नेपालभासाया पत्रकारीता ख्यः थौंकन्हे गुलि दयनीय अवस्थाय् लानाच्वंगु दु धैगु खँ थुइकेगु खःसां थौं श्रव्यदृष्य मार्फत विद्युतीय संचारमाध्यायमय् नेपालभासां समाचार वयाच्वंगु गन दु धैगु खय् झीसं वाःचायेके फइ । थौंया इलय् नेवाः टेलिभिजन धकाः न्ह्याक्व हे संख्याय् दुसां नेवाः समाचार धाःसा प्रशारण जुयाच्वंगु खंके थाकु । समाचारया नामय् इमेज च्यानलय् छगूयां छगू जक हे नेवाः समाचार प्रशारण जुयाच्वंगु दु । व नं सुथसिया १० बजे जक ।
नेवाः च्यानल वा नेपालभासाया टेलिभिजन धाःसां नेवाः समाचार तकं ज्याझ्वः तयार यायेमफुगु पत्रकारीता ख्यःया निंतिं छगु हाथ्याः खः । कि सकस्यां नेवाः मनोरंजन च्यानल धकाः न्ह्यां वनेमाल मखुसां छुं कथंया पहल नेवाः टिभि धकाः वयाच्वंपिंसं नं याये माल।
संचार माध्यमय् छगू औपचारिकता वा आधिकारीता समाचारं बिइगु याः। समाचार दतकी तिनि हे झीगु सक्षमता वा ज्याखँयात औपचारीकता दइ तर नेवाः टेलिभिजनया नामय् केवल नेवाः म्ये जक हे थ्वयेकेगु जुयाः वन धाःसा टेलिभिजन चायेकेगुया उद्देश्य छु धैगु खँय् न्ह्यसः नं थने माः । समाचार छगू मवयेवं गनं छु जुयाच्वन धैगु खँय् आधिकारीकता दइ मखु । सुनां छु खःगु यात वा मखुगु यात धैगु खँय् नं छुं सिइके फइ मखु । अले केवल नेवाः टेलिभिजनया नामय् नेवाः म्ये हायेका तयेगुया आज्जु छु खः धैगु वाःचायेकेमाः । थौंया स्थीति स्थानीय सरकार दये धुंकाः झीसं नं छुं कथंया आयोजना वा परीयोजना दयेका ग्वाहलि कायेफइगु स्थीति दु । अझं नगरपालिकायात धयाः हे छुं पहल याये फइगु स्थीति नं मदुगु मखु । तर छगू अधिकारपूर्ण ज्याया निंतिं धाःसा झी न्ह्यचिले मफयाच्वंगु दु । पत्रकारीताया शक्तियात म्हो आलंकन यानाच्वंगु दु ला धैथे वाः चायावयेफू छाय्धाःसां लुमंकेबहगु घटना नं छगू जूगु दु की इमेज च्यानलं सुथय् जक समाचार क्यना बहनीया समाचार क्वपाल धकाः बक्तव्य पिकागु संस्थां नेपालमण्डलं समाचार बन्द यातं गनं छुं छकु नं खँ पिकायेमफू ।
पत्रकारीता ख्यःयात छगू आज्जु कथं न्ह्येने यंकेत कुतः मगानाच्वंगु खँय् झीसं न्ह्यलं चायेके मफूनी । झी धाःसा नेपाःयाम्ह न्हापांम्ह पत्रकार हे धर्मादित्य धर्माचार्य धकाः झ्वातायात स्वाँमां क्वखायेकाच्वना, अले नेपाःया न्हापांम्ह पत्रकार संघया अध्यक्ष सत्यबहादुर श्रेष्ठ धकाः दँय्दसँ बुदिं हनाच्वना, भाषण यानाच्वना तर वय्कःपिंसं क्यंगु लँपुइ न्यासिवनेगु सिबें वय्कःपिंत देवकरण यायेगु लँपुइ न्ह्यानाच्वंगु दु ।
थौंया स्थीतिइ दकलय् प्रभावकारी माध्यम धैगु हे बिद्युतीय संचार माध्यम खः, थुकीयात झीसं प्रभावकारी रुपं छ्यलेगु नितिं झीपिं हे चुकेजुयाच्वनागु खँ वाः चायेकेमाः । थौंया स्थीतिइ सामुदायिक हित सिबें व्यक्तिगत हितया निंतिं पत्रकारीता जुयाच्वंगु निषकर्श थुकीं पिकाये ज्यु छाय्की समाचार बिना झी मनोरंजनय् जक सिमित जुइत स्वयाच्वनागु दु।
