नेपालभाषाया साहित्यया बिषयलय् चिन्तित जुइमाःगु थौंया अवस्था खः । कारण थौंया इलय् तक्क नं नेपालभासाया साहित्ययात अझं छुं कथंया मोड बिइफइगु स्थीति दनि । नेपालभासाया मेमेगु बिषय्लय् आःया नितिं छुं खँ मते । केवल साहित्ययात छगू मोडयात नाला स्वये ।
नेपालभासाया साहित्ययात कयाः थौंकन्हे गुगु रूपया अपेक्षा नेवाः साहित्यकार पिंसं यानाच्वंगु दु अवश्यनं व हे कथंया लिच्वः वयाच्वंगु मदु । थौंया स्थीतिइनं गनं साहित्यिक ज्याझ्वः जुल धाःसानां सच्छि मनू मुंके तकं थाकु । मुंसां न्ह्याब्लें व हे मनू बाहेक मेपिं मदु । छखे न्ह्याथाय् वंसां व हे मनू मेखे सुयांगु साहित्यिक ज्याझ्वः जुसां पारिवारीक लकस जुयाच्वनिं । छखें नेपालभासाया साहित्यिक ख्यः असफल हे जुयाः वनाच्वनाला धाःथें नं तायावइ । तर झी छक्वलं थुलि याकनं निराश जुइमाःगु अवस्था थ्यंक नं बिचाः याये मज्यु ।
थौंया इलय् छुं नं खँयात गुगु कथं न्ह्यब्वल धैगु खँ महत्वपूर्ण जू । थौंया इलय् नं नेपालभासा साहित्ययात छगू न्हूगु कथं न्ह्यब्वये फइगु लकस चूलाका बिलधाःसा अझ नं थुकीयात छगू उत्साह लिसें सकस्यां लसकुस याये फइगु लकस ल्यनितिनि । छुं ई न्ह्यो हे तिनि नेपालभासाया चीहाः संकिपा कासाय् नेपालभासाया साहित्ययया लिधंसाय् नेवाः चीहाः संकिपा दयेकेगु लकस चू लाःगु खः । तर ग्वसाःखलकं धाःसा नेपालभासाया साहित्यया परिभासायात हे हिइकुसें सामाजिक संजालय् पिदंगु बाखँयात नं साहित्य हे नालेगु जुइ धकाः धायेवं चीहा संकिपां गुलि गति कायेमाःगु खः उलि काये धाःसा मफूत । स्वकुमिपिं छखें आशांद्याःगु अवस्था थें खनेदत । गुकीं छु सिद्ध याः धाःसां नेवाः पाठकपिं अझंनं साहित्य पाखे झुकाव दु तर आया माध्याम धाःसा सफू जक मखुसे भिडियो जुयाच्वंगु दु ।
थौंया इलय छगू सफू पिकायेत गुलि ध्येबा खर्च जुइगु खः उलि ध्यबां छगू सेल्लागु चीहाः प्याखँ दयेकेफइगु स्थीति दु । छगू सफू पिकायेगु नितिं थौं कन्हे मूर्त रूप कथं भ्वँतय् हे छापे याये माःधैगु मदये धुंकल । थौंया स्थीतिइ ई बुक कथं मोबाइलय् हे स्वयेफइगु स्थीति दु । सफू नं पिकात हे धाःसां तसकं हे सिमित प्रकाशन जक जुइ । व सिमित सफू स्वइपिं नं झन हे सिमित । उकिं छगू बिचार आः थ्व नं खः की छम्ह च्वमिया परिकल्पना आः मूर्तरूप कथं भिडियो जुयाः पिहांवयेमाः । थौं कन्हे सामाजिक संजालय् थज्योगु चीहाः प्याखँया रूपय् स्वइपिं लाखौं लाख मनूत दु । न्ह्याब्लें सफू मचू वा मन्यां धकाः निराश जुयाच्वने माःगु अवस्था नं मदु ।
