बुंगद्यःया रथ जात्रा प्रकरणय् सुना गज्यागु ज्यायात, धयाच्वने माःगु आवश्यक मदु । सामाजिक संजालमार्फत यक्वसिनं लाइभ स्वयाच्वंगु थुगु जात्राया प्रत्यक्ष प्रशारणय् सुनां गुलि, गज्योगु भूमिका म्हितल प्रत्यक्ष खनेदुगु अवस्था खः । ल्वापू शुरु जुइ न्ह्यो छु जुल ? ल्वापू गथे जुयाः सुरु जुल व ल्वापू धुंकाः गज्योगु स्थीति ब्वलन, थुगु स्थीतिइ सुनां गुकथं लवः काल वा छ्यल धकाः नं सकस्यां हे स्यू ।
बुंगद्यःया रथ जात्रा प्रकरण नेपाल सरकारया स्वंगू तह दुनेया समन्वय् जुइ मफूगु स्पष्ट खनेदु । नेपाल सरकारया केन्द्र, प्रदेश व स्थानीय तह दुने कम्युनिकेशन ग्याप खने दत । थ्व परिस्थीतिइ सुनां नं थःगु भूमिका छु खः धकाः थुइके मफूगु खनेदत । छुं नं क्राइसिस वा महामारीया स्थीतियात गुकथं समाधान याना ज्या न्ह्याकेमाः धयागु खँय् अनुभव मदुगु वा स्थीतिया गाम्भीर्ययात थुसां छगू निर्णय बिइ मफूगु असक्षम मनूतय्गु अनिर्णयया लिच्वः हे खः । थज्योगु स्थीति तब वइ जब सुं छम्ह मनू चिट खुयाः जाँचय् पास जुइ ।
नेतृत्व अःपूगु खँ मखु । हरेक वर्गया मूल्य व मान्यतायात थुइका नाला वनेमाः । केवल प्रोटोकोलया आधारय् निर्णय यायेगु खःसा सुं स्थनीय जनप्रतिनिधि झीत आवश्यक मदु । औपचारीक जानकारी मदु वा मस्यू धकाः जनमानसया भावनायात कद्र मयायेगु खःसा अन विद्रोह सदां हे जुयाच्वनी । जनतां भोट बियाः त्याकूपिं जनप्रतिनिधि थौं नेपालसरकारया विभाग कथं गुथि संस्थान व सिडियोया न्ह्योने लाचारी प्रदर्शन यानाच्वंगु दु । जबकी नेपाःया न्हूगु संविधानं जनप्रतिनिधि स्थानीय सरकारया हैसियत दुपिं खः । थःथःगु नगरया सरकार खः । नगरदुनेया माःगु निर्णय यायेत सक्षम व अधिकारपूर्ण सक्षम व अधिकारप्राप्त निकाय खः ।
अनिर्णया बन्दी दयेकल धाःसा गज्योगु स्थीति ब्वलनीगु ग्यानापूगु स्थीति सकसिनं खने धुंकूगु दु । उकथंया धार्मिक व सामाजिक मूल्य व मान्यतायात थुइके मफूपिं मनूत निर्णायक पदय् च्वन धाःसा अज्योगु निर्णय स्थानीय बासिन्दां नालिइ मखु । लिसें आः दकले महत्वपूर्ण खँ धयागु स्थानीय सरकारं नेपालसरकारया थी थी विभाग अन्तर्गत च्वना ज्या यायेगु खः वा अज्योगु विभागयात थःपिनिगु आन्तरिक मामिलाय् हस्तक्षेप मयाकेगु खँ वाःचायेके माः, मखुसा थज्योगु खँ हाकनं हाकनं जुयाः हे च्वनिं । स्थानीय जनतां जनप्रतिनिधितय्त लाचार व असक्षम खना च्वनिं । उकिं स्थानीय सरकारं अझंनं थुगु प्रकरणया कारणय् दोषि सु धयागु खँय् छानबिन आयोग दयेकाः अझ सेल्लागु निष्कर्ष पिकाये माः ।
