कोरोना संक्रमणया कारणं फैले जुइगु प्राणघातक कोभिड १९ ल्वयया कारणं संसारयात हे छगु ग्याचिकुया खिपतं चिनातःगु दु । चीनया वुहान शहरं ब्वलना वःगु थ्व ल्वचं आः वया नेपाःयात नं बाँमलाक्क चिनाहःगु दु । थ्व कोभिड १९ या वासः आःतक पिहाँ मवनिगुलिं याना ग्याचिकु अप्वःया च्वंगु खः । कोभिद १९ या नां न्यनेवं आपालं मनूत ग्याइगु याः । खय्तला आः वया थ्व ल्वय् यात नं आपासिनं जनजीवनया छगु अंश कथं कायेगु याना हःगु दुसा गुलिखे मनूत थ्व ल्वय्या नां जक कायेबले ग्याना च्वंपिं नं दु । कोभिड १९ ल्वचं कःगु औपचारिक पुष्टि याइगु स्वास्थ्य जाँच धइगु पि सि आर टेष्ट खः ।
थ्व पि सि आर टेस्टया ज्याभः नेपाः दुहाँ वयेन्ह्यः आर डि टि ज्याभःया लिधंसाय् कोभिड १९ या जाँच याना वया च्वंगु खः । तर जाँच प्रविधी उलि विश्वास याये बह मजू धका पुष्टि जुउबले आर डि टि प्रविधी छ्यलेगु हे बन्द याना छ्वल । थ्व आर डि टि वा पि सि आर जाँचया प्रक्रियाय् वनेबले थःगु रिपोर्ट नेगेटिभ वसा जिउ धका मति तइपिं यक्वः हे दु । उकि मध्ये छम्ह गौरीशंकर धुँजु नं खः । नेपाःया नांजाम्ह सिनेमाटोग्राफर गौरीशंकर धुँजु नेपालं पिने विदेशय् शुटिंग याःगु न्हापांगु नेपाली संकिपा ‘कस्तुरी’या सिनेमाटोग्राफर खः ।
गौरीशंकर धुँजु
गौरीशंकर धुँजु च्वनिगु थाय् गोठाटारया सनराइज अपार्टमेण्ट खः । अन छगु परिवारय् कोरोना भाइरसया संक्रमण खनेदुबले देय् न्यंक बय्बय् जूगु खः । व अपार्टमेण्टयात सिल याना अन च्वंपिं सकलसियागु आर डि टि टेष्ट याबले टेष्टय् लाम्ह छम्ह गौरीशंकर धुँजु नं खः । उगु ई तक कोरोना संक्रमणया जाँच यायेत पि सि आर टेष्ट नेपालय् मवनिगु ई खः । अले आर डि टि टेष्ट यायेगु झ्वलय् लाःम्ह नांजाम्ह सिनेमाटोग्राफर गौरीशंकर धुँजुयात मन तसकं ग्याःगु अनुभव वयकलं कनादिल । आर डि टि टेष्ट जूगुलिं टेष्टया रिजल्ट उघ्रिमय हे वइ तर लाइनय् च्वना च्वंतले वयकया नुगः धाःसा भाराभारा मिना हे च्वन हं । खय्तला उगु अपार्टमेण्टया दकले वरिष्ठ नागरीक जूगुलिं झ्वलय् वयक दकले न्हाप हे लाना च्वंगु खः तर टेष्ट मजूतले अले टेष्ट जुया रिजल्ट मवतले थःगु नुगः भाराभारा मिन धका वयकलं थःगुु अनुभव कनादिल । रिजल्ट नं नेगेटिभ हे वबले तिनि मन याउँसे च्वन धका वयकलं धयादिल ।
निर्जल श्रेष्ठ
निर्जल श्रेष्ठ नेपाःया कला ख्यलय् छम्ह कला निर्देशकया रूपय् तसकं नांजाम्ह व्यक्तित्व खः । ‘राजमति’, ‘बसन्ती’, ‘मसान’, ‘सेतो बाघ’ व ‘बीर गणेशमान’ थेंज्यागु ऐतिहासिकं महत्वं जागु नेपाली संकिपाया कला निर्देशक निर्जल श्रष्ठ प्राइम टाइम टिभि , ईमेज च्यानल, माउण्टेन टिभि लगायत निगु दर्जन सिबें अप्वः नेपाःया टेलिभिजनय् कला निर्देशक वा कला निर्देशन सल्लाहकार जुया दीम्ह ज्वमदुम्ह कलाकःमि अले संचारकःमि खः । थ्वहे झ्वलय् थौंकन्हे वयक सम्बन्धित जुया वया च्वंगु छगु टिभि स्टेशनय् फ्रण्टलाइनयु च्वना ज्या याइपिं कोरोना संक्रमणया शंखाय् लाःबले उगु टिभिया मेमेपिं दुजःपिन्सं थें निर्जल श्रेष्ठजुं नं सुरक्षाया लँपु नाला थःगु पि सि आर परिक्षण याकादीगु खःसा वयकया रिपोर्ट नेगेटिभ हे वल धका वयकलं फेसबुकय् उगु रिपोर्ट सार्वजनिक यानादिल ।
राजु महर्जन
नेवाः संकिपाख्यलय् लोकंह्वाम्ह हिरो खः राजु महर्जन । नेवाःसंकिपा ख्यः लिसें म्युजिक भिडियो लिसें नेवाः सुपरस्टारयाम्ह नं छम्ह दावेदार वय्क खः । याकः म्ह्याय् , जिपिं बदमाश मखु लगायत आपालं नेवाः संकिपा म्हितुम्ह राजु महर्जनया मू लजगा धइगु फिटनेस ट्रेनिंग व स्वीमिङ्ग ट्रेनिंग खः । कोरोना संक्रमणया जोखिमयात ध्यानय् तया खेलकुदया दक्वः ज्याझ्वः दिकातःगु दुसाः थौंकन्हे इन्टरनेटया माध्यमं जूसां राजु महर्जनं फिटनेसया ट्रेनिंग बिया वया च्वंगु दु । थःगु मेगु लजगा धइगु कलाकारिता खः । थःगु निगुलिं लजगा धइगु यक्वथाय् वनेमाला च्वनिगु जूगुलिं थः सुरक्षित जुया च्वेमा धइगु वयकलं थःगु विचाः प्वंकादिलसा थ्वहे झ्वलय् वयकलं थः संक्रमणपाखें गुलि सुरक्षित जुया च्वनागु दु धका सिइकेत पि सि आर टेष्ट याका दीगु दु । येँ महानगरपालिकाया वडा नं १८ य् जूगु पि सि आर टेष्ट शिविरय् थःगु पि सि आर टेष्ट याकादीगु खः । वयकया रिपोर्ट नेगेटिभ हे वःगु दु ।
बिराजकाजी राजोपाध्याय
छम्ह संचारकःमिया रूपय् नांजाम्ह बिराजकाजी राजोपाध्यायं ‘द मिथ जिरो’ नांयागु शर्ट फिल्म म्हितादीगु दु । लिसें थःगु हे प्रोडक्शन हाउस पाखें नं छुं छुं डकुमेण्ट्रि दयेकादीगु दु । थौंकन्हे ईमेज च्यानल टिभिइ नेवाः समाचार वाचकया रूपय् ज्या याना वया च्वनादीगु दु । उखुन्हु छुं दिं न्ह्यः वयकलं नं पि सि आर टेष्ट याकादीगु दुसाः उकिया रिपोर्ट मवतले थःगु हे छेँय् सेल्फ क्वारेण्टाइनय् च्वनादीगु दु । वयकलं ज्या याना वया च्वंगु टिभिइ च्यानलय् ज्या याईम्ह छम्ह सुचना प्रविधिपाखेया ज्याकःमि छम्हेसित कोरोना संक्रमण जुल । व ज्याकःमिलिसे बिराजकाजी राजोपाध्यायया छक्वः नापलायेगु ज्या जूगु जुया च्वन । वहे कारणं उगु टिभिया मेमेपिं ज्याकःमिपिं लिसेलिसें बिराजजु नं पि सि आर टेष्ट याकादीगु खःसा उकिया रिपोर्ट मवतले छेँय् च्वना थः परिवारपिंसिबें बिस्कं कोथाय् च्वना क्वारेण्टाइनय् च्वनादीगु खःसा रिपोर्ट मवतलेया ई यात वयकलं छगु कष्टकारी ई कथं व्याख्या यानादिल । वयकया रिपोर्ट नं नेगेटिभ हे वल ।
सुरज बीर बज्राचार्य
थ्व ला ग्यानापु स्टायल , बुन्हिया भिंतुना म्ये , तसकं यम्ह लगायत आपालं लोकंह्वाःगु म्ये हालादीम्ह गायक सुरजबीर बज्राचार्य छम्ह गायक खःसा वयक नेवाः पत्रकार राष्ट्रिय दबुया नायः नं खः अले नेवाः संकिपा ‘मिज’या च्वमि नं वयक । वयकलं नेवाः पत्रकार राष्ट्रिय दबु यलया ग्वसालय् जूगु पत्रकार तयेगु पि सि आर टेष्ट शिविरय् थःगु पि सि आर टेष्ट याकादीगु खः । औपचारिकतावश थःम्हं पि सि आर टेष्ट याकादीयागु खँ कनादीम्ह सुरजबीर बज्राचार्यं थथे टेष्ट याकः वनाबले थःयात छुं नं कथंया ग्याचिकु वा मेमेकथं अनुभव मजूगु खँ न्ह्यथना दिलसा थःगु रिपोर्ट नेगेटिभ वःबले नं खास हे तधंगु खुसी मजुयागु खँ वयकलं न्ह्यथनादिल ।
शैलेश डंगोल
छम्ह क्यामेरामाएनया रूपय् नांजाम्ह शैलेश डंगोल थौंकन्हे ईण्डिजिनस टिभिइ ज्या याना वया च्वंम्ह शैलेश डंगोलं थःगु निर्देशनय् ‘तंकाली’ नांयागु नेवाः संकिपा दयेकेगु घोषणा याःगु खःसा उगु संकिपाया ज्या धाःसा दिना च्वंगु दु । छम्ह क्यामेरामाएनया रूपय् थःगु संचारकर्म न्ह्याकावया च्वंंम्ह शैलेश डंगोल छुं दिं न्ह्यः आकाझाकां म्हंमफुत । तःन्हुतक हे ज्वरो नं वल । कथु नं स्यात । तःन्हुतक थीथी वासः नयां नं ल्वय् क्वमलाबले अस्पतालय् वना चेक याकःवन । अन वयकया पि सि आर टेष्ट याना स्वल । टेष्टया लिच्वः पोजेटिभ वल । अले आइसोलेशनय् च्वना दिल । वासः याका दिल । कोरोना संक्रमणयात त्याकादिल । थुकथं नांजाम्ह संचारकःमि व संकिपामि शैलेश डंगोलं कोरोनायात त्याका दिल ।
दकलय् लिपा
मेमेपिं संकिपामि पिनिगु पि सि आर टेष्ट जूगु खँया चर्चा जूगु मदुनिसा नेवाः पत्रकार राष्ट्रिय दबु यलया ग्वसालय् जूगु पि सि आर टेष्ट शिविरय् छुं छुं नेवाः पत्रकारपिन्सं टेष्ट याकादीगु दु । उकी मध्ये सकसियागु रिपोर्ट नेगेटिभ हे वःगु खँ थन न्ह्यथने बहजू ।
