पेजथ्री बाःछिपौया न्ह्यब्वया नेपालभाषा सर्टमूभि इन्द्रायणीया समापन ‘इन्द्रायणी कलाकार व प्रावधिक सम्मान लिसें गोदावरी आन्तरिक पर्यटन प्रवद्र्धन’ ज्याझ्वः याना गादोवरी नगरपालिकाया ग्वहालिइ वज्रबाराहीया भलिंपुचः पार्टि प्यालेसय् तःजिक क्वचाःल । ‘इन्द्रायणी’ सर्टमूभिया निर्माता नरेशवीर शाक्यया सभापतित्वय् जूगु ज्याझ्वलय् गोदावरी नगरपालिकाया मेयर गजेन्द्र महर्जन मूपाहाँ व वरिष्ठ गायक जगमोहन वामि विशेष पाहाँकथं झायादीगु खः । ज्याझ्वलय् इन्द्रायणी शर्टमूभी यूट्युब प्रिमियर नं याःगु खः ।
ज्याझ्वःयात सकसितं लसकुस यायेगु झ्वलय् नेवाः इंग्लिस स्कुल थेच्वःया प्रिन्सिपल एवं प्याखँया कलाकार नविन थेच्वःमिं थुजोगु सर्टमुभीं विद्यार्थीलिसें स्थानीय कलाकारपिनिगु दक्षता न्ह्यब्वये फइगु खँ कुलादिल ।
गोदावरी नगरपालिकाया मेयर भाजु गजेन्द्र महर्जनं इन्द्रायणी सर्टमूभिं गोदावरी नगरपालिका दुने थःगु हे १२ वडाया आपालं नेवाः मौलिक संस्कृति व दृष्यत क्यनेत ताःलाःगु खँय् सन्तुष्टि प्वंकादिल । नेवाःतय्गु थज्योगु कला संस्कृति विश्वव्यापि यायेत थुगु शर्टमुभिं महत्वपूर्ण योगदान याइगु खँय् बःबिया दिल ।
प्याखँया निर्देशक दर्शनवीर शाक्यं थुगु प्याखँ थेच्वय् सुटिंग यानाः दयेकेत ताःलागुलिं सुभाय् देछाना दिल । लिसें थेच्वः दुने नेवाः प्याखँयात ल्वःगु लोकेशनत दुगुलिं नेवाः प्याखँ प्रवद्र्धन याना गोदावरी नगर पालिका दुने लोकेशन प्रचार यायेगु छगू ज्याझ्वः नं दुथ्याकेत स्थानीय निकाय्यात इनाप यानादिल ।
वरिष्ठ गायक जगमोहन वाःमिं कलाः संस्कृति हे झीगु म्हसीका जुयाच्वंगुलिं थुजोगु सम्पदा संरक्षण जुइमाःगु विचाः तयादिल । पेजथ्री बाःछिपौयात बिशेष सुभाय् देछासें नेसं ११३३य् थःत लाइफ टाइम एचिभमेन्ट अवार्ड ब्यूगु खँ लुमंकादील ।
वरिष्ठ सिने पत्रकार बिजयरत्न असंबरें इन्द्रायणी सर्टमूभिया समिक्षा याना दीगु खः । हरेक कलाकार बिशेष चरित्रय् थुगु प्याखनय् न्ह्यब्वयातःगु खँय् वय्कलं कुलादिल ।
इन्द्रायणी सर्टमूभिया कलाकार व प्राविधिकपिन्त मूपाहाँ मेयर गजेन्द्र महर्जन व विशेष पाहाँ जगमोहन वाःमिपिन्सं सम्मान देछाना खः । मूपाहाँ महर्जन, विशेष पाहाँ वाःमि व पत्रकार असंबरेयात ईलोहं प्रकाशनया संरक्षक धर्मवीर शाक्य मतिनाया चिं लःल्हाःगु खः ।
सभापतिया थासं नरेशवीर शाक्यं मन्तुनाया झ्वलय् देय् न्यंक सुलाच्वंगु नेवाः प्रतिभा न्ह्यब्वयेगु आज्जुं हे थुजोगु सर्तमूभिया निर्माण न्ह्याकाच्वंगु खः धयादिल । ज्याझ्वः सुष्मा महर्जनं न्ह्याकादीगु खः ।
