छ ला छिमि अबु थें का…
मिजं धैपिं थः अबुया गुण व अवगुण फुक्कं बांलाक्क स्युपिं जुयाच्वनिं । जब थः मिसां थःत थः अबुलिसे लना बी तब मिजंनं थः अबुया अवगुण जक लुमंकी छाय्की थज्योगु खँ धैगु छुं ल्वापू ख्यापू जुइगु इलय् जक हे पिहांवइगु खः । थज्योगु खँ मिजंतय्त तसकं हे मानसिक रूपं मछिंका बी ।
छं गुब्ले ध्यबा कमे यायेगु ?
मिजंतय्सं थःथम्हं लनेगु छगू मापन ध्यबा अर्थात थः परिवारयात लहिगु खः । छं गुब्ले ध्येबा कमेयाना जितः थ्व …….. न्याना बीगु धकाः न्ह्यसः यायेगु धैगु हे मिजंया बेइज्जत यायेगु न्ह्यसः खः । थज्योगु न्ह्यसलं मिजं त झन निरास जुइ ।
जिमि मांनं ला छं थथे याइ धकाः न्हापा हे धाःगु खः…
थुकथंया खँ तइबलय् थ्व नं संकेत याइ की भातया बिरुद्धय् कला जक याकचा मखु की मांम्ह नं दु । निम्ह जाना आ छम्हेसित क्वत्यलेगु जुइ धैगु संकेत पिहांवइ । थुकींयाना भातं नं मेपिनिगु सल्लाहा वा ग्वाहलि मांवनी ।
म्वाल छं छु नं याये म्वाः जिं हे याये..
भातया मिलनसार ब्यवहार यात हे हाथ्या बी कथं थथे धायेगु पाय्छि मजू । छुं कथंया ई नापं च्वने धाये कथं भातं ग्वाहलि याः वःसां भातं छुं हे ज्या याये मसः थें तायेका बीगु व्यवहार जुइ । सः सां मसःसां सःगु ज्या याकेत प्रेरित कलानं याये सये माः ।
छं न्ह्याब्लें … थथे याइ । छं गब्लें …. थथे याइ मखु ।
स्वापुया नाटकीय मोडय् थुकथंया संवाद पिज्वयाच्वंगु दइ । दोषारोपनया थुगु कासा गुब्लें नं सफल जुइमखु छाय्की छं थथे यात वा थथे मयात धायेसातकं भातयात थःम्ह अथे मयानागु व थथे याना बियागु खँ झन लुमना वइ । थुकीं याना झन हे ल्वापू तच्वइ ।
छन्त आ तक्क नं कोट थिक जुइ धकाः च्वना ला ?
भाःतयात आ छ ल्ह्वन धकाः धायेगु मेगु तरिका खःसां थुकीं मेगु हे खँ नं कनाच्वंगु दइ की कलाःयात भाःतया उसाँय् सिबें भाःत गुलि ल्ह्वन धैगु जक हे चिन्ता दु । सकारात्मक खँ सिबें नकारात्मक खँया जक यक्व च्यूता दु धैगु थुइ ।
हाकनं व हे पासा नापं
सुयात नं थः पासा सु जुइमा वा जुइमज्यु् धकाः धायेकाच्वने यइ मखु । थुकीं मिजं नं थः पासा छम्ह हे ल्येगु स्वतन्त्रता हनन् यागु थें ताय्की । थःम्हं धाथे छुं याये हे मदु थें तायेका भात झन हे निरास जुयाःच्वनिंं ।
मस्त स्वयाच्वं तर मस्तय्त थथे…. याकेमते… अथे.. याकी
मिस्त मां जुइसा अबु पिं बा जुइ । मां पिंत न्ह्याब्लें मिजं त बा जुइ मफु थें ताइ । थुकथंया संवादं मिजंतय्त बा जुइत झन हे ग्याःचिकु अप्वयेका बी । फुक्केसित अवसर माः । सामान्य परिस्थीतिइ नं अबु जुइत अवसर मविइगु कुतः मिसातय्सं यानाच्वने मज्यु् ।
