फेशबुकय् अकसर म्हस्युपिंनिम्ह तिपूया किपाः वा निम्ह मतिनामिया किपाः खनाच्वंगु हे दइ । अज्योगु किपाः स्वयाः गुम्हेस्यां गुलि भ्वासिपिं, मछाःमजुपिं वा ह्यामिपिं थें ताय्काच्वनिं । तर छगू अध्ययन कथंधाःसा थ्व लिच्वः पिहांवःगु दु की गुपिं तीपुलिं थथे फेशबुकय् किपाः मद्दिक्क ब्वया जुइ इमिगु मतिना धाःसा तसकं हे सेल्लाःगु जुयाच्वनिं । थ्व हे किपाया माध्यमं हे संसारयात इमिसं कनाच्वंगु दइ की इमिगु मतिना धैगु निन्हुया मतिना मखु । छुं चिचिधंगु खँ इमिगु स्वापूतिइ पंगः ब्वलनाच्वनिं मखु ।
अथेतुं हे निम्ह मतिनामि गुपिंसंथःगु फेशबुक स्टाय्टसय् हे इन रिलेशनशीप धकाः हिइका निम्ह नापं च्वना किपाः मद्दिक्क हे हित्तुहिला फेशबुकया अंगःलय् ब्वयाजुइ इमिगु स्वापू नं ताः ई तक्क हे ल्यनाच्वनिं धैगु अध्धयनया निश्कर्ष हे पिहांवःगु नं दु ।
म्याडिशनया युनिर्भसिटि अफ विस्कनय् १८०म्ह ब्वनामिया दथुइ याःगु थुगु अध्ययन खः । अध्ययन कथं १८०म्ह ब्वनामित ल्यःगु खः गुपिं छगू स्वापूतिइ स्वानाच्वंपिं खः। थुमिसं थःगु स्वापू फेशबुकय् बांलाक्क हे ब्वयातइगु याः । अझ थुपिं निम्ह तिपूलिं वा मतिनामी जोडीं छम्हेस्यां मेम्हेसिया फेशबुकया अंगलय् थी थी स्टाय्टस नं पोष्ट यायेगु याः ।
थ्व अध्ययनया खुला लिपा हाकनं व हे ब्वनामिपिंत हाकनं छक्व स्वापू तयाः स्वःगु नं खः । थुगु इलय्धाःसा गुपिं ब्वनामिपिंसं मद्दिक्क हे किपा ब्वयेगु याना च्वं अले रिलेशन स्टाय्टसय्स्वीकारोक्त याना तःगु दु इमिगु मतिना अझनं ब्वलनाच्वंगु हे खनेदु ।
अनुसन्धान कर्तातय्सं मेगु छता खँ नं पत्ता लगेयाःगु दु । व छु धायेबलय् मतिनामिं फेशबुकय् गुगु कथंमतिनाया ब्यवहार क्यना वन, व हे कथंया व्यवहार मिसं थःगु व्यवहारय् नं क्यनावन । अनुसन्धान कर्ताया धापू कथं मनूतय्सं फेशबुकय् दुगु गुगु खँ सार्वजनिक याइ व हे कथं इमिसं थःगु व्यवहारय् नंहिइकेगु वा मालेगु याइगु जुयाच्वन । सार्वजनिक जुइगु किपाः वा छुंनं कथंया खँय् मनूतय् थःगु जीवनया अंश कथं मज्जिमगागु थें ताय्की । थुकींयाना फेशबुकया किपा व जिवनया न्ह्याय्कं ज्वलाकेगु कुतः छम्ह मतिनामीया जुयाच्वनिं ।
आ थुगु हे खँया लिधंसाय् मेगु नं खँछता न्ह्यसःया रूपय् दनाच्वंगु दु की फेशबुकय् गज्योगु किपाः मनूखं पोष्ट याइ व हे कथं वैगु व्यक्तित्व नं हिला वनीला थें ? गथेकी छम्ह मनुखं यदि कासाया किपा यक्व पोष्ट याना च्वन धाःसा वैगु व्यक्तित्व नं छम्ह कासामि सरह जुया वनिंला ?
थ्व न्ह्यसःया लिसः मालेगु खःसा मेगु छगू अध्ययनया खँ थन न्ह्यब्वये माली । वंगु दँय् फेशबुकं हे ६८९००० युजर्स तयेके मसिक हे छगू अध्ययन याना स्वःगु जुल । बच्छि मनूया न्यूज फिडय् सकारात्मक खँत यक्व छ्वयेगु व बच्छि मनूयात धाःसा नकारात्मक खँ पोष्ट यात । थुकीया लिच्वः कथंसकारात्मक खँ यक्व स्वःपिंसं फेशबुकय् सकारात्मक खँ यक्व सयेर याःगु खने दत । थज्योगु प्रकृया यात हे इमोशनल कन्टाय्जन धायेगु नं याः ।
