महर्जन जुजु
इतिहास जक मखु वर्तमानयात कुला स्वय्बलय् नं किपुया नाला काये बहःगु आपालं खँ दु । जुजु पृथ्वीनारायण शाह व गोर्खा राज्यनापं जुगु युद्धय् निक्वः तक बुका लितछ्वयेत ताःलागु स्वनिगःया छगु राज्य किपुलिइ आःतक नं गोर्खाली सेनायाके लाका कयाःतगु हात हतियार व ज्याभः बाघभैरव आजुद्यःया देगलय् सुरक्षित दनी । गोर्खा राज्यया सेनापति तकं सहिद जूगु व पृथ्वीनारायण शाहया किजाया मिखा तछ्याना ब्यूगु इतिहास हे दु । अथे तुं देय्या हे तःधंगु व पुलांगु विश्वविद्यालय दुगु थ्व थास्य थी थी ईया आन्दोलनय् नं बहादुरी क्यनेत ताःलागु खः हे खः । २०४६ सालया जनआन्दोलनया इलय् किपुया प्रहरी चौकी सुरक्षायालागि गृहमन्त्री तकं हेलिकोप्टरं वया स्वःवगु व गोलींकया प्यम्ह सहिदपिंस सहादत जुया नां तःगु, सेनाया ट्याँकर न्ह्योने द्यना दमनयात पंगु ताःजागु इतिहास हे तिनि।
धार्मिक व ऐतिहासिक रूपं स्वनिगःया लः निकासया निंति महामञ्जुश्रीं च्वबहाःया न्हसिकाप खड्गं पाला छ्वगु व स्वनिगःया नागराज चुइका यकीं धकाः तःधं पुखू दय्का थाय् ब्युगु खँ अले व हे नागराजं वैद्य सम्ह किसानयात उपहार ब्यूगु प्वाकलं व जावाला ख्यःया जात्रा खुन्हु करुणामय् द्यःयाथाय् प्वाकलं क्यनिगु जक मखु करुणमय् द्यः या मतिनामी याकः मिसायात पूजा आजा यानांतिनि करुणामय् द्यः सालेगु न्याइगु खँ नं लुमंके बहःगु हे जुल ।
किपूया तानं कापः थायेगु ज्या, सिन्की दयेका नयेगु, सिकःमि दकःमि ज्या पाखेर नं नां जाःगु खँ इतिहासय् लुँआखलं च्वयेबहःगु ज्या हे खः ।
वर्तमानया इलय् नं किपूया म्हसिका झं झं पंचिना वयाच्वंगु खने दु । पुलांपुलांगु फल्चा, पुखू, ध्वाका पुननिर्माणया ज्याय्, बाजा गाजा व खलःयात ग्वाहाली यायेगु खँय् नं किपू यक्वः हे न्ह्यचिलाः न्ह्यने लानावयाच्वंगु खने दु । नगरन्यंकया मू मू थास्य सीसी क्यामेरा व फ्री वाइफाइ, नगरय् मचा बुपिन्त भिन्तुना व ग्वहालि, नगरबासी सुं मृत्यु जूसा विचाः हायेका ग्वहाली बीगु प्रथा, ज्याथः ज्याथिपिन्त निःशुल्क वासः इनाबीगु चलन, देश दर्शन ज्याझ्वः दयेका चाहिलेत यंकेगु नं छगू किपू देय् म्हसिकाया आयाम खः ।
स्थानीय पाठ्यक्रम दयेका नगरया मौलिक, कला, संस्कृति, सम्पदा, रहनसहन, नखःचखः अले पर्यटन जक मखु कृषि व स्थानीय अन्वेषणया खँ नं च्वछाये बहःगु ज्या खः । अझ नगरपालिका ज्याकुथिइ खस नेपालीभाषां जक मखु नेपाल भाषां नं नेवाः राष्ट्रिय म्ये हालेगु प्रचलन किपुलिं न्ह्याकुगु दु थ्व देय्न्यंकया नगरपालिकाया निंति न्हापांखुसीया ज्या खः । अथे तुं नेपाल संवत् न्हूदँया लसताय् नेपाल संवत्या तिथि क्यालेण्डर स्थानीय सरकार पाखेँ पिकया जनस्तरय् आधिकारिक व औपचारिक कथं छ्यलेगु इनाप व ज्याः नं किपूया म्हसीका जुइगु खने दु । थुजोगु थी थी आयामपाखें थःगु म्हसीका दयेका न्ह्याना च्वंगु किपू नगरपालिकाया लिंपागु म्हसिका खः कीर्तिपुर सिङ्गिङ आइडल ११४२ ।
नगरया जक मखु देय्न्यंकया ल्यासे ल्याय्म्हपिं सामाजिक सञ्जाल टिकटकय् थःगु ई, मेहनत व प्रतिभा प्वंका अनुत्पादक ज्या यानाच्वंगु व मोबाइल संस्कृतिइ मचायेक व बांमलाक्क दुबिना वनाच्वंगु इलय् किपू नगरपालिका नं न्हुदँ ११४२ या लसता चुलाका थ्व कीर्तिपुर सिङ्गिङ आइडल ११४२ धका न्हुगु आयाम न्ह्यनेहःगु खः ।
किपू नगरया मेयर भाजु रमेश महर्जनपाखें वंगु सापारु खुन्हु किपूया म्हसिकाय् न्हुगु आयाम न्ह्यब्वयाः किपूया गीत संगीतया ख्यलय् नां जाःपिं कलाकारपिन्त ब्वना थ्व खँ पितहयेवं, किपूया गीत संगीत ख्यलय् उत्साहया जागरण पिदन । झिंन्यादँ निसें स्वीदँ तकया ल्याय्म्ह ल्यासेपिन्त थःगु गायन प्रतिभा व क्षमता पित ब्वयेगु ह्वताः चुलाका इपिंपाखें सकल युवापिंत सामाजिक व मनोरञ्जन ख्यलय् ध्यान सालेगु नापं इमिगु कला प्रतिभापाखें किपुया म्हसिका पितब्वयेगु तातुना न्ह्याकुगु थ्व ज्यां देश व विदेशय् तकं सकसिगु ध्यान किपुपाखे केन्द्रित जुगु खने दु ।
खस नेपाली भाषा, नेपाल भाषा व तामाङ भाषां तक म्येँ हाला ब्वति कायेदुगु थ्व कासाय् मुक्कं झिंगुम्ह ल्यासे ल्याय्म्हतय्सं नां दुथ्याकाः ब्वति काःगु जुल । न्हापां थम्हं तु खुल्लाकथं म्येया भिडियो दयेका थःगु नां दुथ्याके बीगु व उकियात यूट्यूबय् तयेगु, अनंलिपा काराओके राउण्ड पाखें निर्णायक मण्डलपिनि न्ह्यने हालेगु व टप टेन ल्ययेगु वया लिपा धेंधेंबल्ला कासाया मू ज्याझ्वलय् हालेगु ग्वसाः खलःपाखें जानकारी याकूगु दु ।
मू ज्याझ्वल्य न्हाप, ल्यू व लियांल्यू जुइत ताःलापिं सहभागिपिन्त नगदलिसें थी थी सम्मानया ज्याझ्वः न्ह्याकेगु व त्वाः त्वालय् ज्याझ्व दयेका म्ये हायेकेगु, किपू देय्या म्हसिका म्यें हायेकेगु खँ पिहाँ वयाच्वंगु दु ।
कीर्तिपुर सिंगिङ आइडल ११४२य् किपू नगरपालिका दुनेया मुक्कं १ निसें १० वडा दुनेया १८ म्ह न्हू प्रतिभावान कलाकारपिन्सं ब्वति काःगु दु। ने.सं. ११४१ कछलाथ्व द्वादसी खुन्हु किपूया नेपालभाषा एकेदेमिया हलय् छगू मुँज्या याःगु खःसा निगूगु चरणय् हालेत म्ये नं ल्यःगु खः । कीर्तिपूर सिंगिंङ आइडलया कजि हरिशरण साय्मिलिसें ग्वसाः खलःया निर्णायक दुजःपिन्सं ज्याझ्वःया मूल्यांकन याःगु खः । ज्याझ्वलय् ग्वसाः खलःया दुजःपिं किपूया नांजाःपिं संगीतकःमिपिं ज्ञानेश्वर निभाः, वीरप्रसाद भन्सारी, गुज्ये मालाकार, न्हुच्छे दर्शन, तीर्थ माली, सतीश महर्जन, कृष्णहरी महर्जनलिसें थीथी संगीतकःमि दुजःपिनिगु उपस्थिति दूगु खःसा प्रचारप्रसार विभागया दुजःपिं ज्ञानकुमार महर्जन, नविन जोशी, दुर्गालाल शाही, प्रताप महर्जनपिनिगु नं उपस्थिति दुगु खः ।
निगूगु चरणया कासा नेपालभाषा एकेदेमिया हलय् हे जुइगु व उगु कासापाखें टप १० कथं झिम्ह कासामि ल्यइ । स्वंगूगु चरणया ग्राण्ड फिनाले कासा याइ । झिम्ह कासामिया दथुइ धेंधेंबल्ला याकाः स्वम्ह आइडलपिं ल्ययेगु व उपिं स्वम्ह आइडल दुने न्हाप, ल्यू व लियांल्यू लाःपिं कासामिपिन्त छसिंकथं न्ययद्वः, पीद्वः व स्वीद्वः तका सिरपा लिसें ट्रफी मेडल व थीथी सिरपा बिइगु किपू नगरपालिकां ग्वसाः ग्वःगु दु ।
थ्व हे झ्वलय् कीर्तिपुर सिंगिङ आइडल ११४२या निगूगु चरणया कासा किपूया २ वडाय् च्वंगु नेपालभाषा एकेदेमिया हलय् क्वचाःगु दु । १८ म्ह कासामिपिन्सं कराओके म्यूजिकय् म्ये हालाः उगु निगूगु चरणया ज्याझ्वः क्वचाःगु खः । १८ म्ह कासामिमध्ये उगु निगूगु चरणं झिम्ह कासामि टप १० कथं ल्यये धुंकुुगु दु ।
आइडल ११४२य् प्रशान्त सुवेदी, जोन महर्जन, दिवेन बज्राचार्य, रसिक मालाकार, अतुल मानन्धर, निकेश मानन्धर, नफिसा मर्हजन, सुदेश महर्जन, कृपा बाँस्कोटा व एकता महर्जन उत्कृष्ट १०य् दुथ्याःगु दु ।
आः निगूगु चरण क्वचायेधुंकूगु दुसा थ्व धुंकाः टप १० दथुइ दकले लिपांगु चरण फाइनल कासा जुइ । फाइनल कासाय् टप १० कासामिपिन्सं लाईभ म्यूजिकय् थःगु म्ये न्ह्यब्वयेमाःगु जानकारी ग्वसाः खलः किपू नगरपालिकां ब्यूगु दुसा फाइनल कासा पुस महिनाया न्हापांगु वालय् जुइगु जानकारी नं ब्यूगु दु ।
अथे हे फाइनल कासा न्ह्यः टप १० कासामिपिन्त थीथी वडाया दबुली यंकाः प्रचारात्मक ज्याझ्वः कथं सांगीतिक ब्वज्या याकेगु नं ग्वसाः ग्वयातःगु दु । कासामिपिन्त थीथी रिकर्डिङ स्टुडियो चाःहिइकेगु ज्याझ्वः नं दूगु जानकारी आइडल कजि हरिशरण साय्मिं जानकारी बियादीगु दु ।
कीर्तिपुर सिंगिङ आइडल ११४२ कासाय् न्हाप लाःम्हेसित ५०,०००, ल्यू लाःम्हेसित ४०,००० व लियांल्यू लाःम्हेसित ३०,००० तका दां सिरपा लःल्हायेगु ग्वसाः दूगु खँ ग्वसाः खलः कीर्तिपुर नगरपालिकां धाःगु दु ।
