न्ह्यः खँ
संकिपा हिसिमतिया भब्य प्रिमियर शो येँया नाचघरय् जुल । चःमति संकिपाः प्रोडक्शनया लुखाँ पिदंगु थुगु प्याखँ थनी थ्यं मथ्यं निदँत्या बिकाः तयार जूगु संकिपाः खः । संकिपाया मुहूर्त नं तःजिक हे चःमति त्वालय् पुजायाना जूगु खः । पूर्णकाजी ज्यापूया मूल संयोजनय् न्ह्याःगु थुगु प्याखँया निर्देशनय् मंकाः कथं पूर्णकाजी ज्यापू व अनुज डंगोलया दु ।
नेपालभासाया ऐतिहासिक संकिपा राजमति लिपा पानवति, तुयुमति पिदंगु दु । थ्व हे झ्वलय् हिसिमति संकिपाः नं ति अन्त्यानुप्राशय् छम्ह मिसा चरित्रया नामय् संकिपाः पिदंगु दु । राजमति लिपा पिदंगु संकिपा पानवतिइ दक्वस्यां पुलां बाखंया लिधंसाय् दयेकातःगु अनुमान याःगु जुसां प्याखँ धाःसा आधुनिक बाखँया जुल । अथे तुं तुयुमति प्याखँनं आधुनिक विषय बस्तुया हे प्याखँ जुल । थ्व हे झ्वलय् पिदंगु संकिपा हिसिमति नं आधुनिक जुइ वा पुलांगु बाखँया लिधंसाय् दयकातःगु जुइ धकाः स्वःवनिपिनिगु मनय् दुविधा ला अवश्यनं जुइगु हे जुइ ।
हिसिमतिया बाखं
विलियम सेक्सपियरया बाखँ रोमियो एण्ड जुलियटया लिधंसाय् यक्व हे प्याखँ निर्माण जुइ धुंकुगु दु । अथे हे हिन्दी प्याखँ पाखे नं लैला मजनुं, हीररांझा इत्यादि प्याखँ कालान्तरय् मद्दिक्क हे दयेकाच्वंगु दु । निम्ह मतिनायामियात नियतवसं निगु परिवारया ल्वापूया कारण बाय्मालिगु स्थीतिइ यक्व हे प्याखँत निर्माण जुइधुंकुगु दु । थज्योगु हे परिवेशया लिधँसाय् हिसिमतिया बाखँ न्ह्यानाच्वंगु दु । प्याखँया न्ह्यानाच्वंगु बाखँ कथं जुजुकाजी (योगेन महर्जन) व हिसिमति (निक्की महर्जन)या तिर्थयात्रा वनीगु इलय् यःत्यः जुइ । तर जुजुकाजी गरीव व अय्लागुलुया काय् अले हिसिमति धाःसा नयेत्वने दुपिनि म्ह्याय् मचाः जुइ । हिसिमतिया मां बौ (नगिना व अक्कल मान)नं धासा हिसिमतियात व्याहा मेथाय् याकेत लमि (अन्नपूर्णेश्वरी)यात धयातःगु दइ । अले व हे लमिं थःगु ज्या स्यंकीन धकाः अनेक चाल म्हिता निम्हेसित फायाबी तर अन्त धाःसा अकल्पनीय जुइ ।
तसकं हे सामान्य बाखँ हिसिमतिया खः । थुगु बाखँ चःमति त्वालय् जूगु धकाः ऐतिहासिक चःमति त्वाःया बाखँधकाः प्रचारय् तकं छ्यगु दु । बाखनय् स्वभाविकता दु । चःमति त्वाःया बाखँ हे धाःसां थज्योगु बाखँ यक्व थाय्थासय् झीसं न्यनावयाच्वंगु हे दइ गुकीया अर्थ थ्व छगू प्रतिनिधि बाखँ हे जक खः।
प्याखँया खँय्
सामान्य छगू लाइनया बाखँ खःसां प्याखँयात यक्व हे ताः हाकः यानातःगु दु । प्याखँया मध्यान्तर लिपा हे जक मूल विषयबस्तुइ दुहांवनाच्वंगु कारण न्ह्योनेया दृष्य स्वस्वं स्वकुमि आय्बुइ । अनावश्यक दृष्य व प्याखँलिसे स्वापू हे मदुगु दृष्य अले वित्तचित्र थें पह वयेक दयेकातःगु कारण प्याखँया व अनावश्यक चरित्र निर्माण हे थुगु प्याखँया मू कमजोरी खनेदु । अनावश्यक दृष्यया कारण हे प्याखँ न्ह्याकेत प्याखँया मूलपात्रया रोल म्हो जूगु वाःचायेके फइ ।
प्याखनय् कलाकार कथं पूर्णकाजी ज्यापू नं दु । पूर्णकाजी छम्ह बांलाम्ह संगीतकार, म्येहालमि व आः अभिनय् न उतिकं क्षमता दुम्ह धकाः पुष्टि जुइ धंकल । तर थ्व प्याखनय् पूर्णकाजी ज्यापूया हे आवश्यकता सिबें यक्व फुटेजया कारण प्याखँ फस्र्ट हाफय् दिशाहीन जुयाच्वंगु दु । छम्ह निर्देशकं प्याखँ म्हितलकी हे प्याखँ स्यनी । थज्योगु यक्व हे दसू दु । नेवाः प्याखँ जक मखु, खसभाय्या प्याखँ वा बलिउडय् तकं थज्योगु रोग दु । थुकीयात दिके हे माः ।
कलाकार
कलाकारया मू भूमिकाय् योगेन महर्जन, निक्की महर्जनया अभिनय् सामान्य सिबें बांला । तर चरित्र चित्रण यायेत सेल्लागु स्क्रीप्ट मदु ।
संवाद चुस्त मजूगु कारण कलाकारतय्सं थःगु क्षमतां प्याखँयात सालाकाःगु दु । सरस्वति मानन्धरया अभिनय् व भिमसेन रिसालया अभिनय् सेल्ला । नगिना जोशी व अक्कलमानया अभिनय् बांला जु । पूर्णकाजी ज्यापूया फुटेज यक्व दुगु कारण प्याखनय् न्ह्याथाय् नं पूर्णकाजी ज्यापू हे जक जुयाच्वंगु दु । कलाकारया ल्याखँ थुगु प्याखँया संपूर्ण भार कलाकारं हे क्वकियातःगु खनेदु ।
कमजोरी
थुगु प्याखँया मू कमजोरी धैगु हे थुकी स्क्रिप्त हे मदु । निर्देशकया गथे गथे न्ह्यां अथेअथे प्याखँ दयेकातःगु खनेदु । कविलाश चाःह्यूवंगु दृष्य ताःहाकः जुल । अनावश्क चरित्र थुगु प्याखँया मेगु कमजोरी खःसा चरित्रतय्त माःगु सिबें म्वाःमदुगु संवाद व दृष्य याना प्याखनय् स्क्रिप्तय् ध्यान मब्यू धैगु खँ प्रस्ट जुइ । अनावश्यक कमेडी दृष्यं प्याखँयात झन हे अतमतः कंकाब्यू ।
प्याखँया मेगु कमजोरी धैगु प्याखँया टाइमलाइन खः । अर्थात प्याखँ छु कालया खः धकाः धाये थाकु । प्याखँ पुलाँ धायेगु खःसा थुकी जुजुकाजीया बाः नं हे ट्याक्टर चलेयाना दुर्घटनाया द्वपनय् पुलिसं ज्वंगु घटना क्रम दु । ग्वंगः छम्हेसिया ३०का धाइ । हाकनं ग्वंगः ल्वाकीथाय् बाजी तइगु धाःसा न्यासः व द्वछि तका । स्वयंभुइ पात्र नापलाइबलय् थौंकन्हेया परिवेश याउँक हे खनेदु । जुजुकाजीया ल्हातय् थौंकन्हेय्या घडी खने दु । उकिं थ्व प्याखँ छु परिवेश वा कालया खः धकाः स्वकुमियात अतःमतः कंका बी ।
अथेहे थुगु प्याखँ प्याखनय् दकलय् लिपांगु इलय् इन्ट्रि जुम्ह कलाकार लमिया पिओभि पाखें न्ह्यानाच्वंगु खनेदु । गुकींयाना थुगु प्याखँया मू कलाकार हे लमि अर्थात अन्नपूर्णेश्वरी जुइ ।
गल्ति
प्याखनय् शुरुइ हे म्ये दु । म्येया दृष्य हिसिमति व जुजुकाजी प्याखँ हुलाच्वंगु दइ । तर निक्वःगु दृष्य खनिंबलय् नकतिनि नापलापिं थें च्वंक अभिनय् याइ । भिमसेन रिसाल तुतिं लंगडा जुइ । तर रवि डंगोलयात ग्वगः मिइबलय् धाःसा हाकनं लंगडा जुइ मखु ।
अथे हे नेपालय् धाःसा पशुअधिकारवादी उलि सः ल्ह्वंगु खने मदु तर थुगु प्याखनय् ग्वँगः ल्वाकीगु दृष्य धाःसा धात्थेंयापिं ग्वंगः ल्वाकुगु दु । प्याखनय् थथे जनावरयात दुःखबियाः सुटिंग यायेगु थौंकन्हेया परिवेशं मबिइ धुंकल ।
मेगु खँ
पूर्णकाजी ज्यापू नेपालभासा ख्यःयाम्ह छम्ह इन्टरटेनर खः । मनोरंजन ख्यलय् थी थी म्यूजिक भिडियो म्हिता, संगीत तयाः, म्ये हाला, निर्देशन याना आः थ्व ख्यलय् छम्ह संकिपाःकमि नं जुइ धुंकल ।
थ्व ल्याखँ पूर्णकाजी ज्यापू छम्ह मनोरंजक जक मखुसे छम्ह मांभाय् सेवाय् थःगु लगनशीलता देछानाच्वंम्ह धकाः नं खनेदु यद्दपि थुगु कुतलय् पूर्णरूपं पूर्णता धाःसा मदुनी । अय्न थुलि म्हो इलय् थुलि प्रगति यायेफूगु धैगु नं तसंक हे च्वछाय्बहगु खँ खः। थुगु क्षमतायात अझ निख्खर यायेगु निंतिं थ्व हे विषयलय् अर्थात प्याखँ दयेकेगु खँय् भचा अध्ययन याःसा नेपालभासा ख्यलय् छम्ह प्रतिभावान कलाकार जुइगु खँय् गनं हे शंका यायेथाय् दइमखु ।
प्याखनय् दुथ्यानाच्वंगु म्ये फुक्कं हे कर्णप्रिय जू ।
लिखँ
हिसिमति नेपालभासा ख्यलय् यानातःगु बांलागु कुतः खः । मनोरंजन बीगु उद्देश्यं दयेकातःगु थुगु प्याखँनं स्वकुमिपिंत न्ह्यइपुगु अनुभुति बिइगु खँय् शंका मदु ।
