नेवाः सभ्यतायात न्हूगु युगं गुलि हाथ्याः बियाःच्वंगु दु धैगु खँ छुं ई न्ह्यो क्वचाःगु खोना महोत्सवं छगू लाइभ डेमो ब्यूगु दु । नेवाः सभ्यता धैगु हे कृषि उत्पादनलिसे स्वानाच्वंगु सभ्यता खः । नेवाःतय्गु हरेक नखःचखः व जीवन संस्कृति थ्व हे कृषिलिसे स्वानाच्वंगु दु । तर नं नेवाः सभ्यतायात झीसं आधुनिकीकरणया नामय् झीसं हे विस्थापित यायेगु निंतिं आत्तुर जुयाः च्वंगु दु । सकसितं यःमरी, वः, चटांमरी नये यः तर थथे नेवाः मौलिक नसा दयेकेगु नितिं माःगु हलज्वलं गनं उत्पादन जुइ धैगु खँय् झीगु च्यूता मदयाः वनाच्वंगु दु ।
अकसर महोत्सवया नामय् आयोजकपिंसं फुड स्टल व कन्सर्ट कथं आधुनिक म्येया सहारा कयाच्वंगु दै तर न्हापांखुसी थथे स्थानीय तहलं हे छगू महोत्सवया ग्वसाः याना मुक्कं खोकनाया प्रचारप्रसार व महत्व ब्वज्या जूगु तसकं हे च्वछायेबह जूगु खँ खः । महोत्सवय् नेवाः संस्कारया ज्वलन्त दसू न्ह्यब्वयाः नेवाः संस्कृतिलिसे स्वानाच्वंगु हलंज्वलं ब्वयातःगु थौंया न्हूगु युगया मोबाइल जेनरेशनयात छगू एन्टिक म्युजियया सामान थें हे जुइ धुंकल । न्हूगु पुस्ता थज्योगु स्थीतिइ गथेयाना थ्यन धैगु खँय् झीसं नं छक्वः दुवाले आवश्यक जू ।
मूलत मस्तय्त सु संस्कारीत यायेगु नामय् गुगु कथं स्कूलिंगया निंतिं झीसं अंग्रेजी वा मेमेगु बोर्डिग स्कुलय् ब्वंकाच्वना थुकीया हे लिच्वःकथं थौया मस्त झीगु सभ्यतापाखें तापाना वनाच्वंगु दु । तर थुकीया आशय कदापि थ्व मखु की झीसं मस्तय्त अज्योगु सकुलय् ब्वंके हे मज्यू । थौंया इलय् झीगु देय् आः प्रादेशीक संरचनाय् वने धुंकाः स्कुल स्कुलय् आः झीगु सभ्यता व संस्कारयात नं पठन पाठनय् दुथ्याकेमाःगु आवश्यकता दु । झीसं झीगु भाय् व तजिलजीयात सम्मान बीगु व बीके मफूत धाःसा स्थीति अझं झीगु निंतिं भयावह जुइ ।
खोकना महोत्सव अझं धायेगु खःसा छगू कथं झी नेवाःतय्गु निंतिं हाथ्याः हे खःनिं । भौतिक पूर्वाधारया निंतिं थुगु क्षत्रय् फास्ट ट्राय्क निर्माण यानाः थनया बुँ बाली नष्ट यायेगु स्वरूपय् राज्य न्ह्यचिलाच्वंगु दुसा थुगु क्षत्रया ऐतिहासिक व सांस्कृतिक महत्वयात राज्यं मूल्यांकन यायेगु क्षमता मदु धैगु राज्यया कृयाकलापं क्यनाच्वंगु दु । उचित इलय् थुगु थाय्या महत्व महोत्सव याना मूलधारय् हयेत याःगु कुतः तसकं हे च्वछायेबहःगु ज्याखँ खः । हरेक बर्षय् थन महोत्सव जुयाःच्वनेमाःगु खने दुसा खोकनाया बिषययात मूलधारया राजनीतिइ यंकेत मूलधारया हे व्यक्तित्वपिंत थन कःघाना तयेमाः ।
