- दिपक तुलाधरया अबु करुणा रत्न तुलाधर व मां हेरा सोभा तुलाधर खः । न्याम्ह तःकेँहे मध्ये दिपक तुलाधर दक्कले चिधिकम्ह खः । दिपक तुलाधरया परिवारय् जहान रीमा तुलाधर, लिसें काय् यजु रत्न व म्ह्याय् मतिना दु ।
- असं, धालासिको कवःया दिपक तुलाधरं दक्कले न्हापां त्यौड प्राइमरी स्कूलय् आखः ब्वंगु खः । थुगु स्कूलय् आखः ब्वंकीबलय् खँल्हाःबल्हाः फुक्क नेवाःभासं हे जुइगुलिं वातावरण न्ह्यैपुगु खँ वय्कलं लुमंका दी । लिपा दरबार स्कूल, सिद्धार्थ बनस्थलि, आनन्दकुटी लगायतया स्कूलय् ब्वन ।
- त्वालय् पासापिं नापं म्हितेगु वय्कःयात अतिकं यः । मचाबलय् पासापिं नाप ह्वाग्रा, गुच्चा, पाँय् म्हितेगु खँ कनादीम्ह दिपकया फुटबल, स्वीमिंगय् नं मचांनिसें रहर दुगु जुया च्वन । दिपक तुलाधरया मचाबलय् न्या व बखुं लहीगु नं रहर दु । बखुं लहीगु ‘तःधंगु हे नसा’ कथं वयेकलं कया दी ।
- शंकर देव क्याम्पसय् ब्वना दीम्ह दिपकया टेबल–टेनिसय् नं यक्को रहर दु । क्याम्पसया इलय् गबलें गबलें क्लासय् मवंसे न्हिच्छी हे टेबलटेनिस म्हितेगु, क्याम्पसया क्यान्टीनय् चिया त्वना पासापिं नाप गफ यायेगु याःसां जांचय् धाःसा फुक्कं विषयस पास जुइत वय्कः ता लानादी ।
- दिपक तुलाधरया फुटबल म्हितेगु जक मखु स्वयेगु नं तसकं रहर । विशेष याना वय्कः आरसिटी क्लबया फ्यान खः । फुटबल धालकि न्ह्याथाय् वना नं स्व वने न्ह्याम्ह दिपकं वीरगञ्ज लगायत थीथी थासय् थ्यनेगु याः ।
- दिपक तुलाधरं सन २०१२य् जूगु ‘यूरो कप’ स्वयेत मिले जूपिं पासापिं बिजय श्रेष्ठ व केशव तुलाधर लिसे थःपिनिगु हे खर्चं युक्रेनय् वंगु खः । उगु इलय् थ्व खँ थीथी पत्रिकाय् नं पिहाँ वल । युक्रेनय् डोल्फिन नाप लाल कयागु व Black sea स लखय् चले याइगु मोतर बाइक ब्वाकागु खँ तसकं न्ह्याइपूगु लुमंका दी ।
- दिपक तुलाधरया उपनां ‘प्रेम कोसेली’ धयागु आपासिनं मसीफु । थ्व नामं वय्कलं थीथी पत्रिकाय् च्वसू नं च्वयादी । दिपक तुलाधरया मेगु उपनां ‘मिस्टर काठमाडौं’ खः । ‘मिस्टर काठमाडौं’ या नामं वय्कलं जापानया छगू पत्रिकाया निंतिं जापानी भासं नियमित च्वसू च्वयेगु याना दी धुंकूगु दु । जापानीत नेपालय् वइबलय् ‘मिस्टर काठमाडौं’ नापलाः वइगु वय्कलं कनादी ।
- ‘खस भाय्यात जक नेपाली धायगु पायछि मजू’ धकाः गोरखापत्र, कान्तिपुर लगायतया न्हिपतिइ नेसं ११२७य् च्वगु दिपक तुलाधरया च्वसूयात राष्ट्रिय स्तरया सिरपा नं लागु दु । नेपालभाषाया निंतिं बिस्कं कथं योगदान बिउम्ह धका दिपक तुलाधरयात हःपाः गुथिं ‘हःपाः सिरपा’ मंकाः धुकुतिं ‘तीर्थ हिरा सिरपा’ लःल्हाःगु दु ।
- थीथी नेवाःनसाया परिकार दुथ्याकाः वय्कलं २०दँ न्ह्यः पासापिं नाप जाना येँया दरबार मार्गय् ‘भ्वय्–छेँ नेवाः रेष्टुरेन्ट’ चायेका दिल । जर्मनय् जूगु छगू नसा ब्वज्याय् ‘भ्वय्–छेँ’यात सिरपा नं ब्यूगु दु ।
- मांभाय् संरक्षण यायेत व मस्तय्सं बांलाक्क थुइक ब्वंकेत स्कूलय् हे थःगु मांभाय् ल्हाये दयेकेमाःगु बिचालं दिपक तुलाधरं थनिं ११ दँ न्ह्यः मोदर्न नेवाः इंगलिस स्कूल चायेका दिल । थुगु स्कूलय् जागिर नयेत नेवाः हे जुइमाः धयागु मदु, तर नेवाःभाय् सःम्ह हे जुइमाः धयागु नियम दयेका तःगुलिं नेवाःभाय् सःपिन्त रोजगारया अवसर चूलाकेगु ज्यायात तिवः जू वना च्वंगु दु । लिसें, वय्कलं नेवाःत दुगु बस्तीइ नेवाः स्कूल चायेकेगु आज्जु ज्वनाः ‘नेवाः बस्ती नेवाः स्कूल’या अभियान न्ह्याकादिल । थेच्व नेवाः इंगलिस स्कूल थ्व अभियानया न्हापांगु स्कूल खः ।
- लजगाया ल्याखं दिपक तुलाधर छम्ह ब्यापारी खः । सन् १९९२सालय् हिम टूर्सया नामं ‘ट्राभल एजेन्सी’ चायेकादीम्ह वय्कःया इम्पाेर्ट एक्सपाेर्ट याइगु कंपनि एसियन क्राफ्टस् दु धयागु खँ यक्कोस्यां मसीफु ।
- सन् १९८८ सालय् सिंगापूर एरलाइन्सया मूख्य बिक्री एजेन्ट ‘एभरेष्ट एक्सप्रेस टूर्स एण्ड ट्राभल्स’ य् ‘टूर अफिसर’ पदय् जागीर नयाः पर्यटन ख्यलय् दुहाँ वंम्ह दिपकया शुरुया तलब रु. १३०० (झिन्स्वसः) खः । ज्याया निंतिं अन्तरवारता बीगु झ्वलय् अन्तरवार्ता काःम्ह जापानी मयजुं दिपक तुलाधरया ल्हाया रेखा नं स्वयाः ल्हाः स्वयाः (palm reading) याःगु खः। दिपक तुलाधर आः तक नं अलमल तिनिकि ल्हाया रेखाया आधारय् जागीर दुगु खः वा योग्यताया आधारय् जागीर दुगु खः धकाः ।
- आः तामांग भाय् सयेकेगु रहर याना च्वंम्ह दिपक तुलाधर जापानी, जर्मनी, इंगलिस व तिब्बती भाय् बांलाक्क ल्हाये सः ।
- दिपक तुलाधर संकिपा, टेलिभिजनय् नं खने दु । भिडियो एडिटिंग व डाइरेक्सनय् नं रुचि दुम्ह दिपकं नेपालमण्डल तेलिभिजनया मस्तयगु ज्याझ्वः ‘नःलि क्यब’ या स्कृप्ट च्वयेगु व निर्देशन नं यानादीगु खः ।
- थीथी थासय् चाःहिलेगु शाेख दुम्ह दिपकं जापान, अष्ट्रेलिया, अमेरिका, रुस, यूक्रेन, सिंगापुर, थाइलैण्ड, हंगकंग, मलेसिया व भारतया भ्रमण याये धुंकूगु दु । नेपाया थीथी थासय् चाःहिलेगु झ्वलय् चितवनया जंगलय् पर्यटक त नापं किसिम्हय् च्वनाः चाःहिउ वंगु छगू इलय् किसिंम्हं कुहां वःबलय् न्ह्यःने सं हे ग्यानापुपिं निम्ह निम्ह भालु नाप लात, अले किसिम्हय् तुं थां वनेत स्वःबलय् किसिम्हय् गये हे थाकुल, तर किसिमागया इशारां किसिं थःगु तुति ल्ह्वना बिल, अले किसिया तुतिइ गयाः थहां वना ज्यान जाेगेयात।
- अथे हे धुन्चे पाखें लिहाँ वयाच्वंगु इलय् लँय् हे तःधिकम्ह चितुवा नापलाःगु अनुभव वय्कः याके दु । थःपिं जीपय् दुने च्वना च्वंगु जुया च्वन, तर व चितुवां अन बुँइ म्हिता च्वंपिं मस्तयत नयेगु लागि झम्ते यायेत स्वया च्वंगुलिं थःपिं सकलें जीपं पिहाँ वयाः अप्पां कयेकाः चितुवायात बिस्के छोयेत ताःलात ।
- टिनेजरया छगू इलय् दरबार स्कूलय् जूगु ग्यांग फाइटय् दिपक लगायत पासापिंत पुलिसं ज्वनाः जनसेवा चौकिइ यंकूगु जुया च्वन । अले त्वालय् च्वंम्ह माननीय नानीमैंया दाहालं पुलिसयात फोनयानाः दिपक व पासापिन्त त्वःतका हःगु खः ।
- दिपक तुलाधरं कमर्सया विद्यार्थी खःसां एड्सया वासः पिकायेगु फोर्मुला दयेकागु दु धकाः दाबी याना दिल । अमेरिकन लाइब्ररी, ब्रिटिस काउन्सिल लगायतया थीथी सफू स्वयाः, जीवजन्तुया अध्ययन यानाः पिकाःगु उगु फोर्मुला अमेरिकाया छगू बैज्ञानिक संस्थाय् छवःगु खःसा, अनं छुं लिसः धाःसा मवल । दिपक तुलाधरं दयेकागु फोर्मूला थौकन्हे दयेका च्वंगु एड्सया वासः दयेकेगु अन्तरराष्ट्रिय फोर्मूला नाप ज्वःलाः धकाः दाबी नं याना दिल ।
थ्व च्वसुइ “भिजन सफारी” रिसोर्टया खँ तोफित थेँ च्वं !