लकडाउनया इलय् नेवाःतय्गु संस्कृतिइ गुलि प्रहार जुल उलि प्रहार नेवाःतय्गु मेमेगु पक्ष मजू । नेवाःतय्गु आर्थिक, धार्मिक लिसें सामाजिक पक्षय् तकं लकडाउनं उलि असर याःगु मदु गुलि की सांस्कृतिक पक्षय् यानाच्वंगु दु । थुकिया लिच्वः कथं आ लकडाउन धुंकाः नेवाःतय्गु सांस्कृतिक पक्ष आः न्हापा थें जुइ मखुत । लकडाउन धुंकाः झीगु संस्कृतिइ यक्व हे ह्यूपाः वइ, गुगु ई कथं झीगु निंतिं नी वा मनीफु । भिने वा मभिनेफु ।
संस्कृति संस्कृति धकाः नेवाःतय्त तसकं हे बयबय् यानातःगु छगू भ्रामिक पक्ष खः । थ्व हे भ्रमय् दुने संस्कृति धाःगु छु धैगु खँय् न्हूगु पुस्तां आः न्हूगु हे परिभाषा थुइकी तिनि । छाय्की संस्कृतिया नामय् मनूतय्त गुलि प्रभोक याये ज्यु मेमेगु पक्षय् उलि अःपु मजू । छाय्की संस्कृतीयात पहिचान लिसे स्वाकातःगु दु । अले पहिचान धालकी हे झीसं छुं हे मिखां खनिं मखु ।
संस्कृतियात दकलय् सरल परिभासा धैगु हे जीवनयात अःपुक्क म्वायेगु कला खः । यदि थथे मजुल धाःसा संस्कृति छगू परम्परा जुयावनिं अले परम्परा गुगु नं इलय् त्वाः दली । लकडाउनया हुनिं नेवाःतय्गु थी थी जात्रा दिनावन । जन्मांद्यः जात्रा, बुंगद्यः जात्रा, इन्द्रजात्रा इत्यादी । लकडाउन लिपा आः नेवाःतय्सं वाःचायेकी की जात्रा बिना नं झीगु जीवन ला न्ह्याः खनिं । नखः आ चखलय् हिला वन ।
नेवाःतय्गु संस्कृति आः परम्पराय् हिलाच्वंगु दु । वातावरण अनुकुल जुसां वा प्रतिकूल जुसां नखः चखः हने हे माः धयागु झीगु मूल्य व मान्यता आः ल्यनाच्वनी मखुत । परिवेशकथं झीसं थीथी नखःचखः हनेगु पाकाच्वनागु दु सा वाध्यात्मक परिस्थीति वयेवं आः नखः चखलय् अंकुश हे तयेमाःगु अवस्था नं पार जुइधुंकुगु दु । थुकी तुं नखः गुलि कृषिलिसे तप्यंक स्वापू दुगु आः हनेत झी बाध्य मजुइ धुंकल । मौसम अनुसारया नसा ज्वलं जक ज्वरेयाना नयेगु अवस्थाया कारण आ थुज्यागु नखःचखलय् नं झी लिचिला वनेगु अवस्था ब्वलनिं । उकी नं पारिवारिक संरचना आः एकल, न्यूक्लियर जुइवं नखःचखःया मूल्यमान्यता बुलुहुँ न्हनावनाच्वंगु दु ।
न्हापा जुसा नखः वलकी बजि हे नइगु मान्यता तकं आः जाः नःसां जिइ धुंकल । उकिं थज्योगु हे ह्यूपाःया निंतिं आः नेवाः समाज तयार जुइमाःगु अवस्था दुसा समाजया थी थी जातिय संघसंस्थातय्सं नं थुगु परस्थीति पाखें गथे न्ह्यां वनेगु खँय् बांलाक्क बिचाःयायेमागु अवस्था दु । ह्यूपाः आत्मसात यायेमाःगु स्थिति वःगु दु ।
