न्ह्योखँ
हसना शाक्यया सःलय् वयेमते छ आशां क्यंका म्युजिक भिडियो हाइलाइट्स नेपालय् रिलिज याःगु दु । सुमन चित्रकारया च्वसा, सुमन कपालिया संगीत व संयोजनय् तयार जूगु थुगु म्ये पारम्परिक नेवाःम्येया सवाः दु । थुुगु म्येया कलाकार कथं रूपेन श्रेष्ठ थक्वामि व दिया श्रेष्ठ दु । थुगु म्ये नांजाम्ह निर्देशक लुजःसिंहं निर्देशन यानातःगु दुसा सम्पादन लिसें छायांकन योवन शाक्यं यानातःगु दु ।
भिडियो
नेपालभासाया म्युजिक भिडियोलय् उल्लेख्य रूपं ह्युपाः वयाच्वंगु दु धैगु बांलागु दसू थुगु म्युजिक भिडियो जुयाच्वंगु दु । थुगु म्युजिक भिडियोया निम्हं कलाकार रूपेन थक्वाः लिसें दिया श्रेष्ठ तसकं हे ल्वःगु खनेदु । दिया श्रेष्ठया ख्वालय् तसकं हे ताजगी खनेदु । दिया श्रेष्ठ मिस नेवाः आइकनया निक्वःगु संस्करणया ताज त्याकादीम्ह मय्जु खः । दियाया अभिनय हाउभाउ तसकं हे बांलाजु । म्येयात ल्वयेक अभिनय यानातःगु दु । रूपेन नं दिया लिसें स्वयेबलय् मिखायात याउँसे च्वं । निम्हेसिया जोडीनं बांला जु ।
म्येया निर्देशक लूःजःसिं खः । म्येया कन्सेप्टय् छगू न्हूगु हे कथंया सवाः दु । छगू चिधंगु लोकेशन दुने नं गुकथं म्युजिक भिडियोयात उत्कृष्ट ढंगं लोकेशन छ्यले ज्यु धकाः थुकी क्यनातःगु दु । कलाकारपिंत ओभर एक्टिंग याकातःगु मदु । निर्देशकया पकडय् तयातःगु दु । निश्चित दायराय् कलाकारयात छ्यलातःगु दु । प्याखँया मेगु बांलापक्ष थुकीया छायाँकन खः । म्येयात ल्वयेक छायांकन स्वयेगु इलय् मिखायात गनं अलमल मजु । मिखा याउँसे च्वं । अथेतुं म्येया सम्पादननं बांला । म्येयात माःगु ट्रान्जिशनयात बांलाक्क छ्यलातःगु दु । निगुलिं पक्षय् योवन शाक्यं बांलाक्क हे मेहनत यानातःगु दु ।
अडियो
पारम्परिक नेवाः संगीत दुथ्यानाच्वंगु थुगु म्ये स्वच्छन्द मतिनाया सवाः बियातःगु दु । मिसाम्ह चरित्रया खँ न्ह्यब्वयाः मतिनाया खँ लिसें छम्ह मिसाया स्वच्छन्द भाव बियातःगु दु । संगीत म्येयात ल्वयेक बियातःगु दु । सुमन कपालिया मेहनत बांलाक्क थुकी खने दु । संगीत कर्णप्रिय जुयाच्वंगु दु । थुकी बियातःगु हसना शाक्यया सः धाःसा सामान्य कथं जक दु । छम्ह व्यवसायिक म्ये हालामि सिबें थःगु शौखका कारण म्ये हालाच्वंगु थें ताय्दु । सामान्य कथं सकस्यां हे म्ये हाले मास्ति वइ थें कथं सामान्य ढंगं हालातःगु दु ।
मेगु खँ
ताः ई लिपा छगू यइपुगु व ल्वःगु जोडी दुगु म्युजिक भिडियो खनेदु । कलाकार दथुया केमिस्ट्रीनं यइपु खनेदु । म्युजिक भिडियोयात ल्वयेक म्ये कोरियोग्राफ जुयाच्वंगु नं दु । तर नं थुगु म्ये हालातःगु सः हे म्युजिक भिडियो कथं भचा पाय्छी मजू धकाः तायेके माः । म्ये हालातःम्ह धाःसा छुं मखुसां ४० ५० सिबें च्वयेया खनेदु तर अभिनय यानाच्वंम्ह धाःसा नच्चापिं दु । सःयात ल्वःगु कथंया मोडल वा मोडलयात ल्वःगु कथंया सः माला म्युजिक भिडियो दयेकेगु टे«ण्ड आ नेपालभासा ख्यलय् न्ह्याके माःगु खनेदु ।
निम्ह कलाकार दथुया केमिस्ट्री ताः लाकेगु निंतिं वसःया नं तसकं हे महत्वपूर्ण भुमिका दु । लोकेशन व थौंया ई कथं रूपेन व दियाया वसः नं तसकं हे ल्वः अले पाय्छी । तर थुगु म्येया सवाःधाःसा टे«डिशनल अथार्त पारम्परिक दु तर म्ये धाःसा पूवंक हे आधुनिक शैलीइ दयेकातःगु दु । म्येया सवाःयात ल्वयेक धाःसा अभिनय व हाउभाउ दु तर संगीतयात धाःसा उलि ध्यान बियातःगु खने मदु अथे नं म्ये धाःसा स्वयेबलय् तसकं हे यइपुसे च्वं ।
लिपांगु खँ
नेपालभासाया म्ये थुलि स्तरीय रूपं भिजुअल दयेकेगु धैगु नेपालभासाया म्युजिक भिडियो ख्य चकना वनाच्वंगु दु धैगु संकेत खः । नेवाःभाय् प्रति मन दुपिंसं आः म्ये हालेगु जक मखुसे म्युजिक भिडियोया नितिं नं चकंक दयेकेगु बांलागु हे संकेत खः । म्युजिक भिडियो दयेकुगु टिम यात भिंतुना ।
