न्हूदँ नसं ११४२ निसें येँ महानगरपालिकाया स्थानीय स्कुललिसें नीजि स्कुलय् नेवाः कला संस्कृतिया गतिविधि ब्यापक जुयाच्वंगु खंके फइ । स्थानीय तहलय् स्थानीय विषय अध्यापन जुइमाः धकाः संविधानं बियातःगु हक छ्यलेगु निंतिं स्थानीयतहया सरकार न्ह्योने वयेवं हे स्थानीय ब्वनेकुथिया स्वरूप विस्तारं हिलावःगु दु । स्थानीय विषयया खँय् सकलें हे भचा अलमल जूगु खने दु छाय्की यक्वसिनं थन अध्यापन जुयाच्वंगु धैगु नेपालभाषा धकाः तायेकाच्वंगु दु । तर खँ धाःसा थथे मखु । स्वनिगलय् बसोवास यायेधुंकाः स्वनिगःया रीतिथिति थन बसोवास यानाच्वंपिं न्ह्यागु जातिया मनुखं नं थुइकेमाः, सिइकेमाः धैगु हे उद्देश्यं येँ देय् म्हसीके पाठ्यक्रमया निर्माण जुयाच्वंगु धैगु खँ थुइके माः ।
न्हूदँ ११४२या लसताय् स्वतस्फूर्त रूपं न्हूदँ ११४२या भिंतुना ¥यालिइ स्थानीय स्कुल, स्यनामि व स्कुलया विद्यार्थीया सहभागीतां छगू न्हूगु युगया शुरुवातया संकेत बियाच्वंगु दु । न्हूदँ खुन्हु थुकथं स्थानीय स्कुलय् ब्वनाच्वंपिं गैर नेवाः लिसें गैर स्वनिगःवासीतय्गु ब्वतिं आ अप्वयावःगु खँय् झीसं वाःचायेके फइ । तर थ्व लिसें हे स्थानीय पाठ्यक्रमय् दुहांवनेगु झ्वलय् यक्वं हे हाथ्याःलिसें न्हून्हूगु अवसर नं ब्वलना च्वंगु वाः चायेके फइ ।
स्थानीय पाठ्यक्रमय् दुथ्याकातःगु समयबजिया विषय् न्हूपिं ब्वनामिपिंत थुइकेत तसकं हे थाकुइ । समयबजि झी नेवाःतय्गु मौलिक संस्कृति व नसा ज्वलं खः । थुकीया धार्मिक, सांस्कृतिक एवं पौष्टिक महत्व यक्वं हे खँ दु । सामान्य रूपं समयबजि धैगु थथे जुइ धकाः सचित्र क्यंसां थुकीया महिमायात सवाः मकायेकं थुइके फइ मखु । थुगु हे हाथ्यायात थुइकाः विश्व निकेतन मावि, त्रिपुरेश्वरया सविना महर्जनं क्लासय् सकलसित समयबजि ज्वलं छेँय् नं ज्वना वयाः सवाः कायेकुगु किपा सामाजिक संजालय् पिदन । उकथं हे हिना खड्गींं कमल मावि कमलपोखरी स्कुलया स्यनामिंं वः बिषय ब्वंके माःगु इलय् क्लासय् दुपिं सकल मस्तय्त छेँ नं वः छुनां यंका स्कुलया मेमेपिं शिक्षकपिंत नं वःया सवाः कायेकुगु इलय् नेपालभासाया शिक्षकपिनिगु कारण स्कुया वातावरण हे मेगु बिस्कं लकस जुयावंगु खँ नं कनादीगु दु । आः छुं नखःचखः वयेवं हे नेवाः स्थानीय खानाया महिमा सकस्यां बुलुहु थुइका वनिगु लिसें सवाः नं थुइके फइगु खँय् झी आशावादी जुइफइ ।
न्हूदँया पारु धुंकाः वइगु पुन्हि अर्थात सकिमिला पुन्हि थुगु दँ विशेष जुयाब्यूगु दु । स्थानीय स्कुलं विशेष गतिविधि कथं थुगुसी हलिमलि ब्वयेगु ज्याखँयात छगू आर्ट क्लास कथं नाला यंकुगु दु । वास्तवय् हलिमलि ब्वयेगु छगू कथंया लोककलाया रूपय् नं विकास जुयाच्वंगु खःसा थुगु दिं थी थी कथंया अन्न व सियातःगु बुबः लिसें चाकुहि, सकिमना नइ ।
स्कुल संचालन जुयाच्वंगु दँय्दसं हे काठमाडौं नेवाः किण्डरगार्टेनं हलिमलि ब्वज्या लिसें मस्तय्गु आर्ट कासा न्ह्याकाच्वंगु दु । थुगुसी लकडाउनया कारण स्कुल बन्द मजुइवं थुगु स्कुलं हलिमलि ब्वज्या याना कासा याःगु दु । उकथं हे यक्व हे स्थानीय स्कुलय् नं स्कुलया संलग्नताय् हलिमलि ब्वःगु किपाः समाचार जुयाः पिदंगु दु । थुगु दँ सिबें न्ह्यःतक्क नं हलिमलि ब्वयेगु तसकं हे सिमित रूपं जक सामाजिक संजालय् पोष्ट यानाच्वंगु खंकाच्वनागु खः तर स्थानीय पाठ्यक्रम प्रभावकारी रूपं अध्यापन याकेवं थुकीं लिच्वः व्यापक जूगु दु ।
स्थानीय क्षेत्रपाटीया जुद्धोदय पब्लिक मा.विइ तगिं ८य् ब्वनाच्वपिं मस्तय्सं नेवाःतय्गु वास्तुकला कथं ७खा छेँय् दयेका क्यंगु दु । स्थानीय विषयलय् नेवाः छेँ गथे जुइमाः, छेँय् ग्वतँ दइ, हरेक तँया नां छु धकाः मस्तय्त ज्ञान बिइगु निंतिं थुगु प्रोजेक्ट स्कुलया स्यनामि सृजना महर्जनं क्यनादीगु दु । स्कुलया स्वम्ह शिक्षकपिं रमा शाक्य, निभाः डंगोल व सृजना महर्जनया थुगु कुतःलिपा प्रधानाध्यापक लक्ष्मण पौडेलं मस्तय्गु मेहनत स्वयाः मस्तय्त शैक्षिक सामाग्री सिरपा बियादिल । छम्ह मचायात हःपा बिइगु निंतिं थज्योगु हे गतिविधी जुया वनेमा । कन्हे थ्व हे नमुना छेँ दयेकुम्ह मचायात देशया निंतिं छम्ह स्येल्लाम्ह इन्जिनियर जुइत हःपाः मबिइ धकाः गथे धाये मफइ ?
