किपू नगरपालिकाया ग्वसालय् नेपाल संवत ११४२ न्हूदँया लसताय् कीर्तिपुर सिंगिङ आइडल ११४२ क्वचाःल । किपू नगरपालिकाया प्रमुख रमेश महर्जनं नगरपालिकाया ज्या धैगु सम्पदा पुनःनिर्माण व निर्माण वा विकासया ज्या जक मखुसे नगर दुनेया युवावर्गपिनिगु प्रतिभायात कदर यानाः उजागर यायेगु नं स्थानीय सरकारया दायित्व खः धकाः न्ववानादील । ज्याझ्वलय् प्रमुख महर्जनं कासाय् न्हाप, ल्यू, लियांल्यू लाइ तर व छुं नं मखु, कीर्तिपुर आइडलय् ब्वति काःपिं सकल कलाकारपिं व टप टेनय् लायेत ताःलाःपिं सकल कलाकारपिं कीर्तिपुर आइडल खः, उकिं थःगु प्रतिभायात निरन्तर रुपं न्ह्याकेत आग्रह यासें सकलसित भिंतुना देछानादिल ।
किपूया पांगाय् स्थीत कीर्तिपुर सिनेप्लेक्सय् जूगु कासाय् किपू नगरपालिका ४ वडाया प्रशान्त सुवेदी न्हाप लात । किपू नगरपालिका ३ कुतिसाया अतुल मानन्धर ल्यू व किपू नगरपालिका ५ पांगाया जोन महर्जन लियांल्यू लात । किपू नगरपालिकाया प्रमुख रमेश महर्जनं ट्रफी व मेडल लःल्हानादीगु खःसा उपप्रमुख सरस्वती रिजाल खड्कां दसिपौ लःल्हानादील । कीर्तिपुर सिंगिङ आइडल ११४२ य् उत्कृष्ट झिम्ह दथुइ धेंधेंबल्ला जूगु खः । कासाय् न्हाप लाःम्ह कीर्तिपुर सिंगिङ आइडल प्रशान्त सुवेदीयात नगद न्ययद्वः तका व ट्रफी, ल्यू लाःम्ह आइडल अतुल मानन्धरयात पीद्वः तका व ट्रफी व लियांल्यू लायेत ताःलाःम्ह आइडल जोन महर्जनयात स्वीद्वः तका व ट्रफी लःल्हाःगु खः ।
किर्तिपुर अाइडलया निर्णायक मण्डलय् संगीतकःमि तीर्थ माली, ज्ञानेश्वर निभाः, न्हुच्छे दर्शन, सन्तोष महर्जन, सतीश महर्जन, राजु महर्जन (कटुम्ब ब्याण्ड), रुविन श्रेष्ठ (कुटुम्ब ब्याण्ड), कृष्णहरि महर्जन, रत्नशोभा महर्जन, दिपा महर्जनलिसें स्वयं आइडलया कजि हरिशरण सायमि नं च्वनादीगु खः ।
ज्याझ्वलय् किपूया बरिष्ठ संगीतकःमि ज्ञानेश्वर निभाःयात श्रष्टा साधना सम्मानपाखें हंगु खः ।
ज्याझ्वलय् ग्वाहालि यानादीपिं सकल ग्वाहालिमि, संचारमाध्यमलिसें कलाकार, निर्णायक मण्डल, आइडलया लाईभ ब्याण्ड संगीतकःमिपिन्त सुभाय् पौ लःल्हाःगु खःसा निर्णायक मण्डलपिन्त मतिनाया चिं नं लःल्हाःगु खः ।
