थौंकन्हय्या ल्याय्म्ह पुस्ताया आपाः धइथे ई स्टाटस अपडेट, लाइक व कमेन्ट यायेगुलिइ हे बिनाच्वंगु खनेदु । थौंंकन्हय् अतिकं लोकंव्हानाच्वंगु सोसियल नेटवर्क साइटत फेशबुक, ट्वीटर, जी प्लस आदि हे ल्याय्म्हतय् दक्कले सतीम्ह पासा थें जुयाच्वंगु दु । छुं दुःखया खँ जुइमा वा सुखया आपाःसिया थःगु खँया स्टाटस अपडेट याये वा ट्वीट याये हथाय् हे जुइ धुंकी ।
छुं ई न्ह्यःतिनि झीसं तःभुखाय् नं फया । उगु तःभुखाचं आपाःसिया धनजनया तःधंगु क्षति जुल । थःगु छेँ दुपिं नं पालय् द्यनेत बाध्य जुल । गुलिसिया धन्य ज्यान जोगे जूगु स्थिती जुल । ग्वःन्हुतक्क ला आः छु जुइगु खः धैथें बिचाः यायां च्वनेत बाध्य दयेकाबिल । अज्याःगु इलय् नं यक्व हे मनूत स्टाटस अपडेट मयासे च्वनेमफुत । थुगु इलय् गुलिसिया आज्जु थःत छुं जूगु मदु धकाः थःथिति पासाभाइपिन्त सुचं बीगु जुइफु सा गुलिसिया स्टाटस अपडेट वा ट्वीट यायेगु एडिक्सन हे जुइफु । न्ह्याग्गु धाःसां थन धायेत स्वयागु थुलि हे खः कि थौंकन्हय् ल्याय्म्हतलिसें वयस्क वा ज्याथःजिथिपिनतक्कंयागु जीवनया अभिन्न ब्व थें जुइधुंकल सोसियल नेटवर्क साइट ।
थज्याःगु सोसियल नेटवर्क साइटया लवः नं आपाः हे दु लिसें थुकिं यानाः घाटा नं मदुगु मखु । थौंकन्हय्या विकसित प्रविधिं यानाः पुलांगु प्रविधि वा सीप आपाः हे विस्थापित नं जूगु दु । अनलाइन मिडियाया विकासलिसें प्रिन्ट मिडिया विस्थापित जुया वनाच्वंगु खनेदु । अले सोसियल नेटवर्कया विकासं पाठक संस्कृति विस्थापित जुया वनाच्वंगु दु । थौंकन्हय् न्ह्यानाच्वंगु थीथी पत्रपत्रिकाया नितिं अनलाइन मिडिया वा सोसियल नेटवर्क साइट तःधंगु हाथ्या हे जुयाब्यूगु दु । उकीसनं नेपालभाषाया पत्रपत्रिकाया नितिं अझ बजार काये झन हे थाकु । थःगु भाय् संस्कृतिलिसे तापाना वनाच्वंगु, सोसियल नेटवर्क दुने न्ह्यइपुकाच्वंगु ल्याय्म्ह पुस्तायात पत्रिका ब्वंकेगु, व नं नेपालभाषाया पत्रपत्रिका ब्वंकेगु धइगु छगू हाथ्या हे खः धायेमाली । थ्व छुं अःपुगु ज्या धाःसा पक्का हे मखु ।
थ्व हे बिचाः नेपालभाषाया बाःछिपौ पेजथ्री दुने कःघानाच्वंगु खनेदु । पेज थ्री नेपालभाषा बाःछिपौ स्वयेबलय् थौंकन्हय् बिशेष यानाः थुगु पत्रिकां सोसियल नेटवर्कया दुजःतय्सं गुकथंया बिषयबस्तुइ थःगु इन्ट्रेस्ट बियाच्वंगु दु धइगु खँयात बिचाः यानाः अज्याःगु हे बिषयवस्तु पेजथ्री दुने बीगु अले पेजथ्री दुनेया बिशेष कथंया वा धाये महत्वपूर्ण च्वसुयात सोसियल नेटवर्क दुने वहसया बिषय दयेकेगु ज्या यानाच्वंगु खनेदु ।
पेज थ्री पत्रिकाया न्हापांगु पेजय् पिदनीगु स्तम्भ ह्यूपाःया खँयात नं फेशबुकय् तयाः उकी कमेन्ट्स कायेगु यानाच्वंगु दु । थुकिं पत्रिका मस्वःपिं व पत्रिका मथ्यंगु थाय्यापिन्त पत्रिकाया थुगु स्तम्भ ब्वनेखनीगु जुल । नापं मस्यूपिनिगु नितिं जानकारी नं जुल । ह्यूपाःया खँया बिषयबस्तु दुने फेसबुकय् कमेन्ट्स नं बांलाक हे वयाच्वंगु खनेदु । थुगु ल्याखं अनलाइन वा सोसियल नेटवर्कय् दुने हे न्ह्यइपुका च्वनीगु वर्गयात नेपालभाषाया पत्रिकाप्रति, उकी छापे जूगु बिषयवस्तुप्रति इन्ट्रेस्ट थनेत पेज थ्रीया थुगु कुतः ताःलाना वनाच्वंगु हे दु धायेफइ ।
छुं ई न्ह्यः पेज थ्री बाःछिपतिइ छपु च्वसु पिदन । कुमारीया वसः छगू फेशन शोलय् छम्ह मोडलं फिनाः वाक यात । थुगु बिषययात नं पेज थ्री नं सोसियल नेटवर्क दुने वहसया बिषय कथं तःबलय् उकी आपाःसिनं हे कमेन्ट याःगु खः । अथे हे पेज थ्रीया नियमित स्तम्भ धाःसा धाल धाइ ला बिशेष कथं हे सोसियल नेटवर्क साइटलिसे हे स्वानाच्वंगु जुल । उगु स्तम्भय् ब्वति कायेत हे फेशबुकय् कमेन्ट यायेमाः । थुगु स्तम्भं यक्व हे फेशबुक युजरतय्त पेजथ्री पत्रिका ब्वंकेबिल । फेशबुक दुने मेपिन्त हायेकाः, हिस्यानाः कमेन्ट यायेगु धायेकि फन्नी कमेन्ट यायेन्ह्याःपिनिगु नितिं धाःसा धाल धाइ स्तम्भ तसकं यःगु स्तम्भ जुयाबिल । उलि जक मखु, सोसियल नेटवर्क दुने फन्नी फोटोज पोष्ट यायेन्ह्याःपिनिगु नितिं नं थुगु धाःसा धाल धाइ स्तम्भं बांलाःगु हे दबू बिल धायेमाः । गुलिं गुलिं फोटोग्राफरय्सं छुं ज्याझ्वलय् अज्याःगु हे न्ह्यइपुगु कथंया लू खनकि थ्व फोटो पेजथ्री पत्रिकायात ज्यू धाधां फोटो काःगु नं खनेदत ।
धाःसा धाल धाइ स्तम्भया क्वसं हे फोटोज स्तम्भ नं न्ह्याःगु बांलाः हे खनेदु । पत्रपत्रिकाय् फोटो पिदनीगु धइगु ला सेलेब्रिटि वा थःगु ख्यलय् नां दंपिनिगु जक खः । तर पेज थ्री पत्रिकाय् फोटोज स्तम्भ न्ह्यायेधुंकाः सर्वसाधारण न्ह्याम्हेसिगु नं फोटो थुगु स्तम्भय् पिदनेफुगु जुल । फेशबुकय् तयातःगु न्ह्याम्हेसिगु नं फोटो थुकी पिदनेफु । उकिया झ्वलय् थः म्हस्यूपिं, थःथिति, पासाभाइ सुयागुं नं फोटो थुकी पिदन धाःसा ‘ए, थुगुसीया पेजथ्री पत्रिकाय् छंगु फोटो पिदंगु दु नि’ धकाः चर्चा नं जुइगु जुल अले थःगु वा थः म्हस्यूपिनिगु फेशबुकय् दुगु फोटो पत्रिकाय् छापे जूगु स्वयेत पत्रिका नं स्वइगु हे जुल । लिसें आः मेगु ल्याखय् सुयागु सुयागु फोटो पिदनी जुइ धकाः पाठकतय्त छगू उत्सुकताय् नं लाकातइगु जुल । थुकथं नं पेज थ्री बाःछिपतिं फेशबुक यूजरतय्त सालाच्वंगु खनेदु ।
थुगु कथं स्वयेबलय् फेसबुक यूजरतय्त पेज थ्री बाःछि पतिं सालाच्वंगु दु । नेपालभाषाया पत्रपत्रिका ब्वनेगु बानी मदुपिन्त नं थीथी त्वहलय् पत्रिकापाखे पेजथ्री बाःछिपतिं आकर्षण याःगु हे दु धायेमाः । थुकिं छगू ला नेपालभाषाया छापा संचार दुने न्हूपिं पाठकत नं दुहांवइगु जुल । मेगु धइगु थुगु कथंया बिचालं पेजथ्रीपाखें नेपालभाषाया छापा संचारय् नं न्हूगु कथंया बिषयवस्तु दुहांवल । पेजथ्रीया थुगु कुतःयात च्वछायेमाः ।
बरु आः पेजथ्रीं फेसबुक यूजरत जक मखु, ट्वीटर व जीप्लस यूजरतय्त नं सालेगुपाखे बिचाः यायेमाःगु खनेदु । फेसबुक चले मयाइपिं तर ट्वीटर व जीप्लसय् न्ह्यइपुकाच्वंगु तःधंगु हे पुचः अझं दनि । अज्याःगु पुचःयात नं सालेत पेजथ्री बाःछिपतिं बिचाः यानाः मेगु न्हूगु स्तम्भ वा सामग्री पत्रिकाय् तनेगु ई त्यल थें च्वं आः ।
विराजकाजी राजोपाध्याय पेजथ्रीया २०० अंक पिदंगु लसताय
