नेवाः पत्रकारतय्गु कुतः सामाजिक संजालय् नं ब्यापक मजूगु खँ चर्चाया विषय जुइमाः । छम्ह गैर नेवाः वा गैर नेपाःमि मिडियाकर्मीया लाखौं फलोअर्स दयाच्वनी । तर नेवाः मिडियाकःमिं थुखे पाखे ध्यान बियाच्वंगु मदु । थःगु छगू इमेज दयेका थःगु फलोअर्सपिनिगु निंतिं ब्रेकिंग न्यूज बिइगु मानसिकता मदुनी । थ्व विषयलय् अग्रज पत्रकारतय्सं नं छुं कथंया लँपु क्यंगु मदु । नेवाः पत्रकारतय्गु थुकथंया मानसिकता विकास मजूगु कारण नेवाः पत्रकारतय्सं ब्यापकता वा अनेकताया समाचार संप्रेशन यानाच्वंगु दु । छुं विशेष विधाय् वाः थःत यःगु वा थःगु दक्षता दुगु क्षत्रया समाचार संप्रेशन यानामच्वं । हरेक नेवाः पत्रकारं छगू हे समाचारयात संप्रेशन यानाच्वंगु दइ गुगु छगू प्रेसमिटया आधारय् जक समाचार दयेकाच्वंगु दइ । थुगु कथंया पत्रकारीतायात धाःसा रिपोर्ट यायेगु धकाः धाइ । अथे याःपिं रिपोर्टर जुइ । रिपोर्टिंगयात पत्रकारीताया छगू अंग जक माने याये फइ । उकथं हे रिपोर्टिंग लिपा नं न्ह्यागु हे विधाय् नं समाचार संप्रेशन याइगु जुयाः नेवाः पत्रकारतय्गु विश्वासनीयताय् नं न्ह्यसः ब्वलनी । छम्ह हे पत्रकार मनोरंजन, स्र्पोटस, कल्चर, राजनीति, अन्तरवार्ता आदि इत्यापदी विज्ञ हे पह वयेक थःत थःम्हं न्ह्यब्वयाच्वनी । थुकीं याना नं नेवाः पत्रकारयात छुं बीटया विशेष रूपय् नालाकाये थाकु ।
‘जनरलाइजेशन’ व ‘स्पेशलाइजेशन’या दथुइ छु भिन्नता दु धयागु खँय् थौं नेवाः पत्रकारीता यानाच्वंपिंसं थुइके माःगु दु । उकथं हे ‘ब्राय्ण्डींग’या महत्व गुकथं दु धयागु खँ लिसें ‘ब्राय्ण्ड लोयल्टी’या खँयात नं वाः चायेके माःगु आवश्यकता दु । मुलत समाचार वा छुं नं बुखँयात सनसनी पूर्ण यायेगु नामय् सामाजिक संजालय् निं थःगु फेसबुकय् पोष्ट यायेमाः धैगु मानसिकतां पिहांवये मफूनी । अस्पतालय् ज्यायासां थःगु क्लिनिकया प्रचार याइपिं छुं छुं डाक्टर थें नेवाः पत्रकारत छगू आत्मसन्तुष्टिइ बिना उद्देश्य तक्यनाच्वंगु खने दु । छुं नं बुखँया गहिराइ वा महत्वयात वर्गिकृत याना यंकेमाः धैगु मानसिकताय् खने मदुनी । दुसां उकीया प्रभाव खने मदुनी । बुंगद्यःया रथजात्रा ल्वापू प्रकरणय् ला खने मदुनी ।
