छुं ईया नितिं जि व्यवसायिक रूपं जीवन न्ह्याकेत भारतया दिल्लीइ वनाच्वनागु खः तर कोरोनाया कारणं जि नेपालय् लिहांवये मफूत । छगू ताः ईया अन्तरालय् जि नेपाः लिहांवयाः । थन सकलें नापलाना न्ह्यइपुसे नं च्वं तर जितः छता खँ छु ताल धाःसां थन जि २ ३ बर्षया अन्तरालय् जितः नेपालभासाया मनोरंजन ख्यलं ल्वमंकलला धैथे ताल । छुं ई तापाय््वं हे जि नं छुं भचा तापानावन थें जितः ताल ।
नेपालासाया मनोरंजन ख्यलय् धायेगु खःसा न्हापा सिबें यक्व हे बांलानाच्वंगु खंका । तर शायद लकडाउनया कारणं उलि प्याखँ निर्माण जुयाच्वंगु खने मदु । अय्नं म्युजिक भिडियो धाःसा धायेथाय् मदयेक हे बांलाना च्वंगु दु । तसकं हे लयताः वः म्युजिक भिडियोया विकास जूगु खनां ।
न्हू न्हूपिं कलाकार नं यक्व हे वयेधुंकुगु अवस्था दु, नेपालभाषाया मनोरंजन ख्यलय् । सदां छम्ह हे कलाकार न्ह्याब्लें छगू हे थासय्ला च्वने फइमखु तर जितः ताःगु छता खँ छु धायेबलय् दिल्लीइ जिं मोडलिंग व थी थी इभेन्टय् ज्या यानाच्वनागु दु । उकिया आधारय् धायेगु खःसा दिल्लीइ ज्या यायेगु तरिका भचा फरक । अन न्ह्याम्ह हे तःधिम्ह वा चिधिम्ह कलाकार जुसां कलाकार धालकी सकस्यां हे सम्मान याइ । इमिगु लागी अल्लग हे सुविधा दइ । तर इपिं अन अनुशासनय् नं च्वने माः । दकलय् तःधंगु अनुशासन धैगु हे ई खः । इलय् पाय्छि इलय् थ्यंकाः ज्या यायेमाः । लिसें गनं सुटिंग वा फोटोशुट जुसां नं किपाः वा प्याखँ पिमदंतले किपा पितबिइक मज्यु तर झीथाय् धाःसा सुटिंग यायां हे टिकटक वा किपाः हे तयाच्वंगु दइ । नेपालभाषाया मनोरंजन ख्यलय् थज्योगु हे छुं छुं खँ सुधार याना यंकेमाली थें ताः ।
भिंतुना जोशी
(कलाकार)
नेपालभाषाया मनाेरंजन ख्यःया यथास्थीति छिं गथे खंका दिया ? न्ह्यसःया लिसः ब्युसें कलाकार भिंतुना जाेशी
