नेपाल संवत न्हूदँ नेवाःतय्गु निंतिं छु खः धैगु खँय् आः दुवाले माःगु अवस्था दु । छाय्धाःसां नेवाःतय्सं सिबें गैर नेवाःतय्सं नेपाल संवतया आन्दोलनं लवः कयाच्वंगु खँ झीसं वाःचायेके फयेमाः, थुइके माः । नेपाल संवत्या आन्दोलनया लिधंसाय् हे नेपाःया सत्ता परिवर्तन तकं जुइत आधार भुमिका म्हितूगु दु । थुगु हे खँयात वाःचायेकाः यक्वं हे नेतात थुगु आन्दोलनया न्ह्यलुवाः थें च्वंक न्ह्योने न्ह्योने वःगु खः । थुगु हे आन्दोलनया लिधंसाय् थी थी राजनीतिक स्वार्थ पूवंकुगु दु । थुगु हे आन्दोलन व भिंतुनाया नामय् थीथी चियापान लिसें राजनीतिक स्वापू नेवाःतय् दथुइ क्वातुना वंगु नं खः तर बिडम्बना थुलि हे जक खःकी थुगु आन्दोलनया बः कयाः मनूत थी थी ओहोदाय् ला थ्यन तर नेपाल संवत्या आन्दोलनयात उचित व्यवस्थापन यायेगु खँय् सुनां पहल याये मफूत ।
निम्ह नेवाःत मुन की हे भाषण यायेमाःगु लहरं यानां थौं नेपाल संवत्या आन्दोलन उचित सम्मान चु लाकेगु अवसरं बंचित जुजुं वनाच्वंगु दु । नेपालय् नेपाल संवत्या लहरयात मूर्तरूप ब्यूम्ह पद्मरत्न तुलाधर मदयेवं हे थी थी अदुर्दर्शी नीति नालेवं थौं नेपाल संवत्या आन्दोलन प्रभावकारी जुयाच्वंगु मदु । आन्दोलनया मर्म मथुल ला धैगु निष्कर्ष पिहांवयाच्वंगु खनेदु । शंखधर साख्वाःयात राष्ट्रिय बिभूति धोषणा याये धुंकाः अले नेपाल संवत्यात राष्ट्रिय संवतया मान्यता दये धुंकाःनं कार्यान्वयन पक्षय् झी चुके जुयाच्वंगु खँय् नेपाल संवत्यात राष्ट्रिय रूपं हने धकाः नारा थ्वयेकाच्वंपिं चुके जुयाच्वंगु दु ।
थुगुसीया न्हूदँ कोरोनाया बाहनाया तयाः नेवाःतय्त छःधि छप्पं जुइत उर्जा ब्यूगु उद्यम स्थलयात मसां थें सुनसान यानां भिंतुनाया कालबिलया लकसयात निर्मूल यायेगु गनं नेवाःतय्गु एकतायात स्यंकेगु षडयन्त्रया छुं पहल ला मखुला धकाः बिचाः यायेमाःगु अवस्था दु । छाय्धाःसां छपुचः मनूत जक मुनां सभागृह दुने च्वनां भिंतुना कालबिल यायेगु ग्वसाः ग्वये फुपिंसं बसन्तपुरय् व्यवस्थीत याना न्हूदँ हनेगु बिचाः याये मफूत । गुलि आस्था ज्वनाः वःपिं मनूत बसन्तपुरय् वयाः आशां द्यानावंगु दु ।
नेपाल संवतया आन्दोलन लिसें भिंतुनाया कालबिल देशव्यापि रूपं जुयाः वनेमाःगु खः, तर स्वन्तिया तिथि लिसें हे गड्बडिइ नेवाःतय्त बिभाजन जुइवं मध्यम मार्ग ल्यया न्ह्यान्ह्यापिं न्ह्यान्ह्याथे याः धकाः न्ह्लुवाःत सुम्क च्वंगुया लिच्वः नेवाःतय्सं याकंनं हे हाकनं फये मालितिनि । नेपाल संवत् सकल नेपाःमिया खः धैगु छगू एजेण्डा तकं दयेके मफूगु खनेदु । निदँ तक्क भिंतुना राय्लि मजुइवं आ स्वक्वःगुया पलेसा जुइगु राय्लि गथे जुइ धकाः आः वंनिसें हे लकस तयार यानां वनेमाःगु खनेदु ।
