नेपाल संवत्या न्हूदँ छगू अवसर खः कि, छगू आन्दोलन खःकि, छगू उत्सव खः वा छगू संघर्ष खः धैगु खँय् नेवाःतय्सं वाः चायेकेमाः । दँय्दसं हे नेपाल संवत् न्हूदँया इलय् नेवाःत दथुइ एकता सिबें विवाद व अन्यौलया अवस्था ब्वलना वःयाच्वंगु खँ नं आः वाःचायेकेमाः ।
यदि नेपाल संवत् ११४३ आर्थिक गतिविधिया कारोवार यायेगु खःसा नेपाल संवत्यात छगू आर्थिक कारोबारया ई कथं विकास यानां यंके माल । बजारीकरण लिसे वजार व्यवस्थापनया अवसर कथं जुइमाल। दँय्दसँ हे खुघौया व्यापारं दँेय् न्यंकया व्यापार यायेगु ताःतुनाः न्हूदँ खुन्हु उत्साहयात अर्थय् रुपान्तरण यायेगु रणनीति माः । यदि थौंया इलय् न्हूदँ स्थानीय करण जुइधुंकुगु खःसा थीथी थासय् हे झीसं स्टल वा बजार दयेका वनेगु रणनीतिइ बिचाः यायेमाःगु खः । तर झीसं थुकथं बिचाः याये मफूनी ।
यदि नेपाल संवत्या न्हू दँ छगू उत्सव खःसा सकलसिनं उत्सवया माहौलय् भिंतुना कालबिलया अवस्था दयेमाः । सुयां योपिन्त जक भिंतुना बिइगु वा मयोपिन्त उत्सवय् संलग्न मयायेगु रणनीतिं निषेधया राजनीति मयायेमाःगु । उत्सव येँ यल व ख्वप छस्वाः याना यंकेगु रणनीति जुइमाःगु जक मखुसे देन्यंक हे जुइमाःगु छाय्की आः नेपाल संवत् राष्ट्रिय संवत् धकाः मान्यता बिइधुंकुगु अवस्था खः ।
यदि नेपाल संवत्या न्हूदँ छगू आन्दोलन खःसा अझ आन्दोलन यायेगु धैगु छगू रोडम्याप दयेके माः। पंचायत काल निसें हे नेपाल संवत्यात छगू आन्दोलनया रुपय् न्ह्याकाः वयाच्वंगु खः । न्हूदँया भिंतुना कालबिलया लकसय् देशय् सत्ता हिलेगु आन्दोलन जुयाच्वंगु इतिहास नेपाल संवत्या दु । तर नं झीगु आन्दोलन सिधःगु मदुनिं । हरेक वर्ष झीगु संघर्ष जारी दनी धकाः न्ह्यलुवाःतय्सं मंचय् न्ववाइ । नेपाल संवत्या तिथियात सरकारं ज्याखँया तिथि दयेकूगु मदुनी ।
यदि नेपाल संवत्या न्हूदँ संस्कार खःसा सकस्यां छगू हे इलय् न्हूदँ हने माःगु । न्हूदँयात राष्ट्रं मान्यता बिइधुंकाः थ्व नेपालया राष्ट्रिय संवत् जुइ धुंकाः १३ किमिया दुरी हे छन्हु न्ह्यो व छन्हु लिपा न्हूदँ हनेगु मजुइमाःगु । ईया फरक जुसाः जक विश्वया छुं छुं देशय् व नेपालय् दिन हे पानाच्वने फू तर नेपालय् हे दुने, छुं किलोमिटरया दूरी न्हूदँ पायेमाःगु बिषय्लय् छुं ठोस खँ पिमदं ।
उकिं नेपाल संवत् न्हूदँयात छगू उचित लँपुइ यंकेगु मार्ग निर्देशन बिइफूम्ह न्ह्यलुवाः झीगु न्ह्योने मदुनी । नेपाल संवत्या न्हूदँयात गुकथं छ्यलाः क्षणिक लाभ व क्षणिक ग्लायमरय् सकलें तक्यनाच्वंगु दु ।
स्थानीय सरकारया पहलय् नेपाल संवत् हनाः जिम्मेवारी हस्तान्तरण लिसें नीति निर्माण यायेमाःगु थौंया आवश्यकता खःसा झीसं सदां हे छुं लाभया आशाय् झी च्यः जुयाः मेपिन्त दबुलिइ प्याखँ हुइकाच्वना । कन्हेया न्हूदँ स्थानीय सरकारया ग्वसालय् अले झी पाहाँ जुयाः वनेगु मनस्थीति हिइकेमाःगु सोचया विकास यायेमाःगु दु ।
