न्ह्यो खँ
नेपालभाषाया म्यूजिक भिडियोत अकसर छगू हे विषय वस्तुया जुयाच्वनिं । मतिनाया विषय। निम्ह मिसा मिजं । मिजंयात मिसा यइ वा मिसायात मिजं यइ, पार्कय् वनां प्याखँ ल्हुइ । क्वचाइ । परम्परागत रुपं हे म्यूजिक भिडियो बाखं थथे हे जुया च्वनिं । थज्योगु हे बाखनय् मेगु छगू म्यूजिक भिडियो खः ज्योति म्यूजिकया न्ह्यब्वयाय् लिफः लिफः । आशिष भडेलं हालातःगु थुगु म्येय् खःसा थुगु म्ये विश्वास वज्राचार्यं निर्देशन यानातःगु दु ।
म्ये
नेपालभाषाया सांगीतिक ख्यलय् न्हू न्हूगु सवाः बिइगु कुतः जुयाःच्वंगु दु । पारम्परिक नेवाः म्ये सिबें भचा पाक्क आधुनिक पह बियाः लिफः लिफः म्ये कम्पोज जुया च्वंगु दु । म्येया शब्द सामान्य नेवाः म्ये कथं हे जक दु । छम्ह मिसायात सम्बोधन याना म्ये हाले माल धाःसा गज्योगु खँग्वः छ्यलिइगु खः अज्योगु हे कथंया शब्द जक छ्यलातःगु दु । म्येया सः आशिष भडेलया दु । आषिश भडेल थौंकन्हे अमेरिकाय् खःसा वय्कः नेपाली संगीत ख्यलय् नं नांजाम्ह कलाकार खः । सन् २००९ निसें हे सांगीतिक क्षत्रय् पलाः तयादीगु खःसा थ्व वय्कःया न्हापांगु नेपालभाषाया म्ये खः । वय्कः ख्वप मूलयाम्ह म्येहालामि खः । आषिशया सलय् स्थानीय सवाः दु । थुगु म्ये पुस्कर प्रजापति व संगीत संगीत संयोजन फिरोज बज्राचार्यया दु ।
भिडियो
थुगु भिडियोस नेपालभाषाया स्वम्ह उदीयमान कलाकारपिं अनुज शाक्य, किरण जोशी, विष्णुराज शाक्य व रुक्साना महर्जन्या अभिनय दु । सुधीर श्रेष्ठ व रिश्मा श्रेष्ठ मू कलाकार कथं दु । आषिश भडेल नं थुकी म्येया मेकिंगय् खनेदु । म्येया निर्देशन विश्वास बज्राचार्यं यानातःगु दु । थुगु म्येय् छम्ह नच्चाम्ह मिसाया सौन्दर्य खनां स्वम्ह मिजंत मोहित जुयाः उम्ह मय्जुयात ह्ययेकेत स्वयाच्वंगु खनेदु । म्येया खँग्वः कथं हे भिडियो न्ह्याकातःगु दु । म्येया कोरियोग्राफी राजीप बज्राचार्य व उपासना शाक्यं याना तःगु दु । म्येया संगीत कथं हे कन्टेम्पोरी डान्स स्टेपस् बियातःगु दु । कोरियोग्राफी विशेष मेहनत यानातःगु खंके फइ । जात्राया लकस क्यनेगु निंतिं लाखे नं प्याखँ हुइका तःगु दु । भिडियोया छायाँकन व सम्पादन सोहन मानन्धरं यानाःतःगु दु ।
विश्लेषण
ल्यासे ल्याय्म्हया मनयात विशेष ध्यानय् तयाः थुगु म्ये च्वयेगु लिसें छायाँकन यानातःगु दु । छम्ह मिसाया सौन्दर्य खनाः स्वम्ह ल्याय्म्हपिं मोहित जुइगु अले व ल्यासेयात प्याखँ हुलाः ह्ययेके फइ धैगु मनस्थीति थुपिं स्वम्ह ल्याय्म्हतय्गु दुसा, मेम्हेस्यां लमियात धायेकाः खँ पक्का यानां म्ये क्वचायेकी । तर स्वम्ह आशांद्यापिं ल्याय्म्हत धाःसा हाकनं मेपिंस्वम्ह ल्यासेत खनां ल्यू ल्यू वनी । ल्यासे ल्याय्म्हया अवस्था थथे हे जुइगु खः धकाः क्यनातःगु दु । म्येया टाइम लाइन स्वयेगु खःसा थुगु म्ये थौंया हे ईया खः छाय्धाःसां इमिसं पुनांतःगु वसतं थौंकन्हेया फेशनयात नालाच्वंगु दु । डान्स स्टेप नं तसकं हे आधुनिक पहया दु । उकिं थुगु म्यें थौंया ईयात इंगित यानाच्वंगु दु । जात्राया इलय् मिजं मिसाया मिखा ल्वाइ धैगु खँ थुकिं धयाच्वंगु दु । मतिनाय् तक्यनेगु ई जात्राया ई खः धकाः धयाच्वंगु दु । थुगु म्यें क्यनाच्वंगु मेगु सन्देश कथं सुं ययेवं हे मतिना ताः मलाःसां आःया पुस्ता निराश मजू, थौं मखुसा कन्हे हाकनं मेम्ह हे यइ वा लुइ धैगु खँय् नं बः बियाच्वंगु दु ।
मतिनाया परिभाषा आः न्हापासिबें पानाच्वने धुंकल । लभ एट फस्ट साइट धकाः छगू धापू दुसां थौंया इलय् मतिनाया निंतिं सिइ हे माः वा व मदयेकं जीवन हे मन्ह्याइगु धैगु मजुइ धुंकल धकाः ब्वयातःगु दु । नच्चागु मतिनाया पह थुकी दुथ्यानाच्वंगु दु ।
उकथं हे मेगु छगू मतिनाया सन्देश नं थुकी दु की यदि सुं धात्थें यःगु खःसा ल्यू ल्यू वनां प्याखँ हुलेगु सिबें लमियात धायेकाः हे इहिपाः यायेगु सन्देश नं सुलाच्वंगु दु । उकिं थुगु भिडियोलय् नितां हे खँ गज्यागु मतिना ताः लाइ व गज्योगु मतिना क्षणिक जुइ धकाः नं सन्देश लुइके फइ ।
आलोचना
थुगु म्ये च्वसा भचा पुलां खने दु । थनिं २० २५ र्दँ न्ह्यः नेपालभाषाया म्ये धकाः एफ एमय् थ्वइगु थें कथंया खँग्वः थुकी दुथ्यानाच्वगु दु । छंगु थ्व बांला, छंगु व बांला । येँ, यल ख्वपय् खना । राजामति, पानवती, हिरालानी, पशुपति, स्वयंभू थें जाःगु पारम्परिक वा क्लिश शब्दं जायाच्वंगु दु । म्येय् आधुनिक संगीत दु तर शब्द पुलां पहया जुयाः च्वं । उकथं हे आषिश भडेलया सलय् स्थानीय पन दु तर म्ये धाःसा आधुनिक संगीत व पारम्परिक पहया शब्दया मिश्रण जुया च्वन। आशिषया सलय् पारम्परिक बाजं व लसय् मेमेगु म्ये न्यने दु सा न्हूगु हे पह सवाः दइगु खँय् शंका यानाच्वने माली मखु ।
अथे हे छम्ह हे म्ये हालामिया सः प्यम्ह कलाकरयात इनातःगु दु । छम्हेसिगु हे सःयात प्यम्हमच्छि कलाकारया परिकल्पना छाय् आवश्यक जुल धैगु खँय् परिकल्पनाकार व निर्देशकं धाये फयेके माः । छगु हे सलय् प्यम्ह कलकारं म्ये हालेगु इलय् भिडियो स्वःपिन्त अलमल जुइगु स्वभाविक जुइ ।
म्ये हालेगु झ्वलय् ‘छंगू रुप्’ या उच्चारण ‘रुपः’ जुयाच्वंगु दु । म्येया बिचय् ‘जातः’ खँग्वःयात संगीत कथं ल्हायकेगु निंतिं ‘जाःतः’ धकाः हालातःगु दु । म्येया थुगु ब्व न्यनेबलय् भचा अतःमतः कनेफू । म्येया संगीतया माग धायेवं हे शब्द स्यंकाः हालेगु प्रचलन अप्वयाः च्वंगु दु । थुगु खँयात वाःचायेकेमाः । चलनचल्तिइ झीसं गथे न्वानाच्वनाःगु खः व हे कथं शब्द उच्चारण जूसा म्येया सवाः अझं थहां वइ ।
लिखँ
नेपालभाषा म्यूजिक भिडियो ख्यलय् कन्टेम्पोरी भिडियोत बुलुहुँ अप्वयावःगु दु । कन्टेम्पारी डान्स व मनमोहक कोरियोग्राफि ध्यान वनाच्वंगु दु । ज्योति म्यूजिकया युट्युबय्नं थुगु म्ये १०० प पुले धुंकल । थुगु म्येयात थौंया पस्तां ययेकाच्वंगु नं संकेत वया च्वंगु दु । आषिश भडेल पाखें मेमेगु न्हूगु नेपालभाषाया म्ये याकनं वइ धकाः झीसं आश याये ।
