ईमर्ज ब्यान्ड संगीत ख्यलय् म्हसीका च्वनेमाःगु नां मखय्धुंकल । विशेष यानाः ल्याय्म्ह पुस्ताय् ला ईमर्ज ब्यान्डया फाय्न फलोअर्स गाक्कं हे दु । ब्यान्डया शुरुवाती ईयात स्वयेगु खःसा ला थुगु ब्यान्ड दयेकूगु छगू दशकं मयायेधुंकल जुइ । तर आः वयाः ‘मैंचा’ म्ये पिहां वयेधुंकाः धाःसा थुगु ब्यान्डं गाक्कं चर्चा व लोकप्रियता मुंकूगु दु । लकडाउनया ई जुन १९ या दिनय् युट्युबपाखें रिलिज जुयाः अपलोड जूगु २४ घौ दुने हे १५ हजार भ्यूज पुलावंगु थुगु म्येया भ्यूज आः थ्यंबलय् ३० लाखया न्ह्यःने थ्यनेधुंकल । ल्याय्म्ह पुस्ताया म्हुतुइ म्हुतुइ घानाच्वंगु ‘मैंचा’ म्यें ईमर्ज ब्यान्डयात स्थापित हे यानाबिल । छगू कथं धाये, लकडाउन थुगु ब्यान्डया नितिं गोल्डन अपरच्यूनिटि सावित जुयाबिल । लकडाउनं लोकं व्हाकाब्यूगु थुगु ब्यान्डया शुरुवात गुकथं जुल ले ? थ्व खँ नं छकः सीके का ।
ईमर्ज ब्यान्डया शुरुवातया खँ ल्हायेबलय् मैंचा म्येया हालामि उजं शाक्यया नां वइ । उजं स्कूल ब्वनाच्वंगु इलय् हे स्कूलया पासापिंलिसे जानाः ईमर्ज ब्यान्डया शुरुवात याःगु खः । उगु पुचःलिसें ईमर्ज ब्यान्ड छुं ई न्ह्यात । तर लिपा वनाः उजं ला म्यूजिक फिल्डय् सिरियसलि हे न्ह्याःवनेगु मन तयाच्वंम्ह जुल, मेपिं ब्यान्ड अथवा संगीतया खँय् अपाय्सकं सिरियस मजूगु जुयाच्वन । मेपिं ब्यान्ड मेम्बरतय् थःगु करीअर मेमेगु ख्यलय् हे स्वयाच्वंगु जुल । लिपा दक्वं थःथःगु करीअरया लँपुइ न्ह्याःवंबलय् ईमर्ज ब्यान्डय् उजं याकःचा जुल अथवा धाये ईमर्जं उगु इलय् दिपाः काल ।
वयां लिपा २०७३ सालय् न्हूगु टिमलिसें ईमर्ज हाकनं रिभाइभ जुल । । ईमर्ज गुकथं रिभाइभ जुल ले ? थ्व खँ नं न्ह्यइपुसे च्वं । ईमर्ज रिभाइभ जूगु बाखं न्ह्याके न्ह्यः आः इमर्जया ब्यान्ड मेम्बर्स सु सु खः व नि सीके । ईमर्ज ब्यान्डय् थौंकन्हय् भोकलिस्ट लिसें रिदम गिटारिस्ट कथं उजं हे दुगु जुल । वयां लिपा लिड गिटारिस्ट कथं रोहण शाक्यं ज्या यानाच्वनादीगु दु । अथे हे पक्र्युसनय् सबिर तुलाधर व बाँसुरीइ अमन बज्राचार्य दु ।
उजंया पुलांगु छेँ इतुम्बहालय् । लिपा उजंया परिवार डल्लुपाखे न्हूगु छेँ दयेकाः उखे हे च्वंवन । न्हूगु थाय्, न्हूपिं मनूत । उजंया खँ ल्हायेत, ई छ्यायेत अन सुं हे पासापिं मन्त । छुं दिं ला न्हूगु थासय् तसकं थाकुल । लिपा उजनं थःगु छेँया भचा क्वय् माइ गितार होम धइगु गितार लिसें म्यूजिक इन्स्ट्रुमेन्ट मीगु लिसें गितार स्यनीगु थाय् छगू खन । उगु पसः रोहणयागु खः । ई छ्यायेत थाकुयाच्वंगु अले हाकनं म्यूजिक थःत दक्कले यःगु क्षेत्र । उजं व हे माई गितार होमय् गितार सयेकः वन । थन नापलात रोहण व उजं । उजं नं म्यूजिक फिल्डय् हे करिअर दयेकेगु बिचाः दुम्ह । रोहण ला थःगु दक्वं ई संगीत क्षेत्रयात हे बियाः च्वनाच्वंम्ह । रोहणया ला ज्या हे सुथय् दंसांनिसें गितार, युकिलेले लिसें मेमेगु नं म्यूजिक इन्स्ट्रुमेन्ट्स मीगु, गितार स्यनेगु, म्यूजिक अरेंज यायेगु, गितार थायेगु, रेकर्डिङ यायेगु अले गितार स्यनेगु । निम्ह संगीतप्रेमीतय् दथुइया स्वापू व हे संगीतं हे झन क्वात्तुकाबिल । उजंया ला माइ गितार होम वनेगु, रोहणलिसे च्वनाः गितार थाथां म्ये हालेगु, म्यूजिक फिल्डया बारे रोहणलिसे खँ ल्हाल्हां ई बीगु जुयावन । न्हूगु थासय् याकःचा थें जुयाच्वंम्ह उजंयात माई गितार होम दक्कले न्ह्यइपूगु थाय् जुयाबिल ।
अन खँ वइ, सबिरया । सबिर नं संगीत धाल कि मन क्वसाःम्ह । सबिर उजंया मचाबलय्निसेंया पासा । तर उजनं म्ये हाः अथवा सबिरया नं संगीतप्रति लगाव दु धइगु खँ निम्हेसिनं मस्यू । थौंकन्हय् बिटिटिएम ब्वनाच्वंम्ह सबिरं स्कूलया इलंनिसें हे म्ये नं हालेगु यानाच्वं । ७२ सालया भुखाय् धुंकाः सबिर, उजं व रोहण नापलात । अले सबिरं रोहण व उजंया टिम ज्वाइन यात । भोकलिस्ट नापं रिदम गितारय् उजं दुगु जुल, अले लिडय् रोहण । पक्र्युसन थायेत सबिर वल । अनं ७३ सालय् वयाः स्वम्हेसिया पुचलं ईमर्जयात हाकनं रिभाइभ यात । शुरु जुल ईमर्जया यात्रा ।
स्वम्ह जानाः ईमर्ज शुरु यात । तर फ्ल्युट अथवा बाँसुरी पुइम्ह छम्ह दुसा ज्यू धइथें स्वम्हेसियां नुगलय् लुयाच्वंगु, खँल्हाबल्हा जुयाच्वंगु । उबले हे ईमर्जया फेसबुक पेजय् छगू मेसेज वल । उगु मेसेज अमनयागु जुयाच्वन । अमनं मेसेजय् च्वयाहल, ‘ब्यान्डय् फ्ल्यूट पुइम्ह माःसा जि ब्यान्ड ज्वाइन यायेत तयार ।’ छगू ल्याखं अमन नं उजंलिसे मचाबलय्निसें सतीम्ह खः । उजंया पुलांगु छेँ इतुम्बहालय्, अमनया इतुम्बहाः पिने चोखाछेँ गल्लीइ । निम्हेसिनं निम्हेसितं खनाच्वं, म्हमस्यूगु थ्यंक नं मखु । तर उलि सतीगु नं मखु । लिपा फेसबुक मेसेजपाखें औपचारिक रूपं म्हसिल धायेमाली । थ्व मेसेजलिसें अमनं ब्यान्ड ज्वाइन यात अले ईमर्ज पूवन ।
आः ब्यान्ड मेम्बरत स्वयेगु खःसा रोहण ला थःगु मुक्कं ई संगीतयात हे बियाः च्वनाच्वंम्ह जुल । लिपा नं संगीतपाखे हे मदिक्क पलाः न्ह्याकाच्वनेगु रोहणया योजना दु ।
सबिरया बिटिटिएम ब्वनाच्वंगु दु । पढाई पर्यटन क्षेत्रपाखे, आः ईमर्जया ब्यान्ड मेम्बर कथं संगीत क्षेत्रय् पलाः न्ह्यानाच्वन । लिपाया योजना छु खः धइगु न्ह्यसलय् सबिरं धाल, ‘संगीत व पर्यटन नितां नापनापं न्ह्याःवनी । झीगु हे संगीतपाखें नं पर्यटन प्रवद्र्धन यायेफइ । निगु क्षेत्र नापनापं न्ह्याःवनेफइगु जिं खना ।’
उजं बिआइएम ब्वनाच्वंम्ह । आः आइटी फिल्डय् वनेगु खः कि संगीत क्षेत्रय् निरन्तर जुइगु धइगु न्ह्यसलय् उजनं निगुलिं क्षेत्रयात प्राथमिकता बीगुलिसें निगुलिं क्षेत्रयात ब्यालेन्सय् तयाः न्ह्याःवनेगु खँ धाल, ‘संगीत त्वःतेगु ला खँ हे जुइमखुत, आः ला झन त्वःतेफइ हे मखु । निगुलिं क्षेत्रयात ब्यालेन्स यानाः न्ह्याःवनेगु जुइ’ उजनं धाल ।
