पेजथ्रीया बाःछिपौया ग्वसालय् चेज बुदिंया भिंतुना म्येकासा नेपालभासाया लोकंह्वाःगु ज्याझ्वः खः । सुरजवीरया म्येग्वः व सः अले जुगल डंगोलया संगीतय् जूगु कभर म्ये कासाय् चेज टिभीं टाइटल स्पोनसर याःगु खः ।
चेज टिभी गोल्मा कम्पनिया उत्पादन खः । गोल्मा कम्पनीया प्रवन्ध निर्देशक सुरेश मल्ल व वय्कःया पुचलं थौंकन्हे न्हिंयान्हिथं सिफल चौरय् न्हिं निसः स्वयां अप्वः मनूतय्त खाना नकाच्वंगु दु । न्हिंयान्हिथं सुथसिया ९ बजे गौशालाया सिफल चौरय् जा नकाच्वंगु थौं झिंछन्हु दत ।
कोभिड १९या कारण स्वनिगलय् न्हिं छप्ये जाः नयेत तकं समस्या जुयाच्वंपिन्त छुं राहत बीमाः धयागु परोपकारी भावना पिदंगु सुरेश मल्लं पेजथ्रीयात जानकारी याकूगु दु । संघसंस्था दुने च्वना जक मखु थःगु व्यक्तिगतकथं नं छुं यायेमाः धयागु मान्यतां भाजु सुरेश मल्लं थः पासापिं पानु पौडेल व राकेश रावलंया ग्वाहलिं व्यक्त्तिगत खर्चं हे जा नकेगु शुरू याःगु खः । थुकीया निंतिं स्थानीय क्लबपाखें नं संयोजन जुयाच्वंगु दु । नवजीवन युवा क्लबया प्रतिक श्रेष्ठ, ओम, पासाङ्ग शेर्पा नं सुथय् सुथय् जा नकेगु ज्याय् सकृय जुयाच्वनादीगु दु ।
अन जा नयेत वइपं हरेक मनूया थःगु हे ब्यथा व कथा दु । इमिगु दुःख व समस्या झीसं बिचाः तकं याये मफइगु कथंया दु । छसाः जा नयेत वइपिं थुपिं धात्थें हे पीडतपिं खः । नयेत समस्या जुयाच्वंपिं खः । थुपिं सुं पशुपतिइ फ्वनानइपिं, गुम्हं न्हिंयान्हिथं ज्याला मजदूरी याना जुइपिं, बेरोजगार, कोथा बालं पुले मफुपिं व व्यवसाय् बन्द याये माःगु हुनि थुज्योगु अवस्थाय् वःपिं खः । गुम्हंला थःगु छेँ गामय् लिहां वनेत तकं समस्यांग्रस्त जुयाच्वंपिं धयागु खँ वय्कलं कनादीगु दु ।
छेँ लिहां वने मखंपिं निम्ह प्यम्हेसित ला थःपिंसं व्यवस्था याना गांगामय् लित छ्वया नं बिइ धुनागु खँ सुरेश मल्लंजुं धयादीगु दु । नुगः हे चिइ थाकुक्क इमिगु दुःखया खँ, प्वाथय् दुम्ह कलाःयात बांलाक्क बिचाः यायेमफुगुलिं इपि त्यपूयात दैलेख लिहाँ वनेत आर्थिक ग्वहालि नापं याना बियागु खँ वय्कलं धयादीगु दु ।
तर सकसिगु समस्या दुसां आःयात पासापिं जाना जा नकेगु ज्याय् आः बुलुहुँ आःया ईंयात थुइकाः गुहालि याइपिं मेपिं नं दयावःगु दु ।
छगू पार्टीप्यालेसय् खाना दयेकाः व्यवस्थापन यानाः न्हिथं सुथय् खाना नकेगु यानाच्वंगु दु । खाना नकेगु झ्वलय् हप्ताय् छक्वः ला व खेँ तयाः अले मेगु दिनस सादा भोजन याकावया च्वनागु खँ वय्कलं कना दीगु दु ।
