नेपाल सरकारया आधिकारिक निकाय चलचित्र विकास बोर्डया सल्लाहकार मनोनित जूगु लसताय् गोपालकाजी कायस्थयात झीगु सः व सुकुन्दा फिल्म्सपाखें भिन्तुना देछाल ।
ज्याझ्वलय् झीगु सःया संरक्षक विजयरत्न असंबरें चलचित्र विकास बोर्ड थेंज्यागु राज्यया आधिकारिक निकायलय् कायस्थ भाजु थेंज्याम्ह फिल्म बजाःया दुग्यंक अनुभव दुम्ह छम्ह नेवाःया महत्वपुर्ण उपस्थिति दुगु धैगु नेवाः फिल्मख्यया नापनापं नेपाःया मूक्कं फिल्मख्यया निंतिं बाँलागु खँ खः धका धयादिल ।
सुकुन्दा फिल्मसया कजि नांजाम्ह फिल्म निर्दशक बाशु शाहीं नेवाः फिल्म क्यनेया निंतिं बिकास बोर्डया सल्लाहकार जुयादीम्ह कायस्थ भाजुं लँपु दयेकाबिइ धइगु विश्वास दु धका धया दिल ।
भिन्तुना ज्याझ्वलय् थःगु नुगःखँ तयेगु झ्वलय् कायस्थ भाजुं थः चलचित्र विकास बोर्ड या महत्वपुर्ण थासय् थ्यंगु धइगु मूक्कं नेपाःया फिल्मख्यया निंतिं अझ अप्वः बाँलागु ज्या यायेगु ह्वता वःगु खः धकाः धाःसें नेवाः फिल्मया थपुया निंतिं थः न्ह्याबलें न्ह्यचिलेगु बचं बियादिल ।
ज्याझ्वलय् कायस्थयात झीगु सः व सुकुन्दा फिल्म्सया जः दुजः पाखें खादाँ क्वखाएका भिन्तुना देछागु खःसा झीगु सःया संरक्षक असंबरे भाजुं मतिनाया चिं देछागु खः ।
