न्हू प्रतिभा कथं न्ह्यब्वयाच्वंम्ह म्येहालामि नदीम शाक्यया मां छन्त लुमंका च्वनाया पितब्वजा जुल । निल शाक्यया संगीत व भुपेन्द्र बज्राचार्यया संगीत संयाेजन दुगु थुगु म्ये बेनी शाक्यं च्वयादीगु खः सा बिरेन कुमार शाक्यं रेकर्डिंग यानादीगु खः अले मिक्सिंग सुरेन्द्र श्रेष्ठं यानादीगु खः ।
यलया एम्बियन्स 365 रेष्टुरेन्तय् कलाकार व प्राविधिकपिं दथुइ म्हाे मनू जक मुंकाः याःगु ज्याझ्वः खःसां अाैपचारिकता पुवंकेत ख्यालि जुजु मदनकृष्ण श्रेष्ठ मू पाहां कथं झायादीगु खः । ख्यालि जुजुया ख्याः पहलं मां पिनिगु जक म्ये यक्व वल बाः पिं नं महान खः धकाः सकसितं छझाः न्हिकादील ।
म्येया समिक्षा यायेगु नितिं वरिष्ठ पत्रकार विजयरत्न असंबरें म्येया भाव व शब्द तसकं गहन जूगुलिं लिसें म्येया संवेदनशीलता अापादुगुलिं छक्व स्वःगु भरय् म्येया समालाेचना यायेमफैगु खँ कुला दिल ।
नुगः खँ तयेगु झ्वलय् गायक नदीम शाक्यं थः दिवंगत मांयात देछाना हालागु थुगु म्येया शब्द ब्वने धुंकाः थःम्हं थुगु म्ये महाःसे च्वने मफूगु खँ न्ह्यथनादीलसा म्ये एवं ज्याझ्वःया संयाेजक सुरेन्द्र तुलाधरं थुगु म्येयात सकस्यां मतिना याना प्रचारय् हइ धकाः विश्वास प्वंकादील ।
थुगु म्युिजक भिडियाेलय् सुनिता श्रेष्ठ, अमाेघवीर बज्राचार्य, बाल कलाकार अमाेन चित्रकारया अभिनय दुसा थुगु म्येया समाः सनमकुमार श्रेष्ठं यानादीगु खः । म्येया सम्पादन व छायांकन अमर चित्रकारं यानादीगु खःसा म्येया निर्देशन सुरेन्द्र तुलाधरं यानादीगु खः ।
