बिजयरत्न असंबरे
गुलि नं दु यःगु धैगु हे दैव छाय् मयंंका दः यःगु फुक्क यंकाः संसार छाय् मयंंका ?
थ्व गजल च्वयादीम्ह खः – भूषणप्रसाद श्रेष्ठ । अले थ्व म्येया लय् चिनादीम्ह द्वारिकालाल जोशी खःसा सः बियादीम्ह सपनाश्री । सपनाश्री मय्जुं द्वारिकालाल जोशीया लसय् मेमेगु नं म्येहालातःगु दु । उकी मध्ये छपु खः आकाश ख्वःगु जिं खना । थ्व म्येया छपु कभर भर्सन पिहाँ वल । उगु कभर भर्सन मेपिं सुनां नं हाःगु वा पिकागु मखु । द्वारिकालाल जोशीया हे म्ह्याय् लसता जोशीया सलय् पिदंगु खः । नेपालभाषाया संगीत ख्यलय् कभर भर्सनया उलि चलन मदु । थ्व म्येया कभर भर्सनं उगु आईसब्रेकला यात हे उकिया नापनापं नेपालभाषाया संगीत ख्यःयात अझ छपला अप्वः न्ह्यःने यंकेत ग्वाहाली यात ।
नेपालसम्बत १०६८ पोहेलाथ्व पञ्चमी खुन्हु थ्व धर्ती पलाः तःम्ह द्वारिकालाल जोशीया मां केशरीवदन जोशी अले अबु रामलाल जोशी खः । वयकया दाजु भैरवलाल जोशी व किजापिं मथुरालाल व दुर्गालाल खः । छगु संजोग हे धाय्मालि की वयकया निम्ह किजापिनिगु नां नेपालभाषाया साहित्य ख्यलय् ज्वमदुगु नां कथं धस्वाना च्वंगु मथुरा सायमि व दुर्गालाल श्रेष्ठलिसे ज्वलाना च्वंगु दु । उलिजक मखसे द्वारिकालाल जोशी व दुर्गालाल श्रेष्ठया जोडीला नेपालभाषाया संगीत ख्यलय् छगु ल्वमंके मफइगु जोडीया रूपय् धस्वाना च्वंगु नां खः । वि.सं. २०२२ सालया भाषिक क्रान्ति धुंका त्वाःत्वालय् जुइगु साहित्य सम्मेलनय् अनिवार्य नां जुया दं वःगु नां खः । उगु ईलय् जुइगु साहित्य सम्मेलनया निंतिं म्ये च्वईम्ह दुर्गालाल श्रेष्ठ खःसा उकी लय् चिइम्ह द्वारिकालाल जोशी खः ।
आकाश ख्वःगु जिं खना म्ये आः वया लसता जोशीया सलय् थ्वया च्वंगु खःसा न्हापा थ्व म्ये सपनाश्रीं मयजुया सलय् रेकर्ड जूगु खः तर थ्व दकले न्हापां सः थ्वयेकुम्ह धाःसा द्वारिकालाल जोशी थःहे खः । उगु ईया खँ लुमंकुसे मल्ल के सुन्दरं कनादी कथं उगु ईलय् थायमदुइ जुउगु छगु साहित्य सम्मेलनय् वयक थःम्हेसिनं हे थ्व म्ये हाला न्यंकादीगु खः । वयकलं आपालं म्ये थथे थीथी दबुलिइ न्यंकादीगु दु । उकिया ल्याःचाः मदु । वयकलं दबुलिइ हाःगु तर रेकर्डिङ्ग मजुगु वा मेमेसियागु हे सलय् रेकर्ड जुउगु म्ये आपालं दु । वयकया संगीत व सः दूगु नेवाः म्येचाखय् छन्त लुमंका , मन छकः याउँक दिके , लसय् हंगु विरोध थुलि यःकि गजल लाना च्वंगु दुसाः गुलिखे मेमेगु म्येचाखय् नं वयकया म्ये दुथ्याना च्वंगु दु । रेडियो नेपालय् दूगु धलः कथं वयकलं लय् चिनादीगु १०८ पु म्ये दुसाः सः दुगु ७० पु म्ये खनेदु । न्ह्यागु हे कथंया म्ये हालिम्ह व लय् चिनिम्ह धका म्हसीका दुम्ह द्वारिकालाल जोशीया ५३ पु भजन , ११ पु लोकम्ये व ३३ पु राष्ट्रिय भावया म्ये दु ।
द्वारिकालाल जोशीया परिवार संगीत व साँस्कृतिक ख्यः प्रति समर्पित परिवार खः । वयकया न्हापांम्ह जहान कमला जोशीपाखेंया म्ह्याय् कविता जोशी छगु ईया लोकंह्वाम्ह म्येहालामि खः । अय् दाइचा छला साप झंगः खनि म्ये कविता जोशीया सलय् थ्वया च्वंगु म्ये खः । कमला जोशीपाखें वयकया निम्ह काय्पिं दिपकलाल व रूपकलाल दु । मेम्ह जहान नगीना जोशीपाखेंया म्ह्याय् लसता जोशीला आः तक नं म्येहाला वया च्वंम्ह नांजाम्ह म्येहालामि खःसा मेम्ह म्ह्याय् भिन्तुना जोशी लोकंह्वाम्ह हिरोइन् हे जुल । भिन्तुनाया दाजु छम्ह शरदलाल जोशी नं दु । व नं विदेशय् संगीत ख्यलय् हे ज्या याना वया च्वंगु दु ।
वि.सं.२०४३ सालय् रेडियो नेपालया संगीत सम्मेलनय् न्हाप सिरपा त्याकादीम्ह द्वारिकालाल जोशीया आपालं म्ये उगु ईया यक्व हे संगीत सम्मेलनय् सिरपा त्याकुगु खः । संगीत ख्यलय् छगु बिस्कं हे म्हसीका दयेका ने.सं. १११८ सिल्लाथ्व , द्वादशी (२०५४ माघ २६) खुन्हु थ्व नश्वर देह त्यागु याःम्ह द्वारिकालाल जोशीयात नीनिदँ लिपा वया जूसां छपु कभर म्येपाखें हाकनं लुमंकगु दु । नेपालभाषाया संगीत ख्यलय् हाकनं थ्वयेकुगु दु ।
लसता जोशी
द्वारिकालाल जोशी म्ह्याय् / म्ये हालामि
बा यागु म्ये छपु हालेगु धका मतितया च्वनागु ताः दत । हाले मखना । निला प्यलाति न्ह्यः नेवाःयुट्युबया योबन शाक्यं फेसबुकया माध्यमं स्वापु तल । जि लिसे छपु म्येया म्युजिक भिडियो दयेकेगु धका खँ छुत । खँ जित पायछी ताल । नापलाना खँ ब्याका । म्युजिक भिडियो दयेकेगु जुसेलिं मेगु म्येय् छाय् दयेकेगु बायागु हे म्येय् दयेकेगु धका प्रस्ताव तया । म्ये ल्ययेगु भाला जिगु हे जुल । बा यागु म्ये जित आपालं धइथें यः । उकीं ल्यये थाकुल । बायागु छुंछुं म्ये सपनादिदि( सपना परियार) हाला तःगु दु । उकी मध्ये आकाश ख्वःगु जिं खना म्येयात ल्यया । थ्व म्ये हाःबले सपनादिदी मचा हे तिनि । कन्या मन्दिर स्कुलय् ब्वना च्वंगु । उगु ईलय् जूगु अन्तरस्कूल म्ये कासाय् थ्वहे म्ये हाला सपनादिदीं फस्र्ट प्राइज त्याकुगु खः । थ्वहे म्येयात संगीतकार पासा भुपेन्द्र बज्राचार्ययात एरेन्ज याके बिया ।
थ्व म्येया स्वापु वालिसे दु धका न्येना तयागु । सुमन कपालिया हिसि रेकर्डिङ्ग स्टुडियोखय् रेकर्डिङ्ग खून्हु तसकं वा वल । थुकथं म्ये रेकर्ड जुल । योबनं उकिया म्युजिक भिडियो दयेकल ।
दुर्गालाल श्रेष्ठ
जनकवि / म्ये च्वमि
थ्व म्येया सिर्जनाया छपु बाखं दु । भदौ महिना पाखेया खँ खः । जिपिं महाकवि सिद्धीदास महाजुया बुन्हि हना च्वनागु । बुन्हि हनेगु झ्वलय् जनबाहालंनिसे येँदयेया थीथी थासय् नसं चाउला वये धुंका बाखं च्वमि राजा शाक्यया मासंगल्लीया छेँय् च्या त्वना च्वनागु फुलफुल वा वया च्वन । अबाय्ति हे थ्व म्ये च्वयागु खःसा द्वारिकालाल जोशीं लय् चिंउगु खः । न्हापां थ्व म्ये द्वारिकालाल जोशीं हे हाःगु खः । लिपा तिनि सपनाया सलय् रेकर्डिङ्ग जूगु खः ।
नगिना जोशी
द्वारिकालाल जोशीया जहान / कलाकार
द्वारिकालाल जोशी न्हापांनिसें नांजाम्ह संगीतकःमि खः । सकसिनं म्हसिउम्ह मनू खः । साप हे ख्या याये माःम्हका वयक । अबायति जिपिं प्याफलय् कान्ति स्कूलय् आखः ब्वना च्वनापिं । अन स्कुलय् छगु साँस्कृतिक ज्याझ्वः यायेगु तयारी जुया च्वंगु । वहे तयारीया झ्वलय् वयक नं स्कूलय् झायादीगु खः । अन आखः ब्वना च्वंपिं मिसा मस्तयेत म्ये स्यं झाम्ह का वयक । अनंनिसें हे वयकलिसे संगत जुल । लिपा यःत्यः नं जुल । इहिपा नं जुल ।
स्व. पुष्करलाल श्रेष्ठ
कामना प्रकाशनया नायः
द्वारिकालाल जोशी धाल की उगु इलय् साप हे नांजाम्ह संगीतकार । जिम्ह जहान राजेश्वरी नं म्ये हालेगु मन दुम्ह । तर सापहे मछाम्ह । वया म्येहालेगु मन दु धका जित तक हे मधाःम्ह , मेपिन्त छु धा जुइ । वयागु ईच्छा थुइका जिं हे न्यनाबले मछाबपहलं खः धाःम्ह व । वयात रेहियो नेपालय् भ्वाइसटेस्ट बिइके यंकेगु मति तया । तर अथें यंके मजिल । भतिचा संगीतया औपचारिक ज्ञान बिइमाल धका मति तया । द्वारिकालाल जोशीया थाय् यंकेगु ग्वसाः ग्वया । यंका । वयकलं हार्मोनियम न्ह्यने तल । राजेश्वरीयात म्ये छपु न्यंकी धका धाल । राजेश्वरीया म्ये न्यने धुका वयकलं छंगु सः बांला तर उच्चारण भतिचा भिंकेमा का धका धयादिल । उकिया निंतिं थःया थाय् वयेत नं धया दिल । वयकलिसे निवा स्ववाति अभ्यास याबले राजेश्वरीया उच्चारण बांलाना वल । अले तिनि रेडियो नेपालय् यंका भ्वाइसटेस्ट बिइका । भ्वाइस टेस्टय् पास नं जुल ।
(मदुम्ह पुष्करलाल श्रेष्ठया थ्व धापु द्वारिकालाल जोशीया लुमन्तिइ पिदंगु स्वापु पत्रिकाया विशेष ल्याः पाखें)
