व्याहा यायेधुंकुपिनिगु मनय् अकसर वइगु छताजि बिचाः खः अफेर (बााबष्चक) । यक्व स्यां हे थःगु स्वापू सतिपिं लिसे थः कलाः वा भात सिबें नं दुग्यंगु स्वापू दु धकाः तायेकाच्वनिं । थ्व हे कारणं मिजंतय्गु वा मिसातय्गु मनय् न्ह्यने दँ वइगु छताजि खँ खः – अफेर । थज्योगु अफेरया निंतिं थी थी कथंया त्वह नं मनय् चिना च्वनिं । मत्तिइ लुइकाच्वनिं कि जिं मखुम्ह मिसा वा मिजं लिसे व्याहा याये लात । थः जीवनपासायात त्वता न्हूम्ह जीवन पासायात गथे याना स्वापू स्वाये धकाः मत्तिइ लुइकाच्वनिं ।
न्हापा थुकथंया विचाः हलिउडया प्याखनय् यक्व हे खने दइगु खः । तर थौंकन्हे थज्यो बिचा बलिउडया प्याखनय् नं उतिकं हे खने दु सा छुं ई न्ह्यः तिनि पिहांवःगु नेवाः प्याखं गज्या गज्यापिं मनू दै थन या थीम नं थुकथं हे छगू अफेरय् तक्यनाच्वंगु दु । प्याखनय् थज्योगु अफेर नं तसकं हे न्ह्यइपुक्क क्यनिं । भिंगु अले बांलागु सुखान्त अन्त नं क्यनिं । तर छु धात्थेंगु जीवनय् थथे जुइ ला ?
प्याखं समाजया न्हाय्कं धकाः धाइ । तर प्याखनय् न्ह्याक्व हे न्ह्यइपुसे च्वंसा धात्थें जीवनय् धाःसा अथे जुइ फइ मखु । अफेरया नितिं ई गुब्लें नं सहि जुइ मखु । स्वापू झन हे स्वात्तुमतु जक स्वाइ । अकसर थः कलाः वा भातया चरित्रय् न्ह्यसः चिं तयाः थः नं अज्योगु लँँपुइ जुयाः बदला कयागु धकाः मनय् सन्तोषया भाव ब्वलंकेत स्वइ । तर थ्व भिंगु लँपु मखु । थः जीवनपासायात बदला काये धकाः मन चिनाच्वंतले थः नं अज्योगु हे लँपुइ वनेगु धैगु पाय्छि जुइला ? थ्ुकीं छु इष्र्याया भाव ब्वलंकेगु जक ज्या याइ । मन शान्त याइ मखु ।
थज्योगु अफेर जुल धाःसा थः जीवनपासा ला तसकं दुखि जुइगु स्वभाविक जुइ । तर थ्व दुःखं थः नं पिहांवये फइ मखु । बदलाया भावय् कां जुइवं सकलें हे दुःखया प्रभावय् तक्यनिं । गुम्ह नं पक्ष सन्तोषया सासः ल्हाये फइ मखु । निम्ह दथुया बिश्वासया वातावरण स्यनिगु ला जुल हे तर निम्ह दथुइ ब्वलनेमाःगु सम्मानया भाव तकं ल्यनाच्वनिं मखुत । लिसें लिपा वनानं विश्वास व सम्मानया भाव ब्वलंके फइ मखु ।
अकसर प्याखनय् अफेर जुइगु इलय् क्वथाय् दुने सुनांनं मखंगु क्यनिं । तर धात्थेंगु जीवनय् धाःसा सुनानं मसिइक अफेर याये फइला धकाः छक्व थःम्हं नं न्ह्यसः न्यने माः । जीवनय् थज्यागु खँ छम्ह नं छम्हेस्यां सिइका तुं काइ । सुनानं मसिल धाःसां थःम्हं हे सां अज्योगु खँ स्वइगु न्ह्योने कनां तुं त्वतिइ । छाय्की झी मनू खः । झीसं खँ सुचु्का तये फइ मखु । फुँइ याना जिलला वा अय्लात्वनिगु इलय् नं अज्योगु खँ झीगु म्हुतुं पिहांवयांतुं त्वतिइ । खँ न्ह्याथे हे जुसां खँ पिहांवइ ।त्वपुना तयेफइ मखु ।
वैवाहिक जीवनय् अफेरया लँपु जुया छगू आज्जु धैगु सेक्स ज्ु वनिं । सेक्स चाहे छक जक जुगु जुइमा वा तःकः थ्व आः जीवनया छगू ब्व जुइ । व मनूनापं बारम्बार मखुसां हाकनं छक्व ला नाप हे लाइ । नापलाय्वं हे थःम्हं थः जिवनपासाया बिश्वास गथे याना त्वाथला धकाः थः त बारम्बार पश्चाताप जुयांतुच्वनिंसा व मनू नाप मलाःसां हाकनं गनं नापलाइला धकाः नं उतिकं हे धन्ना जुयाच्वनिं ।
