किपू छगू ऐतिहासिक व साँस्कृतिक महत्वं जाःगु नगर खः लिसें नेपाःया कला व संस्कृतिया जगतय् किपुया म्हसीका बिस्कं दु । किपू नगरं देय्यात गुलि कलाकार बिल धइगु ल्याःचाः हे मदु । थ्व छगु अनुसन्धानत्मक धलः दयेकेगु हे विषय जुइफु । तर थ्व च्वसुतिइ संकिपा ख्यलय् लगे जुया च्वंपिं कलाकारबारे जक कुलेत्यना ।
थथे कुलेबले दकले न्ह्यने लाःवइगु नां हिसिला महर्जनया नां खः । वयागु वास्तविक नां धाःसा हिराशोभा महर्जन खःसा वया केंहे रत्नशोभा महर्जन नं कलाकारला खः तर अभिनय याइम्ह मखसे म्येहालामि खः । किपुलिइ गीत संगीत ख्यलय् लगेजुया च्वंपिं आपालं कलाकारपिं दु । वयकपिनिगुबारे लिपा चर्चा याये ।
संकिपा ख्यलय् खय्तला हिसिलासिबें न्ह्यः नं किपुपाखें आपालं कलाकार संकिपाया ख्यलय् थ्यंगु दुु । उकी मध्ये छम्ह जय श्रेष्ठ नं खः । न्हापांगु नेवाः संकिपा सिलुया हिरो जय श्रेष्ठ नं किपुलिइ हे च्वंम्ह खःसा नेपाःदेय्या हे नांजाम्ह फाइट डाईरेक्टर राजेन्द्र खडगी नं किपुलिंइ हे पलाः न्ह्याकुम्ह खः । छगू संजोग हे धाय्मालि कि जय श्रेष्ठ व राजेन्द्र खडगी निम्हं हेटौडालिसे स्वापु दूपिं खः । राजेन्द्र खडगीया पूर्वज धाःसा किपुयापिं हे जुया च्वन । थुकथं किपुया हे म्ह्याय् मचा हिसिला महर्जनया नां न्ह्यःने लाःवःगु खः । हिसिला महर्जन निगूगु नेवाः संकिपा राजमतिइ मू भुमिका म्हिता राष्ट्रिय चलचित्र पुरस्कारय् कृटिक्स च्वइस् अवार्डय् बेष्ट हिरोइनया सिरपा त्याकेत ताःलाःम्ह कलाकार खः ।
हिसिलासिबें यक्व न्ह्यः संकिपा ख्यलय् पलाः न्ह्याकूपिं मध्ये पवन जोशी, नबीन जोशी, रामकृष्ण धिनां, रामभक्त रमझम, गोपिलाल महर्जनया नं ल्वमंक फइमखूगु नां खः । दबु प्याखँया ईलंनिसें पलाः न्ह्याका च्वंपिं थुपिं कलाकार मध्ये पवन जोशी छम्ह कलाकार जक मखसे फिल्म डाइरेक्टरया रूपय् पलाः न्ह्याकावयाच्वंगु दुसाः नेवाः म्युजिक भिडियो ख्यलय् नं दुग्यंगु योगदान दुम्ह खः । वयकलं “बांला मय्जु” संकिपापाखें राष्ट्रिय चलचित्र पुरस्कारतकं त्याके धुंकुम्ह निर्देशक खः ।
नबीन जोशी “सिलु” धुंकाया न्हापांगु प्यंगु न्यागु भिडियो नेवाः संकिपा मध्ये “चरित्र” नांयागु नेवाः संकिपाया हिरो खःसा लिपा वना छम्ह क्यामेरापर्सनया रूपय् थःगु यात्रा न्ह्याकुम्ह थौंकन्हे नेवाः एच डि टिभि न्ह्याका च्वनादीगु दु ।
नेपालभासाया संकिपा ख्यलय् किपूया मेम्ह छम्ह म्ह्याय् मचा खः पल्पसा डंगोल । पल्पसा डंगोल नेवाः ख्यलय जक मखु से नेपाः न्यंक हे नांजाम्ह कलाकार खः । वय्कया चम्सुरी चरित्र थुलि लोकंह्वाः की सारा नेपामि जक मखुसे नेपालं पिने नं अन्तराष्ट्रिय रुपं लोकंह्वाः । वय्कलं सत्यधरोधर्म प्याखँ दयेकादीगु खःसा आ व्याहा यानागु लच्छि मदुनि दयेकाच्वनादीगु दु ।
नेवाः संकिपा ख्यलय् जक मखु खस नेपाली भाय्या संकिपाया हिरो दिलिप रायमाझी नं किपुलिइ हे च्वना च्वंम्ह खः । छम्ह डान्सरया रूपय् संकिपा ख्यलय् दुहाँ वःम्ह दिलिप रायमाझी लिपा वना नांजाम्ह हिरो तकं जुइत ताःलातसा थौंकन्हे वय्क भाजु अमेरिकाय् च्वना वयाच्वंगु दु । हेटौंडाया ओम सिनेमाया थुवा नरेन्द्र महर्जन कलाकार मखुसां नेपाःया संकिपा बजारय् नांजाम्ह खः । थौंकन्हे चलचित्र विकास बोर्डया दुजः जुया च्वंम्ह नरेन्द्र महर्जन “लुट” संकिपाया छम्ह निर्माता नं खः । थुकथं किपुलिं संकिपा ख्यलय् न्हाय् धस्वाकेत ताःलाःपिं आपालं दु । दक्वसिया चर्चा थन सम्भव हे मदु । थनला अज्यागु छु छुं नां न्ह्यथनेगु जक कुतः जुइ ।
थथे न्ह्यथने बहगु नामय् लापिं मध्ये “थ्वला ग्यानापु स्टायल” संकिपाय् म्हितूम्ह सिर्जना महर्जन अले “सेरीव बन्जा” संकिपाय् म्हितूम्ह लक्ष्मीकुमार महर्जन नं ला । वयकपिन्सं मेमेगु नं आपालं संकिपा म्हितूगु दु । आपालं संकिपा म्हितूपिं मध्ये रवि महर्जन नं खः । निर्देशक राजेन्द्रमान शाक्य(आर एम)या “रश्मी” संकिपा लगायत आपालं नेवाः संकिपाय् ल्यू निर्देशक जुया ज्याः याना च्वंम्ह रवि महर्जनं “थःम्ह म्हूगु गाः” लगायत आपालं संकिपा म्हितूगु दुसाः “सिंहदरबार” नांयागु छगु खस नेपाली भाय्या टेलि सिरीयल नं म्हितूगु दु अले जापानी निर्देशक तोशिआकी इतों दयेकुगु नेपाली संकिपा “माई लभ — प्रमिस फर काठमाण्डु” नं म्हितुगु दु ।
किपुलिइ थौंकन्हे म्युजिक भिडियो उत्पादन याइपिं नं आपालं दयावःगु दु । अज्यापिं मध्ये ललेन्द्र शाक्यया नां नं ला । “भौमचा” नांयागु छगू संकिपाया निर्देशक ललेन्द्र शाक्य हे खः । अले “भौमचा” संकिपाया हिरोइन करिश्मा श्रेष्ठ नं किपू याम्ह हे खः । थ्व “भौमचा” संकिपाय् म्हितूपिं मध्ये आपालं कलाकारत किपूयापिं हे खः । चन्देश्वर महर्जन, बेखाराम महर्जन भिमसेनदास महर्जन थेंज्यापिं आपालं कलाकार किपूयापिं हे खःसा थौंकन्हे म्युजिक भिडियोलय् मोडल कथं म्हिता च्वंम्ह शोभा महर्जन नं किपूयाम्ह हे खः । शोेभा महर्जनया जहान राजी किपु नं संकिपा कलाकार हे खःसा वयकपिं निम्हं “बसन्त ऋतु” नांयागु फिल्मय् नापं म्हितुगु दु । थ्वहे संकिपाय् म्हितुम्ह अनु महर्जन नं किपुयाम्ह हे खःसा अनु महर्जनं नं नेवाः शर्टफिल्म व म्युजिक भिडियो म्हितुगु दु । थुकथं स्वयेगु खःसा किपूलिइ आपालं कलाकार दूगु खनेदइ ।
“मिउजियम” नांयागु तसकं बय्बय् जूगु व नेपालभाषा शर्ट फिल्म फेस्टीभलय् सिरपातकं त्याकेत ताःलागु संकिपाया निर्देशक रजिन महर्जन अले “थ्व छध्वः रेखां क्युगु” य् मू भुमिका म्हितुम्ह सरिता बज्राचार्य नं किपुयाम्ह हे खः । सरिता बज्राचार्य छम्ह प्रतिभाशाली कलाकःमि खः । वयकलं मेमेगु संकिपाया नापनापं आपालं नेवाः म्युजिक भिडियो म्हितुगुजक मखसे छम्ह मेकअप आर्टिस्ट व कोरियोग्राफर जुया नं ज्या याःगु दु । किपुयाम्ह हे राज महर्जन छम्ह फिल्म च्वमि खःसा प्रदिप खडगी धाःसा छम्ह फिल्म निर्देशकया रूपय् नांजाम्ह कलाकःमि खः । किपुयाम्ह हे पि.के. श्रेष्ठ छम्ह संकिपा च्वमि कथं पलाः न्ह्याकावया च्वंम्ह संकिपामि खःसा “थः कतः कतः थः” या च्वमि पिके. हे खः ।
थौंकन्हे “च्वापुफय्” नांयागु बीग बजेट नेवाः फिल्मया ज्या क्वचायेकेगुलिइ लगेजुया च्वंम्ह प्रदिप खडगी छम्ह स्यल्लाम्ह एनिमेटर खःसा आपालं शर्ट फिल्म व म्युजिक भिडियोया डाईरेक्टर नं खः । किपुलिइ आपालं संकिपा कलाकःमि दु । थन च्वयां साध्य हे जुइ मखु । अयसां च्वयेबले एलिसा महर्जन, अन्जना महर्जन, हिरालाल महर्जन, महेश्वरी महर्जन, विश्वराज महर्जन, कृतिका महर्जन, राजकुमार महर्जन व राजकुमार बज्राचार्य आदी थेंज्यापिं आपालं कलाकारत दुसाः मेमेपिं आपालं कलाकार दु । वय्कपिनिगु बारे लिपा लिपा नं चर्चा जुइ हे तिनी । थन संकिपा ख्यलय् दनेदूपिं मध्ये नं न्ह्यःने लाना च्वंगु नांयात जक कुलागु खः ।
