नेपालभाषाया पत्रकारिता अझ नं मिसनया चरणं पार जुइ मफुनि । नेपालभाषा आन्दोलनया नापनापं हे नेपालभाषाया पत्रकारिता नं ब्वाँय् वनाच्वंगु दु । नेपालभाषा आन्दोलनयात लिघ्वासा बीगु हे नेपालभाषा पत्रकारिताया मिसन खः । उकिं थ्व भाषाय् पत्रपत्रिकात यक्व पिहां वःसां पत्रकारिता हे शुरु जुइधुंकल धायेगु अवस्था धाःसा अझ नं मवःनि यद्यपि नेपालभाषां न्हापांगु पत्रिका पिहां वःगु नं आः झण्डै सछिदँया जःखः थ्यनेधुंकूगु दु ।
खतुं नेपालय् राज्यसत्तां हे ब्वलंका तःगु खस नेपाली भाषाय् तकं व्यावसायिक पत्रकारिता शुरु जूगु नीन्यादँ भाय्प्वः मदुनि । तर थ्व नीन्यादँया दुने खस नेपाली पत्रिकारितां गुलि प्रगति याःगु खः व धइगु वंगु सछिदँ दुने याःगु प्रगति स्वयां नं गन खः गन अप्वः खः । प्रविधिया विकास, दक्ष जनशक्ति, विस्तारित बजार, अप्वया वंगु साक्षरता, वृद्धि जूगु क्रयशक्ति आदि विविध कारणं यानाः वंगु छगू शताब्दी दुने जुइ मफुगु मिडियाया विकास मात्र चकंछि शताब्दीया दुने सम्पन्न जुइत सफल जुल । थ्व नीन्यादँ खस नेपाली भाषाया पत्रकारिता थुलि तीव्र गतिं ब्वाँय् वन कि उकिया न्ह्यःने झीगु पत्रकारिता तुलना तक हे याये मछिंक लिउने लाः वंगु खने दत । अथे ला झी पटक्क हे न्ह्याः मवनागु कारणं थथे लिउने लाःगु मखु । झीगु तुलनाय् उपिं रकेट गतिं ब्वाँय् वंगु कारणं झी लिउने लाःगु खः । तुलनाय् उपिं स्वयां झी तसकं हे लिउने खःसां पत्रकारिताया विविधताया ल्याखं धाःसा झी थःगु आकार, क्षमता, दक्षता व हैसियत कथं माथंछि न्ह्याः वनाच्वनागु दु । गति दिउगु मदु ।
झीगु पत्रकारिताया गति दिउगु मदु धकाः क्यनेगु थीथी मापकत मध्ये छगू ग्यसुलाःगु दसु खः ‘पेज थ्री’ बाःछिपौया प्रकाशन । नेपालभाषा पत्रकारितायात विविधीकरण व विशिष्टीकरण याना यंकेगु ज्याय् ‘पेज थ्री’ या थःगु हे मौलिक योगदान दु । खास यानाः न्हूगु पुस्ताया ल्याय्म्हपिं पाठकयात नेपालभाषाय् साला हयेगु ज्याय् ‘पेज थ्री’ या योगदान थौंया अवस्थाय् ज्वः हे मदु धाःसां जिउ ।
ल्याय्म्ह पुस्ताया मिखा व रुचि ‘कस्मेटिक’ जुइ । उकिं ‘पेज थ्रीं’ ग्लेज दुगु भ्वँतय् रंगीन कलेवरय् छापे जुयाः ल्याय्म्ह पुस्ताया मिखायात हे आकर्षित यानाच्वंगु दु । थ्व थुकिया न्हापांगु सकारात्मक पक्ष जुल । वयां लिपा ‘कन्टेन्ट’ य् नं थुकिया फुक्क हे सामग्री ‘युवा मैत्री’ जुयाच्वंगु खंकेफु । खास यानाः फिल्म, संगीत व फेशन सम्बन्धी थुकिया कभरेज ल्याय्म्हतय् रुचि कथंया सामग्री खः । नेपालभाषाय् करिब करिब ‘टाबू’ जुयाच्वंगु विषय यौनयात नं ‘पेज थ्रीं’ शिष्ट प्रस्तुती यानाः ज्ञान व मनोरञ्जन नितां बियाच्वंगु दु । यौन नेपालभाषाय् वर्जित धइथें जुयाच्वंगु विषय खः । ‘पेज थ्रीं’ उकियात थःगु नियमित स्तम्भ दयेकाः साहस हे याःगु दु धायेमाः ।
झीसं बरोबर धायेगु याना, रंगीन पत्रिकाया छपाई जक रंगीन जुयां मगाः । उकिया ‘कन्टेन्ट’ नं रंगीन जुइमाः । ‘पेज थ्री’ या दुनेया पाना फुक्क ब्ल्याक एण्ड ह्वाइट खःसां उकिया कन्टेन्ट धाःसा रंगीन जू । कन्टेन्टयात ल्वय्क छपाई नं फुक्क हे रंगीन याये दःसा थ्व झीगु पूर्ण रंगीन पत्रिका जुइगु खइ ।
ल्याय्म्हतय्त पत्रिका ब्वंकेगु जक मखु, पत्रिकाया ज्याय् सहभागी हे याना यंकेगु कुतः नं ‘पेज थ्री’ पाखें इलय् ब्यलय् जूगु खनेदु । गथे कि नेपालभाषाया उत्कृष्ट फिल्म नापं कलाकारत ल्ययाः ‘पेज थ्री एवार्ड’ बीगु ज्याझ्वः, नेपालभाषाया सेलिब्रिटीतलिसे डिनर नयेगु ज्याझ्वः, नेवाः भासं स्टाय्ण्ड अप कमेडी ज्याझ्वः आदि आदि थुकिया अज्याःगु सिर्जनशील कुतःत खः गुकिं नेवाः ज्याझ्वलय् न्ह्याबलें खने दइगु नियमित ख्वाःपाःतय्त छखे तयाः न्हून्हूगु ख्वाःपाःतय्त थने हयेगु ज्या यात । थ्व निश्चय नं थःगु कथंया न्हूगु ज्या खः । थुकिं झीत छगू संकेत नं बियाच्वंगु दु कि नेपालभाषाय् ‘मूलधार’ या पत्रिकातय् मिसन नेपालभाषा आन्दोलनयात लिघ्वासा बीगु खःसा अज्याःगु आन्दोलनय् अनेक बहाना दयेकाः ल्याय्म्ह पुस्तायात साला हयेगु मिसन ‘पेज थ्री’ या खः ।
न्ह्यागु देशय् नं जनसंख्याया अप्वः प्रतिशत ल्याय्म्ह पुस्तां हे कःघानाच्वंगु दइ । नेपालय् नं ल्याय्म्हतय् ल्याः जनसंख्याया ४० प्रतिशत स्वयां अप्वः दु । बाँकी ह्याउँमचा, मस्त, पौढ व वृद्धपिं खः । पाय्छि उकथं हे नेवाः दुने नं ४० प्रतिशत हे ल्याय्म्ह दइगु जुल । ४० प्रतिशत ल्याय्म्हतय्त सहभागी मयासे छुं आन्दोलन यायेगु खःसा व आन्दोलन मखु तमाशा जक जुइ । अतः नेपालभाषा आन्दोलनयात तमाशा जुइगुपाखें बचे यायेगु ज्याय् नं ‘पेज थ्री’या खने मदुगु भूमिका दु । नेवाःतय् ल्याय्म्ह पुस्ता नेवाः आन्दोलनपाखें विकर्षित जुजुं वनाच्वंगु झीगु थौंया यथार्थ खः । नेवाः भाय्, नेवाः जाति, नेवाः गौरवपाखें थौंया ल्याय्म्ह पुस्ता तापापां वनाच्वंगु दु । उकी झीगु थःगु हे गुलिखे कमजोरी नं दयेफु । थथे याकेत राज्यसत्तां षडयन्त्रकारी भूमिका म्हिताच्वंगु नं दयेफु । ल्याय्म्ह पुस्तायात झीगु जातीय आन्दोलनलिसे समाहित याना यंकेगु छुं हे कार्यक्रम झीके मदु । थज्याःगु इलय् ‘पेज थ्रीं’ म्हिताच्वंगु भूमिका खुसिं चुइकूम्ह मनुखं ज्वनाच्वंगु छपु सुपः बराबर हे जक खःसां वपाखें बीगु आशा धाःसा अतिकं तःधं । जब ल्हातय् छुं दइ मखु तब मनय् च्वंगु आशा हे अज्याःगु जः जुया बी गुकिं झीत न्ह्याक्व हे खिउँगु सुरुंगय् नं त्यानु मचासे यात्रा यायेत साहस थनाच्वनी ।
पिलिपिलि मत च्याकाः सुरुंग दुने यानाच्वंगु ‘पेज थ्री’ या थ्व यात्रा थौं २०० ल्याः थ्यन । मत पिलिपिलि हे जक खःसां जः धाःसा तापाकंनिसें खनेदु । आःया लागिं लँजुवाःतय्त थ्व स्वयां तःधंगु राहत मेगु छु जुइ ?
सुरेश किरण
पेजथ्रीया २०० अंक पिदंगु लसताय्
