महानगरया शहरी जनजीवनय् व्यस्त ट्राफिकया आपलं समस्या जुइ । येँया लँपु थुलि आपाः स्वात्तुमतु स्वाः कि छथाय् जक छुं कथं लँ स्यंसां स्वनिगःया हे लपुँयात प्रभावित यानाच्वनिं । तर लँय् मोटर न्ह्याकेगु सिबें नं पार्किंगया समस्या थौं स्वनिगःया निंतिं तसकं हे तःधंगु समस्या जुयाच्वंगु दु । स्वनिगलय् पार्किंगया थज्योगु हे समस्या समाधान याये धकाः येँ महानगरपालिकां आः तिंख्यलय् स्वंगू तल्लाया अण्डरग्राउण्ड पार्किंग दयेकेगु योजना न्ह्यब्वयाच्वंगु दु । स्वनिगलय् पार्किंगया समस्यायात कयाः येँ महानगरपालिकां छुं कथंया पलाः ल्ह्वनाच्वंगु खने दु । थ्व हे झ्वलय् छुं ई न्ह्यो जक बेसमेन्टया निंतिं नक्सा पास यानाः मेमेगु प्रायोजनया ज्या खँ यानाच्वंथाय् कार्वाही न्ह्याका सामाजिक संजालय् नं येँ महानगरपालिकां क्वाकाः च्वंगु खः। तर चिकुला वः लिसे थुगु अभियान नं हाकंनं ख्वाउँया वं थें खने दु । मूलत स्वनिगलय् पार्किंगया निंतिं धकाः नक्सा पास यानातये धुंकुथाय् येँ महानगरपालिकां कडाइ यानां न्ह्यां वनेमाःगु हे दु । तर थ्व बाहेक नं न्यूरोड लागायात धकाः पार्किंगया समस्या समाधान यायेगु कथं तिंख्यलय् स्वंगूतल्लाया अण्डरग्राउण्ड पार्किंग लिसें मेगु थी थी सुविधा तयाः पार्किग दयेकेगु खँय् स्वनिगलय् ल्यनाच्वंगु छुं छकू चकं थाय्यात नं भौतिक संरचनां हिइकेगु ज्याखँ स्थानीय सरकारया जुयाच्वंगु दु ।
न्यूरोड क्षत्रया पार्किंगयात स्वयेगु खःसा न्यूरोड जःखः हे अनेकौं शपिंग मल दु । हरेक शपिंग मलया थःगु हे पार्किंग दु । तिंख्यःया क्षेत्र आसपास स्वयेगु खःसा सिभिल मल, चाइना टाउन शपिंग सेन्टर, काठमाडौं मल, पशुपति प्लाजा, रंजना मल लिसें अनेकौं मल दु । उकथं हे धरहराय् नं तःधंगु हे पार्किंग सुविधा बिइगु खँ न्ह्यथनातःगु दु व हे कथं न्हूगु बस पार्क स्यंकाः नं अन मल व पार्किंग दयेकातःगु दु । थ्व ल्याखँ स्वयेगु खःसा न्यूरोडया निंतिं गाक्कं हे पार्किंग व्यवस्थीत यायेफइगु अवस्था नं दु । तर थुकथंया थासय् पार्किंगया व्यवस्थापन पक्षय् ध्यान मब्यूसे न्हूगु पार्किंग संरचनाय् वनेगु स्वइबलय् विकास थें च्वंसां थुकीं खुल्ला क्षत्रयात विनाश हे जक याइ ।
पार्किंगया आवश्यकता धैगु मोटर गाडी दुहाँ वनेत थाय् मदुथायया निंतिं खः । न्यूरोड क्षत्रय् मोटर दुहां मवंगु मखु की अन पार्किंग अर्थात गाडी दिकाः तयेत समस्या खः । थुगु क्षत्रय् आः न्ह्याक्व पार्किंग दुसा गाइ मखु, दक्वसिया हे ज्याखँ न्यूरोड केन्द्रीत जुइ । उकिं झीसं थुइकेमाः की तिंख्यलय् न्हूगु पार्किग दयेकाः थुकीया समाधान जुइ मखु । थुकीयात गुकथं व्यवस्थीत यायेफइ धैगु अध्ययन जुइमाः। थुगु क्षत्रय् एतिहासिक एवं सांस्कृतिक सम्पादा नं स्वानाच्वंगु लिं थुकी स्थानीय नेवाःतय्गु आस्थाय् नं छुं कथं घाः मजुइमाः धैगु खँय् स्थानीय सरकारं बांलाक्क हे बिचाः यायेमाः ।
