न्ह्यः खँ
सरिता शाहीया न्हापांगु एकल नेवाः एल्बम मतिना चिखि योमरी पुन्हिंया लसताय् पिदंगु दु । थुगु म्येचाया शब्द पूर्णकाजी ज्यापूया दु । संगीत व संगीत संयोजन जुगल डंगोलया दु । थुगु म्येचाःलय् मुक्कं स्वंपू म्ये जक दु । थुकी मध्यय् नं छपू म्ये यमन श्रेष्ठलिसे ज्वः म्ये हाला तःगु दु ।
म्येचाः
म्येचाःया न्हापांगु म्ये कथं मतिनाया चिखि टाइटल ट्राय्क खः । ह्यामि पहलं मुसुं न्हिंला… मतिना चिखि कस्सिक चिना… तसकं नसालु सःलं आइटम म्ये पह वः। छुंनं नेवाः संकिपाःलय् आइटम म्ये कथं तयेफइगु अवस्था दु । शरिता शाहिया सः मनमोहक जू । जुगल डंगोलया संगीतय् छगू एक्सपेरिमेन्ट खनेदु । अकसर टे«डिशनल सवाःया म्ये याइम्ह खःसां थुकी ट्रेडिशनल लिसें प्याखँया म्येथे सवाः दु । शब्दय् रोमान्स लिसें यौनवादी सवाः दु । शव्दयात ल्वयेक संगीत दु ।
निगुगु म्ये टिपिकल जुगल डंगोलया संगीतया सवाः दु – चाकुमाकु धाःगु लाखामरी । थुगु म्ये यमन श्रेष्ठं सरिता शाहीयात साथ बियाच्वंग्ु दु । खसभाय्या लोक म्ये थें सवाः थुकी दु । म्ये तसकं हे कर्णप्रिय दु । थुगु म्ये व मतिनाया चिखि म्येलय् सरिता शाहीया सःलय् छुं कथंया भिन्नता तायेदु । थुकीं यानां शरिता शाही छम्ह भस्र्टाइल सिंगर खः धैगु पुष्टि जुवनिं । यमन श्रेष्ठया सः व सरिता शाहीया शाहिया सःलय् न्ह्यइपुगु केमेस्ट्रि तायेदु । अवश्यनं यमन श्रेष्ठया सः वय्कया बा मदनकृष्णया श्रेष्ठया सःलिसे ज्वः लाः तर नं यमन श्रेष्ठया सःलय् छगू गतिशिलता दुगु थुगु म्ये न्यनेबलय् ताः दु । म्येया संगीतय् छुं कथंया उर्जा दु । शब्द नं न्ह्यइपुसे च्वं ।
न्येया गाःच्व ब्यना वल.. सरिता शाहिया सःलय् यइपुगु म्ये खः । म्येया सवाः टे«डिशनल सवाः दु । शब्दभावय् रोमान्स दु । हाकनं छकः सरिता शहिया सः म्ये कथं हे ल्वयाच्वंगु दु ।
पुर्णकाजी ज्यापूया शब्दय् नेवाः पह दु । नेवाःलोक साहित्यया खँग्वःत पुर्णकाजि ज्यापुं अःपुक्क न्ह्यइपुक्क छ्यलातःगु दु । ह्यामि पहलं मुसुक्क न्हिला.. शव्दय् अथें हे नेवाः पह दु । चाकुमाकु धाःगु मरि नकाः हयेकः वयाला.. थें जाःगु खँग्वः बिशेष रूपं नेवाः समाजय् चलनचल्तिया खँ खःत । अथे तुं म्ये यौनवादी भाव कथं न्यया गाच्वः ब्यना वल.. क्य्लय् मिखां भाजुं स्वल, स्यंके मते भाजु न्हिं ला उखेँ थुखें भम्बः जुयाः म्ह्गिः न्हिले ख्वय् मसः यौवनया सवाः गथे खः.. इत्यादी खँग्वलं पुर्णकाजी ज्यापुया शब्दय् यौनवादी बिम्ब व भाव लुयाच्वंगु तायेके फइ ।
थप खँ
थुगु म्येचाःलय् शरिता शाहिया मनमोहक सः दकलय् बांलागु पक्ष खः । उकथं हे म्येचाया संगीतनं बांला । संगीतय् जुगल डंगोलं ट्रेडिशनल संगीतय् नं थी थी बिस्कं पह बियातःगु दु । ताः ई लिपा जुगल डंगोलया संगीतय् सेल्लागु सः व शब्द सकतां चूलाःगु तायेदु । शब्दया खँय् धाःसा म्येया भाव फुक्कं हे यौनवादी दु । छम्ह मिसाया यौवनयात कयाः म्ये पूर्णकाजी ज्यापुं च्वयातःगु दु । म्ये फुक्कं हे मनमोहक दु । तर अन्तिम म्येलय् जि ला मछाला वल धैगु भावयात जितः ला (दः ला) मछासे च्वन जुइमाः थें खनेदु । झीगु नेवाः व्याकरण कथं थुगु लाइन भचा अलमल तायेदु ।
लिखँ थुगु म्येचाः न्यनेबलय् म्येचाः पिकायेत भचा हथाय् चाःगु थें खनेदु । मुक्कं स्वपू जक म्ये न्यनेबलय् शरिता शाहि, जुगल डंगोल व पूर्णकाजी ज्यापु स्वम्हेसिया जुगलबन्दि न्यंन्यं हे न्यने मगाः । म्येचाःलय् मेगु निपू ति म्ये तने माःगु थें खने दु । म्येचालय् थुलि बाबांलाःगु म्ये दुसां म्ये प्रचारपाखे सुयांगु च्यूता खने मदु । नेपालभासा ख्यलय् थौंकन्हे खनेदयाच्वंगु निराशापन नं थ्व हे खः । म्ये पिकाल । हनेबहम्ह मेयर भाजु विद्यासुन्दर शाक्य व ख्यालः जुजु मदनकृष्ण श्रेष्ठं उलेज्या याना दिल तर म्येचाः अनं लिपा गन दु वा गन न्यायेगु दु धैगु सुनां नं मस्यु ।
