स्वनिगः छु देन्यंक हे लक डाउन जुयाच्वंगु दु । अझ दे न्यंक जक मखु विश्वन्यंक नं लकडाउन जुयाच्वंगु दु । छगू लहर हे जुइ फु की लकडाउनया पूवंगु अर्थ मथुइकं हे थौं स्वनिगःवासी लकडाउन जुयाःच्वंगु दु । चीनपाखें ब्वलंगु कोरोना भाइरसं थौं थज्योगु स्थीति ब्वलनाच्वंगु खः ।
सामान्यरूपं स्वनिगःवासी लकडाउनया नामय् नेपाल बन्द वा कर्फ्यु थें तायेकाः थःथःगु छेँ च्वनाच्वंगु दु । कफर्््यु वाः नेपालबन्द झी नेपाःमिं अनुभव यानावयाच्वंगु हे छगू अभ्यास खः तर झीसं थुगु अनुभव कायेमखंगु नं यक्व हे दये धुंकल । अले न्ह्यइपुगु खँ छु धायेबलय् थुगु लकडाउनयात पुलांगु अनुभव कथं हे ५ बजे वा छ बजे लिपा मनूत हाकनं हुलमुल पिहांवयाच्वंगु दु ।
लकडाउन छगूकथंया न्हूगु हे अभ्यास खः । झीसं गुब्लें थुकथंया अभ्यास याये मननि । छगू देखासिखीया अभ्यास कथं व तनावपूर्ण जीवनपाखें छुं ईया निंतिं बाध्यात्मक परिस्थीतिया लवः कायेगु कथं झी नं थुगु लक डाउनयात नाला हे च्वना । तर बहनी सिया ५ ÷६ बजे जुइवं हे झीगु पुलांगु अभ्यास कथं झीत पिने वनेगु वा चाह्यु वनेमास्तिवयाच्वंगु मानवीय व्यवहारं ज्वनाच्वंगु नं दु ।
लकडाउनया स्थीतियात सरकारं नं पूवंक पूर्व तयारी याःगु खने मदु । लकडाउन नेपाः सरकारया वाध्यात्मक परिस्थीति हे खः । कोरोनाया संक्रमित इटालिइ खनेदये धुंकाः इटालिया जनतापाखें बेवास्ता याःगुया लिच्वः कथं इटालिइ थौं महामारी कथं मनूत सिनाच्वंगु दु । थुकीया हे ग्याःचिकुं नेपालय् नं लकडाउन यायेमाःगु खः । कोरोना छु खः, गथे सरे जुइ वा गज्योगु लक्ष्ण दइ वा छु छु कथं गथे याना थुकीयात पने फइ धैगु छगू परिकल्पनाय् हे जक सिमित जुयाच्वंगु दु । थथे जुलकी अथे जुइ हँ धैगु खँ जक सामाजिक संजालय् वयाच्वंगु दु ।
कोरोनायात भाइरस कथं नालातःगु दु । कोरोनाया संक्रमण तसकं हे ग्यानापु । छक्वलं हे हजारौं मनूयात सरे याये फु । इटलिइ छगू फुटबल कासाया दौरान थुगु ल्वय् सरेजूगु धकाः अनुमान याःगु खः गुकीं इटालिइ छगू महामारी कथं थ्व ल्वये प्यपुंवन। इटलिया थुकथं जूगु महामारी इटलिया जनतां कोरोना भाइरसयात तसकं हे हल्का रूपं काःगुलिं नं खः । शुरुया दिनय् २म्ह ३म्ह कोरोना भाइरसया लक्षण खनेदुसां सरकारया अपिलयात वेवास्ता याःगु कारणं थौं इटलिइ न्हिंया न्हिथं सयौंया दरय् मनूत सिनाच्वंगु दु । थुकीया हे लिच्वःयात ध्यानय् तयाः नेपाल सरकारं लकडाउनया आदेश ब्यूगु दु ।
कोरोना भाइरसया थीथी कथंया परिक्षणया दौरान थुगु भाइरसयात पनेगु धैगु हे छम्ह मनू मेम्ह मनूया सम्पर्कय् मवयेगु खः । थुकीया निंतिं झीसं थःगु पुलांगु अनुभवयात त्वता थः पूर्णरूपं मेपिं वाह्य व्यक्तिलिसे सम्पर्कय् मवयेगु खः । उकिं थुगु क्वारेन्टाइन वा लक डाउनयात ध्वाथुइका स्थानीय सरकारलिसे सहकार्य यानां न्ह्यांवनेगु बाहेक मेगु विकल्प झीके मदु ।
