हरेक मनू याकःचा हे सि । स्वइतं नापं नु सी वने नु धकाः ब्वना यंकी मखु। यंकुसां स्ुं वइ नं मखु । उकिं जीवन अथे मखु । सीबलय् याकःचा जुसां म्वातले मिकले जुयाच्वनेगु बिचा दयेके माः । मखुसा नेवाभासं खँत्वा खँग्वः छगू दु गुकीयात याकः खिचा धकाः नं धाइ । छु छिनं याकः खिचा खः की मखु छक्व बिश्लेषण याना स्वये ।
छि लिसे सुं नं मिले मजु वा सुं लिसे मिले जुया च्वनेगु बानी हे मदुगु जक खः । निम्ह स्वम्ह वा ग्वम्ह मनू छि तसकं मिले जु वा पासा पिं पत्याये बहपिं गोम्ह दु धकाः माला स्वसा सिइ दइ की छि याकः खिचा खः की मखु । स्ुं नं पासां छित छुं कथंया खँ कनी वा मकं अले गुलि तक कनिं । छि यक्व पासा दुसां इमिसं पासागत व्यहार याःकी मयाः धकाः बिश्लेषण याःसां याउँक हे सिइ दइ कि छि याकः खिचा खःकी मखु ।
खँल्हाबल्हा यायेगु छगू बांलागु मौका सदां मालाच्वनेगु खः की मौका मालामच्वंसे सुं लिसे तुरुन्त हे खँल्हायेगु बानी दु ला ? अकसर मनूत मौका फुइ धुंकाः तिनि न्ह्यागु नं बिषयलय् खँल्हाबँल्हा यायेत स्वयाच्वनिं । थुकीं झन हे नकारात्मक लिच्वः ब्वलनी । उकिं थःम्हं छुं अज्योगु खँ ल्हायेमाःसा न्हयचिले फु की मफु धैगु न्ह्यसः नं तसकं हे महत्वं जाः ।
नातिकुति जुइगु मनूया छगू व्यवहार हे जुयाच्वनिं तर नं नातिकुति गुलि हद तक जुइगु धैगु छगू चिं नं दइगु याः । अकसर मनूत यक्व नातिकुति जुयाः हे मेपिंसं पूर्वानुमान याना हे छुं खँ मकंसे च्वनिं । जबतक मनूत तसकं हे नातिकुति जुयाच्वनिं वा थःम्हं धैथे हे यायेत स्वइ व मन्ू याउँक हे याकः खिचा जुयाच्वनिं ।
छम्ह मनूया व्यवहार मेपिं म्हमस्युपिं मनू प्रति गथे जुइ धकाः खनकी हे व मनू याकःखिचा खः मखु धकाः सी दइ । गथेकी गननं रेष्टुरेन्टय् वेटरयात तसकं छाटो पहवयेक खँल्हात धाःसा व मनूयाके याकः खिचा जुइगु गुण दु धकाः थुइके माः ।
सुं मनू फेशबुकय् यक्व हे किपाः तइपिं वा च्याट यानाच्वनिंपिं नं छखें याकःखिचा हे जुइ छाय्की इमिके धात्थेंपिं पासापिं हे दैमखु । थः जःखः धात्थेंपिं पासापिं दुसां फेसबुकया अदृष्य पासापिं लिसेयक्व भ्यलय् पुनिपिं याकः खिचा हे जुइ । अथेतुं सामाजिक संजालय् मनूतय्त लित्तु्मत्तु लिनां कुँखिनीगु म्वाः मदुगु कमेन्ट तयाच्वनिपिं वा डिप्रेसयाना यंकीपिं नं याकः खिचा हे खः ।
पासापिं थःथिति सिबें जनावर हे ज्यु धकाः तायेकी मनू त नं दु । अकसर इमिसं जनावर लहीबलय बिलकुल हे बिपरित पशुपंक्षी लहिनाच्वनिं । गथे की खिचा व भौचा, भौचा व छुं , भौचा व झंगः आदी इत्यादी ।
याकः खिचा जुइपिं मनूतय्सं अकसर थः याकःचा हे सी माली धकाः बिचाः यानाच्वनिं । थःत वास्ता याइपिं सुं मदु धकाः तायेकाच्वनिं । तर खँ अथे जुइ मखु । थःम्हं थःगु बानी नं हिइका स्वये माः । सकल संसार अथे जुइ मखु । थः भिंसा संसार नं भिनिं ।
