न्ह्योखँ
पेजथ्री बाःछिपौया ग्वसालय् चेज बुदिंया भिंतुना म्येकासाया उत्कृष्ट न्याम्ह अर्थाट टप ५या म्येमुना ‘सिरपा’ म्येचाः खः । आर्टोम्यूज रेकर्डिङ स्टुडियोया न्ह्यब्वया कथं थुगु सिरपाः म्येचाः पिदंगु खः । संगीतकार जुगल डंगोलया संगीतय् सृजना जूगु थुगु म्येचाः तयार जूगु खः । चेज बुदिंया भिंतुना म्येकासा छगू अज्योगु ज्वः मदुगु म्येकासा खः गुगु कासाय् सुरजवीर बज्राचार्यया शव्द व गायन अले जुगल डंगोलया संगीत संयोजनया ‘बूदिंया भिंतुना’ म्येया कभर हालेत हलिंन्यकया १२१ कासामि ब्वति काःगु खः । थुपिं हे कासामिपाखें उत्कृष्ट ५या सलय् सिरपा म्येचाः पिदंगु खः । म्येचाःया नितिं घोषणा जूगु इलय् हे ५म्ह म्ये च्वमिया नां नं न्हापा हे घोषणा याःगु खः । थुगु म्येचाया निंतिं रचनाकार सुरजवीर बज्राचार्य, दर्शनवीर शाक्य, प्रकाश दीप श्रेष्ठ, पूर्णकाजी ज्यापु व हरिराम महर्जन थेचोपिनिगु नां न्हापा हे धोषणा याःगु खः ।
म्येचाः
मफूत म्वाये थ्व जीवन.. कासाय् उत्कृष्ट जुयादीम्ह उत्तम महर्जनं हाःगु म्ये खः । थुगु म्ये सुरजवीर वज्राचार्यं च्वःगु खः । म्ये स्लो रक व पाश्चात्य सवाःया दु । विरह भावया म्येयात ल्वयेक उत्तम महर्जनया सः थुकी दु । पेजथ्रीया सम्पादक दर्शनवीर शाक्यया च्वसाय् छंगु हे खँ ला खः .. मुकेश शाक्यं हाःगु म्ये खः । थुगु म्ये आधुनिक पहया म्ये खः । गजल पह दुगु थुगु म्येयात मुकेश शाक्यया सलय् बिस्कं कथंया सवाः दु । सिरिसिरि बसन्तया फसय् परमेश मल्लया सलय् दु । थुगु म्ये हरिराम महर्जन ‘थेच्व’या च्वसाय् पिदंगु खः । परमेश मल्लया बिषयलय् धायेमाल धाःसा वय्कः नर्वेलय् च्वनादी । थुगु कासाय् ब्वतिकयाः उत्कृष्ट ५य् दुथ्याये धुंकाः नेपालय् वःगु इलय् म्ये रेकर्ड यानादीगु खः । थुगु म्ये बाजं ग्वसाः पुवंक नेवाःया मौलिक बाजं पह दु । म्येच्वमि प्रकाश‘दीप’ श्रेष्ठया च्वसाय् छगू दार्शनिक सवाः दुगु म्ये भुतुमालि ब्व थें ब्वयाच्वंगु म्ये सुमन मानन्धरं हालादीगु दु। सुमन मानन्धरं चंचलता न्ह्यब्वया तःगु दु । पूर्णकाजी ज्यापूया च्वसाय् मनोरंजनात्मक म्ये बालाबाला चिंगु मिखा रविनसन कंसाकारं हालातःगु दु । रोम्यान्टिक एवं जोलिमूडय् थुगु म्ये हालातःगु दु ।
संगीत
जुगल डंगोलया एकल संगीत व संगीत संयोजनय् तयार जूगु सिरपा म्येचाःया हरेक म्ये बिस्कं सवाःया दु अय्नं सकतां हे म्येय् लय् जुगल डंगोलया छाप दु । छगू कासा पाखें न्याम्ह उत्कृष्ट म्येहालामि ल्ययाः इमिगु सःया खुबि कथंया म्ये संगीतबद्ध यायेगु धैगु नं अःपूगु खँ मखु । पाश्चात्य, गजल, आधुनिक, पारम्परिक एवं लोकसवाःया म्येया संगीत थुगु म्येचाःलय् दु । जुगल डंगोलं थःगु सांगीतिक क्षमता न्ह्यब्वयातःगु दु । म्येहालामिया खुबि कथं म्येया सवाः न्ह्यानाच्वंगु दु । सांगीतिक समिश्रणया छगू बांलागु म्येचाः सिरपा जुइत ताः लानाच्वंगु दु ।
शब्द
म्येचाःलय् दुथ्याःगु न्यापू म्ये मध्य् निपू म्ये बियोगान्त, निपू म्ये मतिना वा सौन्दर्य वर्णन अले छपू म्ये दार्शनिक पहया दु । सुरजवीरया शब्दय् मफूत म्वाय् थ्व जीवन तसकं हे निराशापन दु । बियोगान्तय् नं तसकं हे बियोग जुयाः जीवनया अन्त हे जुइत्यंगु भाव दु । दर्शनवीर शाक्याया च्वसाय् नं बियोगान्त खःसां छगू जज्मेन्तल खने दु । स्वापूतिइ सुया दोष गुलि गथे दु धैगु भाव ब्वयातःगु दु । हरिराम महर्जन थेच्वया च्वसाय् सिरिसिरि बसन्तया फसय् यौवनया भावं जाःगु म्ये खः । प्रकृतिलिसे जोवनयात स्वाकाः भाव प्वंकातःगु दु । पूर्णकाजी ज्यापूया म्ये बालाबाला चिंगु मिखा मतिनाया रसं जायेकातःगु म्ये खः । छम्ह मय्जुया यौवनयात वर्णन यानाच्वयातःगु म्ये खः । अथेहे प्रकाश‘दीप’ श्रेष्ठया च्वसां पिदंगु भुतुमाली ब्वथें ब्वैच्वंगु छगू अर्थपूर्ण म्ये खः । थुगु म्ये भुतुमालि व जीवनयात अथे अथे हे खः धैगु दार्शनिक भाव प्वंकातःगु दु ।
सः
सिरपा म्येचाःलय् म्ये हालातःपिं व्यवसायिक म्ये हालामि पिं मखु । छगू शौखं गाय्न क्षत्रय् गननं गन आवद्ध जुयाच्वंपिं खः । पारिवारिक वातावरण व सामाजिक वातावरणय् म्ये हाःला थःथःगु लजगाः यानाच्वंपिं खः । बुदिंया म्ये कासाय् न्हाप लाःम्ह उत्तम महर्जन व्यसायिक रूपं छम्ह एकाउन्टेट खःसा वय्कया छगू ब्याण्ड नं दु । उत्तमया सःलय् रेन्जय् विविधता दु सा वियोगान्त म्येयात माःगु सःया अभाव मदु । तसकं हे भावपूण सः दु । मुकेश शाक्यया सःलय् छगू रफनेस दु गुगु म्येया भाव कथं तसकं हे पाय्छी दु । मुकेश हस्तकला उद्योगय् ज्या न्ह्याकाच्वंम्ह छम्ह कलाकार खः । परमेश मल्लया सःलय् छगू क्लास खने दु । म्येयात सरल ढंगं गथे हाले धकाः परमेशं न्ह्यब्वयातःगु दु । सुमन मानन्धरया सलय् चंचलता दु । वय्क छम्ह व्यापारी खः । रविनसनया छगू अफिसय् एकाउन्टेन्ट खः । वय्कःया सलय् बिस्कं कथंया बोल्डनेस लिसे जोलि पन दु । समग्रय् उत्कृष्ट ५या सलय् विशेष कथंया हे बिस्कं बिस्कं सवाः दु ।
लिखँ
सिरपा म्येचाः मुक्कं छपू म्येया लिच्वः खः । पेजथ्री बाःछिपौया ग्वसालय् जूगु चेज बुदिंया भिंतुना म्ये कासाया लिच्वः कथं छखे छखे लानाच्वंपिं म्येहालामिपिन्त छथाय् मुनाः छगू उत्कृष्ट म्येचाः पिथनेत ताःलाःगु दु । थुगु म्येचाः सकल संगीतह्यःमिपिंसं मुंकेमाःगु हे म्येचाः खः । हःपाः बिइमाःगु म्येचाः खः ।
