संगीता शाक्य (थापा) म्ये हालामि
‘भैगो अब खेल्दिन साथी भोक पनि लाग्यो म त जान्छु खाजा खान्छु पाउरोटी कृष्ण पाउरोटी’ थ्व विज्ञापन लोमंपिं शायद हे सुं दइ जुइ । उबलय् रेडियो नेपालय् तसकं थ्वइगु विज्ञापन खः थ्व । उबलय् टि भी मदुनि उकिं सः जक न्यने खं सकसिनं । मचा सलय् नं तसकं नासलं लिउगु सः । खः व हे सःया धनी बालकलाकार संगीता थापा । थौंकन्हे वय्कःयात वरिष्ठ म्ये हालामि संगीता थापा शाक्यया नामं झीसँ म्हसिका च्वना । वि. सं २०३० सालय् न्हापांगु मचाम्ये ‘म्याउ म्याउ बिरालो’ म्ये हालाः थःगु गायन यात्रा शुरु यानादीम्ह वय्कलं नेपालभाषाया ‘न्हिला न्हिला हुँ‘ ‘याकःम्ह्याय्’ ‘चरित्र’ संकिपातय् म्ये हालादीगु दु । अथेहे ‘गौथली’ गीति संकिपातय् १६ पु म्येय् हे थःगु सः बियादीगु दुसा नेपाली संकिपा ‘अरूणिमा’, ‘जीवनसाथी’ नं म्ये हालादिल । थी थी विज्ञापनय् थःगु सः भ्वाइस ओभर यानादीगु दुःसा आपालं स्रष्टापिनिगु म्ये हाला एकल कार्यक्रम यानादीगु दु । वि.सं २०७३ सालय् नेपाल प्रज्ञा प्रतिष्ठानय् सुनां मयाःकथं न्हापांगु एकल ज्ञानमाला भजन हालादीगु दु । सांगीतिक यात्राय् वय्कलं मचा म्ये, भक्ति संगीत, लोकम्ये, देशभक्ति म्ये, नेपालभाषाया म्येया नापं गीत गजल, नेपाली संकिपाया म्ये व मेमेगु विघकय् सः बिइ धुंकूगु दु । भजनय् वय्कःया आः तकं नं उलि हे लोकप्रिय म्ये ‘विश्वया शान्ति यायेत झाःम्ह झी बुद्ध भगवान’ खः । वय्कलं म्ये हालेगुया लिसें नृत्य, अभिनय, वाद्यवादनया नं तालिम कयातःगु दु । सम्मानया खँ ल्हायेगु खःसा रेडियो नेपालय् जूगु मचा म्ये धेंधेंबल्लाकासाय् वि.सं २०३०,२०३१ व २०३२ सालय् न्हाप सिरपा, २०३१ सालय् हे अधिराज्यव्यापी मचाम्ये धेंधेंबल्लाकासाय् नं न्हाप सिरपा काल । अनलिपा २०६२ सालय् छिन्नलता गीत पुरस्कार, २०६६ सालय् नारायण गोपाल युवा संगीत पुरस्कार, नेपालभाषा पिपल्स च्वाइस अवार्ड ११३०, २०६९ सालय् नातीकाजी संगीत पुरस्कार, २०७१ सालय् केशु भजन गुथि पाखें विशेष सम्मान व २०७२ सालय् बज्र फाउण्डेशनपाखें बज्र स्वर सामग्रीं सम्मानित जुइ धुंकल ।
संगीत व संगीतायात पर्यावाची धाःसां छुं पाइ ला ?
संगीत व संगीताया म्हसिका व्यागलं दु । अथे खयानं मांया प्वाथंनिसें हे संगीतया धून न्यना ब्वलन जि । छेँय् संगीतया माहौलय् जन्म जूगुलिं नं जुइफु जिगु नां संगीता धकाः बा मां नं नां तयाबिल । मचाबलय् संगीतया तालय् हे जि ल्ह्य् सल जुइ, जिगु हरेक सासःया ढुकढुकीइ संगीत ही जुया न्ह्यानाच्वन जुइ । उकिसन थःगु जीवन हे आः तकं संगीतया क्षेत्रय् समर्पित यानागुलिं जितः थुइकीपिन्सं थुकथं थुइका काइगु खइ ।
न्हापांगु म्ये ग्वदँ दुबलय् हालागु, गन ? अनुभव ?
थःगु छेँय् हे जिमि बा स्व. उस्ताद भैरव बहादुर थापां (रेडियो नेपाल स्थापना यायेगुलिइ योगदान बियादिइम्ह) प्रेमध्वज प्रधान, तारादेवीया लिसें मेमेपिं व्यक्तित्वपिन्त म्ये हालेगु स्यनादी, म्येय् संगीत तयाच्वना दी । थुकिंयानाः म्ये हालेगुलिइ मचाय्कं नुगः क्वसाःगुया लिसें तता शान्ति मास्के व जि नं म्ये हालेगु सयेकाच्वना । जि खुदँ दूगु इलय् न्हापां रेडियो नेपालय् वना मचा म्ये हालागु खः ‘म्याउ म्याउ विरालो’ बोलया म्ये । उबलय् आः थें ट्राय्कय् म्ये हालेगु सिस्टम मदु । छम्हसिगु गल्तीं नं हाकनं शुरुंनिसें म्ये हालेमाः तर जिं निक्वःगु टेकय् हे म्ये हाला । अन लिपा मेमेगु म्ये हालेगु झ्वलय् मचा म्ये ‘पुतली यो पुतली मेरी सानी पुतली’ म्ये धाःसा हिट हे जुल गुकिं जिगु सःयात सकसिन लुमंकातल ।
संगीत साधकया रूपय् समर्पित जुइफुगु छिगु गज्यागु साधना खः ?
थःके दूगु धैर्यता, लगनशिलता, आत्मविश्वास व दृढ इच्छाशक्ति हे दकलय् तःधंगु साधना खः जिं स्वये । जब सुं मनुखं थःगु ज्याय् एकचित्त जुयाः थःत उकिइ हे पूर्ण रूपं समर्पित याइ वयागु नितिं मेगु अलमल जुइगु लँपु दयाच्वनी मखु । गुकिं यानाः वयागु मन व तनं छगू हे जक लँपु खनी गुकिइ निरन्तर साधानायाना लक्ष्यया नितिं न्ह्यानाच्वनी । जिं नं मात्र थःगु जीवनय् संगीत बाहेक मेगु लँपुइ मिखा मतया । उकिं जिगु सम्पूर्ण ई हे संगीतया साधना जुयाबिल । नापनापं मां सरस्वतीया, गुरुवर्गया आशिर्वाद व न्यनामिपिनिगु मतिना व च्यूताया कारणं जिके अझ थःगु लक्ष्य थ्यंकेमाः धैगु जिम्मेवारीपनयात शक्तिया रूपय् कयाच्वना । व हे शक्तियात साधना रूपय् न्ह्याकाच्वना ।
छु छु भाषाया म्ये हाला दी धुन ?
आः तकया ल्याः स्वयेगु खःसा ९०० पु म्ये थ्यन जुइ । भाषाया हे खँ ल्हायेगु खःसा नेपालभाषा, नेपाली, बंगाली, जापानी, भोजपुरी, मैथली, लोकभाषा आदि इत्यादी खः ।
म्येया छनौट यायेगु छुं विशेष पहः ?
छम्ह म्ये हालामिया नातां म्येया छनौट यायेगु धइगु हे शब्दया मां हनायात स्वयेगु खः । अनलिपा गज्यागु भावया म्ये, गुगु वर्गयात लक्षित यानातःगु व समाजय् उगु म्ये सुयात गुकथं प्रभावित याइ उकिइ ध्यान बिइगु खः ।
म्ये हाला बलय्या छुं लुमंके बहःगु अनुभव ?
अज्यागु अनुभव ला यक्व हे दु । सु सु नापया नी लुमंके । अथे खयानं धाये हे माल धाःसा जि मचाबलय्या छगू लुमन्ति धाय् होलिया मेला मय्जु्र मस्यूला नेपालभाषाया म्ये भृगुराम श्रेष्ठलिसें हालागु ई तसकं न्ह्यइपुसे च्वन । अथे हे मेमेपिं अग्रज म्ये हालामिपिं नाप नं यक्व हे न्ह्यइपुगु अनुभव दु थन धयां साध्य हे मजू । अले मेगु छगू तसकं हे लुमंके बहःगु व यःगु पल धयागु जि ११ दँ दूगु इलय् वि.सं २०३४ सालय् रेडियो नेपालया २७ औं जन्म जयन्तीया अवसरय् आधुनिक म्येया धेंधेंबल्ला कासाय् न्हाप लाःगु व जिमि बा उस्ताद भैरव बहादुर थापा नं संगीतय् न्हाप लाःगु पल लोमंके हे मफूगु अनुभूति जुयाबिल ।
न्हिच्छिया गुलि ई रियाज याना दिया ?
छम्ह म्ये हालामिं थःगु सःयात निखारे यायेगु खःसा रियाज मयासें हे मगाः । उकिं न्हिच्छिया ३।४ घण्टा रियाज यायेगु याना । थथे यात धाःसा सःयात थःगु बसय् तये फइ । अले म्ये हाले बलय् नं थःत हाइ वा लो रेन्जय् हालेबलय् तसकं अपुइ ।
क्यान्सरया ल्वचं ता ई तक म्ये हालेगु पाखें तापाय् माःबलय् संगीतयात गुकथं लुमंका दिया ?
थःगु जीवन हे संगीतयात समर्पित यानाच्वनाम्ह जिं बिचाः मयाना कथं ल्वचं कः बलय् दुःख जुइगु स्वभाविक हे खत । तर अज्यागु इलय् नं जिं जीवनया आधार संगीत हे खःसा थ्व हे आधारयात क्वातुक्क ज्वना जिं थःगु आत्मविश्वासयात कायम यायेमाः धइगु बिचाः अझ स्यल्लात । जि मफया अस्पतालया बेडय् च्वना नं हेडफोन तया म्ये न्यनेगु यायेगु । धाइ नी मनूत दुःख वा सुखया इलय् अझ म्ये नाप झन सतिइ, म्येया प्रत्येक खँग्वःनाप झन भ्यलेपुनी । यदि संगीतया साथ मदुगु खःसा संगीताया साहस त्वफिइगु खइ । तर संगीत जिगु जीवनया आधार व जीवनया अभिन्न अंग हे जुल उकिं जिं जिगु व दुःख व स्याःचाःया इलय् तकं थःनाप ब्यागलं मतया । उकिं जितः नं संगीतं हानं दनेत साथ बिल ।
संगीतया क्षेत्रय् दकलय् अप्वः सुयागु सः पाखें प्रभावित ?
मचानिसें बलिउडया लता मंगेशकरया म्ये रेडियोय् न्यना वयाम्ह जि । उकिं वय्कःया सः व म्ये हालेगु पहः पाखें तसकं हे प्रभावित जि । वय्कलं हालातःगु म्ये न्यने बलय् जिं नं उकथं हे म्ये हाले दःसा गुलि ज्यु धकाः मनय् जुइगु जितः ।
मेपिन्सं हाःगु म्ये थःम्ह थःगु सलय् हाले दःसा ज्यु धइगु बिचाः वं ला थें ?
म्ये न्यनेबलय् बांलागु जुल कि आहा बांला धकाः धायेगु ला मनूतय्गु स्वभाव हे जुल । तर सुना नं हाःगु म्ये जिं ईष्या भावं गबलें नं थम्ह हाले दुसा ज्यु धकाः बिचाः न्हापा नं मवः आः नं मयाना । बरु थःम्ह हालेमाःगु म्येयात हे थःम्ह गन तक फु अन तक बांलाक शब्दया गहिराइलय् दुबिना शब्दया भावयात ल्वः कथंया सः बिया म्ये हालेगुु कुतः धाःसा न्ह्याबलें नं याना ।
संगीतया क्षेत्रय् पलाः न्ह्याःगु न्यागू दशक थ्यनीनं, व झ्वलय् आरोह अवरोह गज्यागु जुल ?
मचांनिसें छेँया माहौल व बा मां निम्ह म्ये हालापिनिगु संगतय् मचा ई फुत । बा (उस्ताद भैरव बहादुर थापा)या कारणं हे रेडियो नेपालय् याउँक म्ये रिकर्ड याये खन । मचानिसें हे संगीतया क्षेत्रय् यक्व सफलता कायेखन । तर जब बाया दिवंगत जुल उबलय् जिगु लिधँसा हे त्वफिउगु थें जुल । आः सांगीतिक यात्रा गुकथं न्ह्याःवनी धइगु मनय् ग्याः चिकुं भुन । उबलय् मां धिसिलाःगु पःखा जुया लिधँसा बिल । अनलिपा शाक्य परिवारय् जिगु इहिपा जुल । अले जिं जिगु सांगितिक क्षेत्रपाखें बाय् मालिगु जुइ धकाः झन हे मन दुखी जुल । तर जिमि श्रीमानया छेँय् नं ससअबु ज्ञानमाला भजन खलःनाप सतिना म्ये हालेगुलिइ नुगः क्वसाम्ह जुबलय् जितः श्रीमान्या छेँय् नं हःपाया लिसें गुहाली हे यात । जिगु सांगीतिक यात्रा न्ह्याना हे च्वन । म्वायेगु झ्वलय् सदां ई छगू हे कथं जुइमखु धइगु सिइकाः न्ह्या वन धाःसा साथ व सहारा बिइपिं नं म्हो मजू । मात्र थःगु लँपु पाखें विमुख जुइ मजिल । उकिं हे जुइ बां मदुसां बाया पासापिं व उगु इलय् बा नं स्यनातःपिं अग्रज कलाकारपिन्सं हौसला व माया बिया जितः थुगु सांगितिक यात्राय् न्ह्याः वनेत हःपाः हे बियाच्वन । जिं नं थःम्ह यायेमाःगु जिगु कर्म पू वंका हे संगीतया क्षेत्रय् न्ह्याना च्वनागु दु ।
संगीत साधना बाहेक मेगु छुं ?
खास हे संगीत साधना बाहेक मेगु ला छुं ज्याय् तक्यनागु मदु । बरु थःम्ह नं छुं छुं म्ये च्वयेगु व संगीत तयेगु यानाच्वनागु दु । इलय् व्यलय् थःगु चाहना पूवंकेत हिन्दी टयकय् थःत यःगु म्ये हालेगु अले फेसबुकय् नं अपलोड यायेगु याना । नापं थःम्ह सःगु संगीतयात मेपिन्त नं स्यनेकने यानाच्वनागु दु ।
थःम्ह हालागु म्येयात एल्बमया रूपय् पिथनागु दु ला कि ?
एल्बम ला ७ गू आधुनिक व भजनया याना पिकाये धुन । आः नेपालभाषा, नेपाली आधुनिक व पुलांगु भजनत कलेक्सन यानाः पिकायेगु तयारी यानाच्वनागु दु ।
छुं नं म्ये हालेत तयारी गुकथं यानादी ?
छुं नं म्ये हालेत तयारी धयागु ला याये हे माः । थःगु छेँय् दुने हालेगु म्ये मखु गुकिया प्रतिक्रिया थः यत्थें बिइज्यू । चाहे स्टुडियोलय् जुइमाः चाहे सार्वजनिक दबलिइ जुइमाः म्ये हालेत वनेबलय् गाक्कं तयारी यायेमाः । थःगु सःया रेन्जयात थासय् तयेमाल । अले म्ये ग्वः लुमंकेमाल । फयांफत्तले भ्वंतय् मस्वसे म्ये हालेमाः सार्वजनिक थासय् म्ये हालेबलय् । स्टुडियोलय् ला म्ये ग्वः न्ह्यःने स्टायण्डय् दइ । स्यंसा हाकनं रिटेक यायेज्यू । तर विशेष ध्यान दबुली म्ये हालेबलय् तयेमाः । न्हापा जिगु याकः सनिल जूगु इलय्ला झन छवाः न्ह्यःनिसें सकलें म्युजिसियनत नापं च्वना हे प्राक्टिस तकं यानागु अनुभव दु जिके ।
सांगीतिक क्षेत्रय् म्ये हालिपिन्त पारिश्रमिक मदु धाइ थुकिइ छिगू धापू ?
न्हापा ला म्ये हालिपिन्त ध्यबा बिइमाः चलन हे मदु धाःसां ज्यू । लिपा बुलुहुँ म्ये हालिपिन्त नं पारिश्रमिक बिइमाः धैगु मानसिकता दयावन । आः ला बियाच्वंगु नं दु । न्हापा रिकर्डिंगया इलय् गुलि बिल उलि सन्तुष्ट जुया कायेगु खः । तर वर्तमान अवस्थाय् म्येया नितिं धाइबलय् हे गुलि पारिश्रमिक कायेगु धकाः न्यनेगु यानाहःगु दु । थ्व जिपिं थें म्येय् हे समर्पित जुयाच्वंपिनिगु नितिं सुखद क्षण खः । पारिश्रमिक कायेबलय् नं म्ये स्वया कायेगु याना जिं । न्हापाया स्वया आः म्येहालिपिं नं यक्व हे व्यवसायिक रूपं वयाच्वंगुलिं नं पारिश्रमिक कायेगु उचित हे खः । न्हापांनिसें गुलि बिल ला याद मन्त तर गुबलें निसें जितः लुमन म्ये हालाया ध्यबा ३० तका खः ।
स्मूलय् म्ये हालाजुइपिन्त छु सुझाव बियादी ?
थौंकन्हेया युग आधुनिक युग । जिमिगु पालय् थें म्ये हालेत स्टुडियोलय् वना हे हालेमाःगु अवस्था मदु । थौंकन्हे ला झन स्मूलय् म्ये हालेगु चलन वयाच्वंगु दु । तर दूगु सुविधायात खःगु कथं छ्यल धाःसा जक बांलाइ । म्ये हालेगु रहर सकसियां दयेफु तर म्ये हालेत नं रियाज माल । सुर तालया ज्ञान ब्वना मखुसां न्यनासां दयेकेमाः । सुविधा द,ु बियातल धायेवं यःयःथे म्ये हाला फेसबुकय् अपलोड यानाच्वंगु नं खना गुगु बांलागु खँ पक्कां हे मखु । वय्कःपिन्सं बेसुरं म्ये हालिगु कारणं यानाः सःपिन्सं स्मूलय् हालातःगु म्ये तकं न्यनेगु मयाना धकाः धाःपिं नं यक्व हे दु । उकिं वय्कःपिन्त हालेगु चाहना दुसा बांलाक प्राक्टिसयाना हे जक हालेगु व अन लिपा तिनि फेसबुकय् अपलोड यायेत सुझाव बिइ जिं ।
छितः म्येहालामि कथं म्हसिका च्वंपिं मतिनामिपिन्त छुं सन्देश बियादी ?
दकलय् न्हापां ला जि अग्रजपिन्त सुभाय् जितः थुगु ई तक साथ बिया हौसला बियाच्वनादीगुलिं । अनलिपा जि मफुबलय् जिगु नितिं दुनुगलं भिं उसाँयया नितिं प्राथाना यानादीपिन्त व जितः फू चाःगु गुहालि यानादिपिन्त सुभाय् । अथेहे न्हूपिं म्येहालामिपिन्त छता हे धाये संगीत क्षेत्रय् पलाः तयेगु खःसा शौखया रूपय् मखु संगीतयात साधनाया रूपय् काये सयेकी । अग्रज गुरुया सम्मान व आशिर्वादया कदर याये सयेकी । गुरु व सहृदयी पासापिनिगु सुझावयात मनन याना वन कि हे जक थःगु आज्जुइ याउँक थ्यनी । अथेहे हे जिगु सःयात मतिना याना जितः न्यनाब्यूपिं अल्याख न्यनामिपिन्त आपालं सुभाय् वइगु दिनय् नं मतिना बियाच्वनीगु भलसा कयाच्वना ।
