मेमेगु विधा सिबें प्याखँया बिषय न्ह्याबलें चर्चा जुइगु याः । प्याखं फिचर फिल्म खः ला वा शर्ट फिल्म, फिक्शनल वा नन् फिक्शनल, लाइभ वा एनिमिनेटेड इत्यादी । प्याखँयात अनेक कथंया विश्लेषण याना वर्गिकरण यायेगु ज्या जुयाच्वं । तर थ्व हे कथंया बिश्लेषण वा चिन्तन म्यूजिक भिडियोयात कया जुइगु मयाः । म्यूजिक भिडियो धैगु छु धैगु खँय् तकं नं सुनां परिभाषित यानाच्वंगु मदु ।
म्यूजिक भिडियोया सामान्य अवधारणा धैगु हे म्ये, भिडियो सन्देश व कलाकारया समिश्रण धकाः सकस्यां थु । थ्व अवधारणा दुने नं म्यूजिक भिडियोयात न्याताजि अवधारणाय् ब्वथले छिं ।
म्यूजिक भिडियोया विकास क्रमय् एमटिभिया गुलि योगदान दु, व गब्लें हे वेवास्ता याये फइ मखु । नेपालभाषाया म्यूजिक भिडियोया विकास यायेगु ताः तुनाः खःसा म्यूजिक भिडियोया ताः ग्वथिइ दु धकाः सिइके तसकं हे आवश्यक जू । आः तक्क पिदनाच्वंगु म्यूजिक भिडियोया इतिहासयात दुवाःलाः हे म्यूजिक भिडियोया ताः पिकयातःगु खः । थुकीया हे आधारय् थी थी कथंया म्यूजिक भिडियोया अवधारणा थुगु कथं दु ।
१) परफोरमेन्स म्यूजिक भिडियो
२) नेरेटिभ म्यूजिक भिडियो
३) कन्सेप्ट म्यूजिक भिडियो
४) लिरिक्स म्यूजिक भिडियो
५) एनिमेशन म्यूजिक भिडियो
१) पर्फोमेन्स म्यूजिक भिडियो
झीसं दकलय् न्हापां नेपाल टेलिभिजनय् स्वयाःगु म्यूजिक भिडियो धैगु हे छम्ह कलाकारया पर्फोमेन्स यानाच्वंगु म्यूजिक भिडियो स्वयाःगु खः । छम्ह कलाकार माइक ज्वनां मंचय् च्वनां म्ये हाली । व हे दृष्य क्यामरां कैद याइ । अले टिभिइ स्वइ । म्यूजिक भिडियोया विकासय् न्हापांगु पलाः हे थ्व खः । थज्योगु भिडियोलय् कलाकारं लाइभ हे हाले माः धैगु नं मदु । कलाकार वा म्येहालामिं लिप्सींग जक यानाः तःसां नं गाः वा कलाकारं लाइभ हे हाला च्वंगु नं जुइफु । छुं स्टेज पर्फोमेन्सयात क्यामरां कयाः क्यंगु भिडियो नं पर्फोमेन्स म्यूजिक भिडियो कथं नाले माः । नेपालभाषाया शुरुशुरुया म्यूजिक भिडियोनं फुलबारी नांया नेपाल टेलिभिजनय् वइगु ज्याझ्वःलय् थथे हे यानां म्यूजिक भिडियो निर्माण जुयाःच्वनिंगु खः ।
म्यूजिक भिडियो निर्माणया झ्वलय् थ्व दकलय् अःपुक्क निर्माण याये ज्यूगु म्यूजिक भिडियो खः । थुकथंया भिडियो दयेकेगुनिंतिं बजेट नं आपाः म्वाः । थुकीया दसू कथं स्वयेगु खःसा ईलोहं प्रकाशनया युट्युब च्यानलय् दुगु ज्वरा ज्वरा पर्सि सिनां छगू लोकंह्वाःगु पर्फोमेन्स म्यूजिक भिडियो खः । थुगु भिडियो पेजथ्री पिपल्स च्वइस अवार्ड ११४२य् ख्यालि जुजु मदन कृष्ण श्रेष्ठ, रोजी डंगोल श्रेष्ठ व सरिता शाहीं पर्फोम याःगु खः ।
२) नेरेटिभ म्यूजिक भिडियो
छगू म्यूजिक भिडियोलय् छुं कथंया बाखं न्ह्यब्वयाच्वंगु दुसा उकियात नेरेटिभ म्यूजिक भिडियो कथं नालेमाः । थज्योगु म्यूजिक भिडियो छगू कथंया शर्ट फिल्म थें हे जुइ । नेरेटिभ म्यूजिक भिडियोया शुरुवात, बिचया ब्व अनं लिपा अन्त नं दइ । थुकी छुं कथंया लिप् सिंक वा ब्याण्ड अनं म्येहालामि खने दइ मखु । म्ये फुक्कं छगू कथंया नेरेशन कथं न्ह्यानाच्वनिं । नेरेटिभ म्यूजिक भिडियोया नं मेगु स्वताजि कथं ब्वथले ज्यू । थुकीयात इलुस्टे«शन, एम्पलिफिकेशन अले डिस्जंक्चर कथं ब्वथले ज्यू ।
यदि निर्देशकं म्येया आधारय् जक म्यूजिक भिडियो दयेकल धाःसा थुकीयात इलुस्टे«शन नेरेटिभ म्यूजिक भिडियो धाइ । भिडियोया रिफ्रेन्स धैगु केवल म्येया बोल जक हे जुइ । थुकीया दृष्य मुक्कं हे म्येग्वःया आधारय् जक हे जुइ ।
छन्त जिगु माया मदुला । थुगु म्यूजिक भिडियोलय् निर्देशकं म्येया बोलया आधारय् बाखंयात नेरेशन यानातःगु दु । थुकी म्येग्वः कथं म्यूजिक भिडियो निर्माण जुयाःच्वंगु दु ।
यदि निर्देशकं थःगु परिकल्पनाया आधारय् म्यूजिक भिडियोया खँग्वःया प्रतिकारात्मक रुपं दयेकल धाःसा थुज्वःगु म्यूजिक भिडियो यात एम्पलिफिकेशन धकाः धाइ । थुकी म्ये खँग्वलं धाःथे हे भिजुअल मजुसे ज्वलिं ज्वः जक दइ । थुकी भिडियोलं धाइगु हे दृष्य आवश्यक मजू तर म्येया खँग्वयाःत तिबः बियाःच्वंगु दइ ।
छंगु लँ स्वैच्वंगु मिखा भिडियोस संगीतया माध्यमं निम्ह तापानां च्वंपिं स्वानाच्वंगु दइ सा व निम्हं नापलाइ वा मलाइ धकाः सिबें नं म्येया सन्देश कथं छम्ह मिसा मचां उगु इलय् आखः नं च्वये सयेकल धैगुनं क्यनातःगु दु ।
डिस्जंक्चर भिडियोलय् म्येया बोल कथं भिडियो न्ह्याये म्वाः । भिडियोनं छगू धयाःच्वंगु दइ तर म्यें मेगु हे खँ धयाच्वंगु दइ । म्येया बोल सिबें नं भिडियोया मेसेज मेगु हे कथं जुइ । थुकथंया भिडियो छक्व स्वये वं हे थुइ धैगु जुइ मखु ।
गुलि न्ह्यइपुसे च्वं म्येया बोल छगू ड्रिम सिक्वेंस खःसां थुकीया मू पात्र छम्ह पेपर आर्टिस्ट खः । वैगु हे आर्टं मिसाम्हेसिया जीवन सार्थक जुइ धकाः म्येया बोल सिबें पाक्क भिजुअल दयेकातःगु दु ।
३) कन्सेप्ट म्यूजिक भिडियो
कन्सेप्ट म्यूजिक भिडियोलय् छुं कथंया बाखं दइ मखु । थुकी म्येग्वः लिसे नं छुं कथंया स्वापू दइ मखु । थुकी या भिडियोलं बिस्कं हे बाखं वा छगू थीम ज्वनाच्वंगु दइ । थुकी छुं कथंया स्ट्रक्चर हे दइ मखु । थुकी छम्ह आर्टिस्टया परफोरमेन्स वा नेरेशन दयाःच्वनिं गुकीं याना स्वकुमिं छुं भचा आकर्षित जुयाःच्वनिं । थुकथंया भिडियोया अति विशेष जुइ । थुकीया मौलिक पनया कारणं स्वकुमिं भिडियो ल्वमंके फइ मखु । छुं बिशेष रंगया टोन वा छुं कथंया चिं दयाच्वनिं ।
भेष महर्जनया भिडियो हाल हाल.. स्वल धाःसा थुगु भिडियोया कन्सेप्ट तसकं बिस्कं खने दइ । आष्र्टि न्ह्योखतं वनाच्वंगु दइ तर सकलें हे अखंतं न्यासिजक वनां भिडियो क्वचायेकातःगु दु ।
४) लिरिक्ल म्यूजिक भिडियो
भिडियोलय् छुं कथंया किपाः मवःसे म्येया बोल जक च्वयातःगु भिडियोयात लिरिकल भिडियो धाइ । थौं कन्हे थुगु कथंया भिडियो युट्युबय् तसकं हे लोकंह्वानाच्वंगु नं खंके फइ । लिरिकल भिडियो विन्डोज् मूभि मेकरया छगू एप्लीकेशनं शुरु जूगु खः । लिरिकल भिडियोलय् म्येग्वः व सामान्य ब्याकग्राउण्ड रंग जक दइ तर लिपावनां थुगु फर्माटं क्याराओके भिडियोयात तिबः बिल । गुकीं थ्व लोकंह्वाःगु खः । इमर्जया मैंचा म्ये लिरिकल भिडियोया बांलाःगु नमुना खः । थुकी छुं भिजुअल मदुसां मात्र चित्र व आखःग्व जक दु ।
५) एनिमेटेड म्यजिक भिडियो
थुकी २ डी वा ३डी एनिमेशन वा सिजिआइया भिडियो त दुथ्याकाःतःगु दइ । एनिमेटेड भिडियोया स्वरुप नं म्यूजिक भिडियोया थें वर्गिकरण याये छिं तर थुगु भिडियो मुक्कं हे एनिमेशन जुइ । थौं कन्हे एनिमेशन व लाइभ भिडियो नापं तयाः नं भिडियो दयकेगु याः ।
जिं छन्त ययेका च्वना भिडियोलय् म्येहालामि कलाकार व एनिमेशन दुथ्यानाच्वंगु दु ।
