बियाच्वंगु दुसा दकलय् अप्वः हपाः तिबः लिधँसा जि श्रीमान् बियाच्वंगु दु गुकिंयाना जितः तसकं हे नितां जिम्मेवारी पूवंकेत अपूगु दु ।
दबलिइ म्ये आःपा हालाच्वंगु दु पारिश्रमिक दु ला ?
झीगु नेवाः ख्यलय्या जक खँ ल्हायेगु खःसा म्ये हालिपिन्त नं ध्यबा बिइमाः धइगु सोचया धारणा आः बुलुहुँ वःगु दु । थ्व सकरात्मक खँ खः । अथे खयानं ज्याझ्वः स्वया अले ज्याझ्वः ग्वसाः ग्वइपिन्सं छु प्रयोजनय् जितः म्ये हायेकिगु खः उकिइ नं भर परेजुइ । सामाजिक गुहालिया ज्याया नितिं सःतिबलय् ला गनं ध्यबा दइ । गनं दइमखु । ब्यू धकाः हे मधाया । थुलि हे मां नं मधाया । बिउसा गुलि बिल उलि सुम्क कयाहया ।
म्युजिक भिडियो थौंया आवश्यक हे खः ला ?
खय्तला म्ये धयागु न्यनेगु जक हे खः । तर वर्तमान अवस्थाय् छुं नं म्ये दर्शकदीघाय् याकनं थ्यंकेगु खःसा उकिया म्युजिक भिडियो दयेके हे माःगु अपरिहार्य हे जुइधुंकल । जिं नं जिगु न्हूगु म्येचाः यच्चुगु सर्गया विमोचनया झ्वलय् छपू म्ये मस्यू जितः छु जु छु जुया नं प्रिमियर यानागु खः । थौंकन्हे मनूतय्गु चाहना म्ये न्यनेगु जक मखु म्येयात स्वयेगु कथं नं कायेधुंकूगु दु । उकिं नं म्युजिक भिडियो अनिवार्य हे जुयावंगु खः ।
न्हूगु म्ये वा एल्बम वा मेपिनिगु नितिं हालागु म्ये छुं पिहाँ वयेत्यंगु दु ला ?
याकनं हे न्हूगु म्युजिक भिडियो ज्वना स्वकुमिपिन्त देछायेगु बिचाः दु । उकिया नितिं ज्या जुयाच्वंगु दु । नापनापं न्हूगु म्ये नेपालभाषा व नेपालीभाषाया नं याकनं हे एल्बम पिहाँ वयेत्यंगु दु ।
