सलिल सुन्दर तुलाधर नेपालभासा ख्यलय् छम्ह मनाेरंजनात्मक म्ये हालामि कथं म्हस्यु । वय्कया म्ये मखं त्वाःया काय् मचाः व नेपाली खसभाय्या ड्याम्म ड्याम्म म्ये न्यनिबलय् छम्ह तसकं हे जाेली मूड दुम्ह कलाकार थें तायेदु । तर थुकीया बिपरीत नकतिनि पिदंगु यः मां म्ये स्वल धाःसा नुगः हे मछिंसे च्वनावइ । थः मदुम्ह मां रूपशाेभा तुलाधरया लुमन्तिइ हालातःगु म्ये तसकं हे मार्मिक जू । मदुम्ह मां मदूगु ४५ न्हुया पुण्य तिथिस संगीतवद्ध यायेगुलिसें रेकर्ड याःगु खःसा म्येयागु म्युजिक भिडियो दछिया पूण्य तिथिया दिं लाकाः सार्वजनिक याःगु खः ।
म्यूजिक भिडियोलय् मन्जु श्रेष्ठ मां जुयाः म्हिताच्वंगु दु सा दिपक मगर व सर्निका राजोपाध्यायया अभिनय थुकी दु ।
मतिना प्रोडक्सनं पाखें तयार जूगु थुगु म्यूजिक भिडियोया निर्देशन विजु कर्माचार्यं यानादीग दु । छायांकन अमर चित्रकारं अले सह-निर्देशन व भिएफएक्स महेश्वर श्रेष्ठया दु । म्येया संगीत संयोजन अन्जन श्रेष्ठं याःगु दुसा रण बहादुर ताम्राकारं म्ये च्वज्याय् ग्वाहालि याःगु दु ।
