संगीतकार भीमबहादुर नकःमिया सन्तति मनराजा नकःमि, आशा नकःमि, आशिष्मा नकःमि, अंजला नकःमि व आयुष्ना नकःमि सकलें हे नेपालभासाया सांगीतिक एवं मनोरंजन क्षत्रय् समर्पित जुयाच्वनादीगु दु । थ्व हे झ्वलय् मैंचाया सपले नांयागु म्येचाः पिदनेत्यंगु दु । थुगु म्येचालय् मोहन शाक्य लिसें आशा नकःमिया सः दु । म्येचालय् संगीत अबु व काय्या जुगलबन्दी कथं भीमबहादुर नकःमि व मनराजा नकःमिया दु । थुगु म्युजिक भिडियो जमुना शाक्य, मनोज शाक्य व रीचु जोशी शाक्यया न्ह्यब्वया खः ।
बलम्बुया भीमबहादुर नकःमि २००८ साल निसें मद्दिक्क हे नेपालभासया भजन, लोकम्ये, सामाजिक व ख्यालि म्येलिसें दबू प्याखँ च्वयेगु, निर्देशन यानाच्वंम्ह छम्ह श्रष्टा खः । थुगु म्येचालय् भीमबहादुर नकःमिया हे च्वसां पिज्वःगु जिं धैगु खँ न्योंसा, जिं थौं म्हनाच्वंगु, मयोसा न्वतुइ म्वाः, जिं मुसुक्क न्हिला, जिं छता खँ ल्हाये, छन्त धकाः स्वयागु मखु, मैंचाया सपलय् व जिमि पाजुपिन्थाय् याना मुक्कं च्यापू म्ये दु। थुगु म्ये निर्देशक रामकृष्ण खड्गी, लुजः सिं, जितेन्द्र महर्जन, सोनाम पाख्रिन व आराध्या लक्ष्मी खड्गीपिन्सं निर्देशन यानातःगु दु ।
म्येया प्रोमो थौंकन्हे थीथी विद्युतीय संचार माध्यमय् क्यनाच्वंगु दु । लकडाउनया कारणं म्येचा तयार जुइधुंकाः नं पितब्वज्या याये मफयाच्वंगु खँ संगीतकार मनराजा नकःमिं पेजथ्री पत्रिकायात कनादीगु दु।
