नेपालभासाया म्युजिक भिडियोया लहरयात निरन्तरता ब्युसें यलया एम्बियन्स ३६५य् थौं निपू म्यूजिक भिडियो प्रिमियर जुल । थुगु निगुलिं म्युजिक भिडियो कैलाश महर्जनया सः, संगीत व च्वसा कैलाश महर्जनया दु । निगुलिं म्युजिक भिडियोया निर्देशन सुरज नापितं याःगु दु अले निगुलिं भिडियोया छायाँकन व सम्पादन अमर चित्रकारं यागु दु । अथे हे म्येया संगीत संयोजन निगुलिं हे बुद्ध साय्मिं यानादीगु दु । क्यामरा एसिस्टय् प्रजोन पराजुली दु । मेकअप आर्टिष्ट रीना महर्जन दु । ताः ई निसें सकृय जुयाच्वनादीम्ह कैलाश महर्जनं छंगु हिसि दुगु ख्वाः व ए जि यःम्ह तिमिला बोलया म्ये पिदंगु खः ।
ए जि यःम्ह तिमिला म्यूजिक भिडियोस टिका घिमिरे, इन्दु ज्यापुनी, तुलसीराम गैरे, रोहन घिमिरे व वि.के. नेवाःया अभिनय दुथ्यानाच्वंगु दु । अतिकं हे ड्रामाटिक यानातःगु थुगु म्ये निम्ह मतिनामिया पंगःयात न्ह्यब्वयातःगु दु ।
छंगु हिसि दुगु ख्वाः .. सह निर्देशकया रुपं सुजित नापित दु । थुकी निर्देशक एवं कलाकारया रुपय् सुरज नापित हे म्हितुगु दुसा सुरजया तिरिमयजु रीना महर्जनं सुरज नापितयात साथ बियाच्वंगु दु । रियल लाइफ कपलं रील लाइफ कपलया भुमिका थुगु म्युजिक भिडियोलय् दु ।
प्रिमियर ज्याझ्वः अनुप शाक्यं न्ह्याकुगु खःसा ज्याझ्वलय् बिजयरत्न असंबरे मू पाहां कथं व धिरेन शाक्य पाहां कथं ब्वनातःगु खः । निगुलिं म्युजिक भिडियोया बिषय पेजथ्रीया सम्पादक दर्शनवीर शाक्यं नुगः खँ तयादीगु खः । नेपालभासा ख्यल् कैलाश महर्जनं निरन्तरता बियाच्वंगु व सुरज नापित नेपालभासा ख्यलय् थौंकन्हे तसकं सकृय जुयाच्वंगु खँ कुलादिल । सुझावया रुपय् म्युजिक भिडियोयात छगू टाइम लाइनय् तयेमाःगु खँय् बः बियादिलसा म्युजिक भिडियोलय् नं कलाकारया चरित्र सशक्त याना यंकेमाःगु खँ तयादील ।
पाहां धिरेन शाक्यं नेवाः म्युजिक भिडियो थौं कन्हे आपा पिदनाच्वंगु दु धासें नेवाः म्युजिक भिडियो आः स्वनिगः जक मखुसे विश्वन्यंक प्रचारय् वनेमाःगु खँ कुलादिल । मू पाहां बिजयरत्न असंबरें म्युजिक भिडियोया ट्रेण्ड थौंकन्हे तसकं पानावंनाच्वंगु खँ कुलादिसेँ म्युजिक भिडियोया विविधता बारे कुलादिल ।
पाहां धिरेन शाक्य सकल कलाकार पिंत मतिनाया चिं लः ल्हाना दिल सा मू पाहां विजयरत्न असंबरे उपस्थीत संचारकःमि पिन्त मतिनाया चिं लःल्हानादिल ।
