गरीवी हे फसादया जड
औसत मनुखं तायेकी की ध्यबा हे फसादया जड खः । औसत मनूयात धनि जुइत भाग्यया साथ माः वा बेइमानी याये माः धकाः स्यनातःगु वा कनातःगु जुइ । तर सु मनू तसकं हे धनि जुइ इमिगु मान्यता कथं ध्यबां लसता बिइ फइ मखु । ध्यबां केवल अज्योगु साधन जीवनय् चूलाका बी गुकिं जीवन अपुक्क याउँक न्ह्याकी ।
कतिला जुइगु बांलागु बानी
औसत मनुखं कतिलागु व्यवहार यायेगु तसकं हे बांमला धकाः ताय्की । थुकीयात नकारात्मक रूपं नालाकयाच्वंगु दइ । तर धनी मनूतय्सं धाःसा थःथम्हं लय्ताय्की । इमित मेपिनिगु खँया च्यूता दइ मखु । इमिगु तर्क जुइकी ‘यदि थःम्हं थःम्हेसियत बिचाःयाये मफूसा मेपिंत गथेयाना बिचाःयाये फइ ।’ उकिं थःनि कतिलायेमा ।
छुं बिशेष गुण
औसत मनुखं तायेकाच्वंगु दइकी धनी मनूत उच्च शिक्षा हासिलयाना आखः ब्वना झन धनी जुइ । तर धनि मनूतय्गु बिषयलय् याःगु सर्वेक्षण लिपा धाःसा अज्योगु खँ पुष्टि मजु । अवश्य नं उच्च शिक्षा हासिल याये धुंकाः छगू बिशेषज्ञ कथं मास्टर वा डक्टरेट पूवनिगु इलय् छगू हे छुं बिशेष गुण आर्जन याइ ।
भविष्यया म्हगस
औसत मनूत न्हापा थथे न्हापा थे धकाः लुमंकाच्वनिं । खँ कनांच्वनिं । तर धनि मनूत धाःसा भविष्यया निंतिं जक म्हगस मालाच्वनिं । मनूत धनि जुइगुया कारण छगू थ्व नं खःकी इमिसं थःगु लगानी भविष्यया अनिश्चित लिच्वःया निंतिं जोखिम कायेत तयार जुयाच्वनि । भविष्यया निंतिं बिचाःयाना ज्या न्ह्याकी नकी न्हापाया खँ लुमंका ज्या याइ ।
ध्यबाया दृष्टिकोण
औसत मनुखं ध्यबायात संवेदनशील जुयाः बिचाःयानाच्वंगु दइ । औसत मनूयाके ध्यबाया बिषययात कयाः लयतायाच्वनिं, ग्यानाच्वनिं । तर धनीतय्सं धाःसा ध्यबायात छगू अवसर कथं नालाच्वंगु जक दइ । थ्व छगू साधनया रूपय् जक हे न्ह्यानाच्वंगु दइ । अवसर वःसा छ्यलेगु मखुसा सुम्क तयातयेगु ।
इच्छा
औसत मनुखं थःत मयःगु ज्या यानानं ध्यबा कमेयानाच्वंगु दइ । तर धनि मनुखं थःत मयःगु ज्या याइ मखु । छु चिजय् थःगु मन दइ वा ज्या याइबलय् सन्तुष्टि जुइ व हे जक ज्या याइ । थःत यःगु ज्या याना ध्यबा नं दइगु जुसेंनि मनूत स्वतः धनी जुइगु हे जुल । मचांनिसें हे झीत स्कूल वा समाजं न्ह्याथे याना नं ध्यबा कमे याये माः धकाः जक स्यनाच्वंगु दु । थुगु खँयात हिइकेगु ई वयेधुंकल ।
हाथ्याः
औसत मनुखं तःधंगु उपेक्षा तयाः ज्या याइमखु । थुकींयाना इपिं हरेक लिच्वलय् इपिं सन्तुष्ट जुयाच्वंगु दइ । साइकोलोजिस्टतय्सं नं मनूतय्त सन्तुष्ट जुइगु खःसा तःतःधंगु आशा याये मते धकाः कनाच्वंगु दइ । तर मनूतय्के सामर्थ मदयेकं छुं नं चिज प्राप्ति जुइ मखु । उकिं धनि जुइपिंसं छगू तःधंगु हे हाथ्याःयात नालाच्वनिं । चिचिधंगु हाथ्याः नालाच्वनिं मखु ।
